Zer 35
35
Rekabu tɔrɔn sii a kɔnboe
1 #
Kiin2 23.36–24.6; KZS2 36.5-7 Zoziasi a nɛgiĩ Zudaan kii Zozakimu a kiibaa waáraa, Dɛnaa Lawa boo da Zeremii ni á pɛ nɛ: 2«Wo dɔ Rekabu tɔrɔ minin li, n pɛ ǹ nɛ mà ǹ da wɔ Lawa a kion lɛ a kion nɛ goon ne. N tá re duvɛ̃ koe ǹ la walan ǹ mi.» 3Zeremii tɔn woo ga Abasinia a nɔɔn, Irmeya a nɛgiĩ Yazania li. Á woo ga Yazania a nɛnyaanan li, bɛ giala mà Rekabu tɔrɔn tumaa. 4Á woo ǹ ne Lawa a kion, Idigaliya a nɛgiĩ, Lawa a min Hanan a nɛgiĩn kion nɛ kɛ nɛ. Bɛa kion nɛ lɛ n kiãn kion genli, Salumu a nɛgiĩ Maseya a kion nɛ kɛ lalan, ke Lawa a kion a wɔ ǹ kiɛnlɛ lɛduĩ. 5Zeremii mànan kaa tán piɛ̃-n ka duvɛ̃ nɛ, ka paanan nɛ Rekabu a tanlɛ minin lɛn yɔrɔ-a. Á tɔn pɛ ǹ nɛ: «Ka duvɛ̃ boɛɛn mi!» 6Sɛnɛ, ǹ ná a lɛ si: «Wɔ a duvɛ̃ mii wa. A giala, wɔ digolo Zonaadaabu ke Rekabu a nɛgiĩ lɛa, bɛ na á n gɔn waa wɔ-n kɛnɛn:
Ka nyan duvɛ̃ mi duduu wa,
ka dinin ni, ka kaa nɛnyaanan nɛ.
7Ka nyan kion dɔ wa,
ka nyan tán kɔsɔ wa.
Ka nyan *rezɛ̃ da zumu wa,
bɛ kɔn nyan goã ka lon wa.
Sɛnɛ, ka ǹ die giɛ̃ zìã kionən ne miɛ̃ duduu.
Ka bɛ-n kəni, ka á re nyin sasa
yii gána kɛ nɛ,
ka bɛ́ tiibaa nɛ ǹ mɛn lɛ nɛ pelo.
8Wɔ digolo Zonaadaabu boo mɛn tumaa pɛ wɔ nɛ, wɔ n wɔ́ kɔ bɛ lɛ lɛ. Wɔa duvɛ̃ mii duduu wa, wɔa lɔn nɛ, wɔa nɛgiĩn ni ka wɔa nɛlɔn nɛ. 9Wɔ a kion doe wɔ giã-n wa. Wɔ a rezɛ̃ wuru boe wa, wɔ a tán kɔsɛ wa. 10Sɛnɛ, wɔ n giɛ̃ zìã kionən ne. Wɔ digolo Zonaadaabu nə n gɔn waa wɔ nɛ ka boo mɛn tumaa nɛ, wɔ n wɔ́ kɔ bɛn lɛ. 11Sɛnɛ, Baabiloniin kii Nebukadenezɔɔrɔ bɛ́ á yoo gána lɛ gialaa, wɔ́ taasiɛ wɔ kɛnɛn: Á soɛ wɔ ganaa wɔ wo Zeruzalɛmu màn mɛn bɛ́ toɛ wɔ kanbaa *Baabilonii gána a sɔraasin laanka Siirii gána wɔn ganaa. Sisia, wɔ n giã-n kiwi lɛ gɔ́ɔ̃ nɛ.»
12Dɛnaa Lawa tɔn boon kɛn da Zeremii ni: 13– Kanna, boo da Zudaa laanka Zeruzalɛmu minin manɛ, n pɛ ǹ nɛ: «Sisia kəni, ka á re lɛ koe doroo kɛ ganaa, ka n too kɔ maa boon li?» Dɛnaa Lawa a da ǹ boo ne. 14Rekabu a nɛgiĩ Zonaadaabu pɛ a nɛnyaanan manɛ mà ǹ baran duvɛ̃ mi wa. Rekabu tɔrɔn lɛn nə́ bɛa boo lɛ si, ǹ duvɛ̃ mi wa, a da pelo yaa. A giala, maǹ nə́ ǹ digolo bɔlɔ si. Sɛnɛ, biikoo tumaa li, masɛ Dɛnaa Lawa boo da ka nɛ, sɛnɛ, ka n too kɔ ma lon wa. 15Biikoo tumaa li, má maa dí-nyalin maa Lawa a boo gii-dalin dia ka la. Kɔn kio ganaa, maǹ nə́ goã pii ka nɛ: «Didie tumaa na a giã ǹ gɔn baraa kaa. Ka sii zɛnaa a yɔrɔ li. Ka nyan kɔ dì kɔsɔn lɛ ka ǹ guguru kɔ wa. Ma gána mɛn kɔ ka laanka ka digolon la, ka á re boe la ka giã bɛ-n kəni.» Sɛnɛ, ka n too da wa, ka n too kɔ ma lon wa. 16Rekabu tɔrɔn sɛn nə kɔ ǹ digolo Zonaadaabu a gɔn waa lɛ. Sɛnɛ, kasɛn Zudaa minin, ka n too kɔ ma lon wa!
17Zeremii pɛ doo: – Bɛ lɛ nɛ, Dɛnaa Lawa Pàãyiidɛnaa, Izirayeli a Lawa á kɛ pii: «Zudaa minin ka Zeruzalɛmu minin, ma goã má koe mɛn boo da, man die bɛ lɛ boe ka ganaa. A giala, má boo da ka nɛ, sɛnɛ ka n too kɔ ma lon wa. Ma lɛ dia ka la, sɛnɛ ka n nyəə wa.» 18Bɛ kio, Zeremii pɛ Rekabu tɔrɔn lɛn manɛ: – Dɛnaa Lawa Pàãyiidɛnaa, Izirayeli a Lawa n kɛ pii: «Ká kɔ ka digolo Zonaadaabu a gɔn waa lɛ. A boo mɛn tumaa pɛ ka nɛ, ka kɔ ǹ tumaa lɛ. 19Á bǐɛ̃ kɔ, bɛ lɛ taman yii, Dɛnaa Lawa Pàãyiidɛnaa, Izirayeli a Lawa n kɛ pii: Min tá re yii Rekabu a nɛgiĩ Zonaadaabu a sumu-n duduu, a dí nya ma yɔrɔ-a lɛawaa tumaa li.»
Currently Selected:
Zer 35: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
