Zer 28
28
Zeremii laanka Lawa a boo gii-dali Anania
1 #
Kiin2 24.18-20; KZS2 36.11-13 Ǹ kɔn pinaa, a din lɛ̀ lɛ ganaa, Zudaan kii Sedekiasi a kiibaa lɛ̀ siibaa ǹ wɔ a mui soorobaa ǹ wɔ li, Azuuru a nɛgiĩ Anania ke boe Gabawɔ̃, bɛ goã Lawa a kion. Á boo da ka Zeremii ni Lawa a wúlu-bɔlen laanka zaman tumaa yɔrɔ-a. Á pɛ: 2– Dɛnaa Lawa Pàãyiidɛnaa Izirayeli a Lawa n kɛ pii: «*Baabiloniin kii a pàã ke ka wìi li ka zǔu bɛ́ lɔn, man die bɛ yiɛ. 3Baabiloniin kii Nebukadenezɔɔrɔ mànan mɛnɛn goa Lawa a kion á woo ǹ ne Baabilonii, kànaa ka lɛ̀ paa ka te, ma á re wusii ma da ka bɛa mànan lɛn nɛ kànaa. 4A Zozakimu a nɛgiĩ Zudaan kii Yekonia laanka min mɛnɛn tumaa goa á woo ǹ ne Baabilonii, ma á re wusii ma da ǹ nɛ kànaa. Baabiloniin kii a pàã ke ka wìi li ka zǔu bɛ́ lɔn, ma á re bɛ yiɛ ma bɔ ka bɔlɔ-a. Masɛ Dɛnaa Lawa a da ǹ boo ne.»
5Lawa a boo gii-dali Zeremii Lawa a boo gii-dali Anania lɛ si kɛnɛn Lawa a wúlu-bɔlen yɔrɔ-a ka zaman lɛ tumaa nɛ Lawa a kion á pɛ: 6– Hiĩ, a n zɛnaa miɛ̃! N boo mɛn da sisia, Dɛnaa Lawa die a bɛ zɛnaa! Ǹ mànan mɛnɛn tumaa goa Lawa a kion ǹ nə́ woo ǹ ne Baabilonii, a wusoo a da ka bɛn nɛ, ka goa-wolen kɛn tumaa nɛ! 7Sɛnɛ, n too kɔ maa boo kɛ li doɛ̃ má n die diɛ n nɛ kɔnlɛ ka zaman kɛ nɛ: 8«Lawa a boo gii-dalin nə́ goã ǹ tan haalɛ bibi n laanka masɛ nyɛɛnɛ. Ǹ nə́ boo da gána gigiã wɔ paǹ li ka tɔrɔ yii guguru-an nɛ. Ǹ nə́ boo da ǹ nɛ zia wɔ paǹ li, koe ne ka piɛ̃ busu ni. 9Sɛnɛ, bɛ̀ Lawa a boo gii-dali á là nyantoro boo diɛ, maǹ siɛ lɔn ǹ dɔ̃ mà Lawa na á dia? Biikoo mɛn li bɛ̀ a da ǹ boon lɛn nə́ n zɛnaa, maǹ die doɛ̃ bɛa waáraa.» 10Zǔu mɛn lɛ bɛ́ Lawa a boo gii-dali Zeremii bɔlɔ-a, Lawa a boo gii-dali Anania bɛ si á yiɛ. 11Bɛ kio, á pɛ zaman tumaa yɔrɔ-a mà Dɛnaa Lawa n kɛ pii: «Kànaa ka lɛ̀ paa ka te, Baabiloniin kii Nebukadenezɔɔrɔ a pàã ke tɔrɔn tumaa wìi li ka zǔu bɛ́ lɔn, man die bɛ yiɛ kɛnɛn.»
Bɛ kio, Lawa a boo gii-dali Zeremii kiɛ̃.
12Zǔu mɛn goã Lawa a boo gii-dali Zeremii bɔlɔ-a, Lawa a boo gii-dali Anania bɛ́ á bɛ yiɛ, Dɛnaa Lawa boo da ka Zeremii ni á pɛ-n kɛnɛn: 13– Wo pɛ Anania nɛ mà Dɛnaa Lawa n kɛ pii: «Zǔu gɔndɛnaa ke ń yiɛ, ń tá re zǔu fɔlɔdɛnaa diɛ a bǎã nɛ!» 14Dɛnaa Lawa Pàãyiidɛnaa Izirayeli a Lawa n kɛ pii: «Man die zǔu fɔlɔdɛnaa kiɛ kanaa a tɔrɔn tumaa wìi li. Ǹ tumaa á re goɛ̃ Baabiloniin kii Nebukadenezɔɔrɔ a pàã giulun, ǹ dí nya nɛ. Haalɛ gòon mànan dinin, man die ǹ kiɛ a pàã giulun.»
15Lawa a boo gii-dali Zeremii wusoo doo á pɛ Lawa a boo gii-dali Anania-n kɛnɛn: – Anania, n too kɔ taãn nɛ! Soɛ boon manɛ n tá zaman lɛ foo taɛ̃ nɛ. Dɛnaa Lawa bie á n dia wa. 16Bɛ lɛ nɛ, Dɛnaa Lawa á kɛ pii: «Man die n lui ma n bɔ tán la. N tá re giɛ̃ miɛ̃la a lɛ̀ kɛ lɛ nɛ, a giala, ń zaman lɛ da gòãn dii ganaa Dɛnaa Lawa-a.» 17Lawa a boo gii-dali Anania gã bɛa lɛ̀ lɛ a mui sɔbaabaa ǹ wɔ li.
Currently Selected:
Zer 28: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
