Zer 40
40
Zeremii n woe Gedalia li
1Zeremii na á goã yii-n ka zɔrɔka nɛ Zeruzalɛmu laanka Zudaa a kòso nɛn lɛn bii, ǹ doamaa bɛ nɛ ǹ nə ǹ mɛnɛn lɛn goa ǹ wo ǹ ne *Baabilonii. Sɛnɛ, bǎã-lɛduə̃lin goledɛnaa Nebuzaradan bɔ ǹ miã kòso nɛn bii á toa á woo Ramaa.
Bɛ kio, Dɛnaa Lawa boo da ka Zeremii ni. 2Zeremii laan bɛ̀ a woo, bǎã-lɛduə̃lin goledɛnaa lɛ lɛ dia la para-a, á boo da nɛ: «N Lawa, Dɛnaa Lawa goã á koe kɛ boo da Zeruzalɛmu ganaa, 3á toa á n zɛnaa dɔn sonbore. A boo mɛn da, bɛ yɔrɔ yɛ. A giala, ka n too kɔ Dɛnaa Lawa lon wa. Zɛ̀rɛ n ka ganaa bɛa paǹ li. Bɛ lɛ nɛ sii kɛ tumaa ka yɛ. 4Kanna kəni, zɔrɔkan kɛn n gɔnɔn ganaa, man bɛn boe ma ǹ bɔ n ganaa. Bɛ̀ n tá li n da Baabilonii kun ka masɛ nɛ, n moɛ̃, ma á re giɛ n walan. Bɛ̀ n ba li dɔn wa, n baran da wa. Bɛ̀ gána lɛ a paǹ mɛn kɔɔ̃n kɔ n ganaa, n tá boe la n wo walan n din gɔn wìi á lɛ-a.»
5Zeremii bɛ́ a nɛn á woe wa, Nebuzaradan tɔn pɛ nɛ: «N tá boe la n nə n bɔyaa n wo Ayikaamu a nɛgiĩ Gedalia li, ke Safan a nɔ̀ɔn lɛa, Baabiloniin kii baa Zudaa gána a gánadɛnaa lɛa. Ń boe la n wo giã bɛ li kun ka zaman lɛ nɛ, hinlaa, bɛ̀ bǎã mɛn kɔɔ̃n kɔ n ganaa, n wo walan.»
Bɛ kio, bǎã-lɛduə̃lin goledɛnaa lɛ màn-bii kɔ Zeremii la zii tɔ lɛ taman yii. Á da zii ka bǐɛ̃baa ǹ mànan nɛ á toa á woo. 6Zeremii woo Mispaa, Ayikaamu a nɛgiĩ Gedalia li. Á giã walan kun ni, kɔnlɛ ka zaman mɛn goã gána lɛ nɛ.
Gedalia n gánadɛnaa lɛa Zudaa
7 #
Kiin2 25.22-24
Zudaa gána nɛ, sɔraasin nə́ goã ǹ tan kɔnlɛ ká sɔraasin nyɛɛnaandɛnan nɛ. Ǹ nə́ ma mà Baabiloniin kii na á Ayikaamu a nɛgiĩ Gedalia bɔ á koa gánadɛnaa lɛa gána lɛ mìi la. Mà a na á koa doobaan mìi la, giĩn ni, lɔn nɛ ka nɛnyaanan nɛ, ǹ bɛ́ ǹ boo la ǹ nə́ ǹ mɛnɛn goa ǹ nə́ woo ǹ ne Baabilonii wa. 8Bɛa sɔraasin lɛn nə́ daa n kaa kun Gedalia nɛ Mispaa. Ǹ nyɛɛnaandɛnan man ka Netania a nɛgiĩ Isimayeli ni, Kareyaa a nɛgiĩ màn paa Zoanan laanka Zanaatan nɛ, Tanewumɛti a nɛgiĩ Seraya nɛ, Netofaa min Efayii a nɛgiĩn ni, ka Yazania nɛ Maakaa min goon a nɛ lɛa. 9Ayikaamu a nɛgiĩ, Safan a nɔɔn Gadalia pɛ sɔraasin lɛn laanka ǹ nyɛɛnaandɛnan manɛ: «Ka nyan toa nyɛ́ɛ ka kũ ka dí nya Baabilonii minin ma-n wa. Ka giã gána lɛ nɛ, ka dí nya Baabiloniin kii ni. Bɛ á re toɛ kaa sii tumaa bǐɛ̃ kɔ. 10Masɛ n giã-n Mispaa man ka bǎã siɛ Baabilonii minin yɔrɔ-a, kɛn die wɔ li. Sɛnɛ kasɛn, ka rezɛ̃ nɛ na, da nɛ nɛ, ka nyɔɔ nɛ. Ka kaa kaa-piɛ mànan tamaa, ka giã sɔnbɔraanɛ kaa kiwin kɛn nɛ ka ǹ si.»
11Baabiloniin kii zaman lɛ gialakun toa Zudaa gána nɛ, á ǹ sii wɔ Safan a nɔɔn, Ayikaamu a nɛgiĩ Gedalia gɔn. Zudaa minin mɛnɛn bɛ́ giã-n Moabu minin bii, Amɔn tɔrɔn nɛ, Edɔmu minin ni ka gána kɔsɔn nɛ, ǹ tumaa bɛ ma. 12Ka bɛ-n kəni, Zudaa minin nə goã pɛsiɛ̃-n bǎã woo bǎã nɛ, ǹ tumaa nə́ n bɔyaa ǹ nə́ daa Zudaa gána nɛ, Gedalia li Mispaa. Ǹ nə́ rezɛ̃ nɛ gigiã yɛ walan ka da nɛ nɛ.
Gedalia a gɛ̀
13Ǹ kɔn pinaa, Kareyaa a nɛgiĩ Zoanan laanka sɔraasin goledɛnan mɛnɛn nə goã Zudaa gána nɛ, ǹ nə́ daa Gedalia li Mispaa, 14ǹ nə́ pɛ nɛ: «Amɔn tɔrɔn kii Baalisi Netania a nɛgiĩ Isimayeli dia mà a da n dɛ. Ń tá a siére-a?»
Sɛnɛ, Ayikaamu a nɛgiĩ Gedalia waa la wa. 15A da yaa, Kareyaa a nɛgiĩ Zoanan goã á daa a li ka durii ni Mispaa, á pɛ nɛ: «N tá li ma Netania a nɛgiĩ Isimayeli dɛ ma bɔ bii-a? Min kɔn ba re boe a siére-a wa. N nə n die toɛ walan asɛ nə nsɛ nyin bɔ? Bɛ̀ á n dɛ, Zudaa min mɛn tumaa bɛ́ soe-n kɔn-a n li, bɛn tumaa á re wusii doo ǹ sasawaa paǹ tumaa li. Zudaa gána gialakun boɛɛn kɛ lɛ bii-a, bɛ dɔ n die papaɛ̃.»
16Sɛnɛ, Ayikaamu a nɛgiĩ Gedalia Kareyaa a nɛgiĩ Zoanan lɛ si kɛnɛn: «N nyan bɛ zɛnaa wa. N bɛ́ boo mɛn diɛ Isimayeli a paǹ li, soɛ nɛ!»
Currently Selected:
Zer 40: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
