SYB 5
5
Deboraa a loe
1Bɛa pinaa lɛ nɛ, Deboraa laanka Abinoamu a nɛgiĩ Baraki loe lɔ kɛnɛn:
2Izirayeli bɛ́ woe zia la,
maǹ nə́ n là bɔ ǹ dinin-a,
zaman nə́ n din kɔ lenlen,
ka bɛa barka da Dɛnaa Lawa nɛ.
3Kiin lɛn, ka n too kɔ,
goledɛnan, ka n too kɔ!
Man giɛ li mà loe lɔ,
ma Dɛnaa Lawa tɔ bɔ nɛ.
Man giɛ li ma
Dɛnaa Lawa laakalaa,
Izirayeli minin Lawa lɛ.
4Dɛnaa Lawa,
n bɛ́ ń bɔ Edɔmu gána nɛ ń daa,
n bɛ́ ń gisĩ ń nə n bɔ Seyiiri
kele kɛ la,
tán bìn da, mu bɔ lon á kaa,
la bɔ labaran nɛ á kaa.
5 #
BBN 19.18
Kelen nə́ bɔ ǹ nə́ kaa
Dɛnaa Lawa yɔrɔ-a,
Sinayii kele kɛ lɛ bɔ
á mɛnaa Dɛnaa Lawa yɔrɔ-a,
Izirayeli minin Lawa lɛ.
6Anaati a nɛgiĩ Sangaara
a biikoo li,
Zayeli a biikoo li,
minin nə́ zii tɔ we lɛ da,
zii tɔ-wɔlen man zii lɛ boe
bɛ̀ ǹ tɔn kiɛ̃.
7Minin nə́ baa si ǹ nə́
ǹ kiwin toa,
Izirayeli gána nɛ, ǹ nə́ kiwin toa.
Yǎa ma din Deboraa a yoo ke,
yǎa ma din a yoo ke,
ka Izirayeli a náa bɛ́ lɔn.
8Maǹ nə́ goã lawa tiin boe,
bɛ lɛ nɛ, zia goã yui ǹ ganaa.
Izirayeli giĩ duu pusi bii,
á kaka n goóro laanka sɛmiɛ̃
yɛ ǹ gɔn.
9Maa taasiɛ n kun ka
Izirayeli minin kɛn nɛ,
ka min mɛnɛn dɔn bɛ́ zaman
lɛ bii,
ǹ nə́ n dinin kɔ.
Ka barka da Dɛnaa Lawa nɛ.
10Kasɛn mɛnɛn bɛ́ ká dii
dundun dan fufun la,
kasɛn mɛnɛn bɛ́ giã-n tán
mɔnaa sonboren la,
kasɛn mɛnɛn dɔn bɛ́ zii tɔ we,
ka n taasɛ.
11Tɔɔn-lɛduə̃lin bɛ́ ǹ tɔɔn goe
mu ni,
ǹ nə́ goã Dɛnaa Lawa a
sii sonboren kɛn laakalɛɛ,
a sii sonboren mɛnɛn
zɛnaa Izirayeli gána nɛ,
ka a din pàã nɛ.
Bɛ lɛ n ke,
Dɛnaa Lawa a minin nə́
woo kiwi a zaman paã ǹ bǎã nɛ.
12Yoo, Deboraa yoo!
Yoo, yoo n loe da a nɛ.
Abinoamu a nɛgiĩ yoo,
yoo Baraki, n nə n minin waa,
n nə ǹ bɔ bɛ̀rɛbaa nɛ.
13Min mɛnɛn nə goã,
bɛn nə́ woo n sɔkɔn goledɛnan li.
Dɛnaa Lawa a zaman kɛ́ daa
kun ma nɛ,
min kakan kɛn bii.
14Efrayimu tɔrɔn lɛn giala
basa n boe Amalɛki.
Bɛnzamɛn tɔrɔn nə́ mɛ ǹ kio,
kun ka ǹ zia-baalin kɛn nɛ.
Goledɛnan nə́ bɔ
Makiiri tɔrɔn bii ǹ nə́ daa.
Zia mìilandɛnan nə́ bɔ
Zabulɔn tɔrɔn bii ǹ nə́ daa.
15Isakaara tɔrɔn goledɛnan
man kun ka Deboraa nɛ.
Isakaara tɔrɔn man kun ka Baraki ni.
Ǹ nə́ bɔ ǹ nə́ mɛ a kio
nyankɔrɔ basa kɛ nɛ.
Sɛnɛ, Urubɛn a tanlɛ minin kɛn
man nə́ goã boo mɔnɛɛ kooro.
16Wàa na á baa ká woo
golee tɔɔn zàã li,
ka tá n too koe tɔɔn-lɛduə̃lin
lɛn li,
ǹ tɔɔn bíi we.
Urubɛn a tanlɛ minin kɛn man
nə́ goã boo mɔnɛɛ kooro.
17Galaati tɔrɔn nə́ giã
Zurdɛ̃ tà kio.
Dan tɔrɔn lɛn,
wàa na á baa ká giã kaa mu
la ǹ goon ne?
Asɛɛrɛ tɔrɔn nə́ giã yìsi mu lɛ-a,
ǹ nə́ giã ǹ goon golee ǹ bǎã nɛ.
18Sɛnɛ, Zabulɔn tɔrɔn kɛn
man minin lɛa,
ǹ nə́ n la bɔ ǹ dinin ganaa,
ǹ nə́ n dinin kɔ gɛ̀ la.
A din goon ne ka
Nɛfutalii tɔrɔn kɛn dɔn nɛ,
ziabaa ǹ bǎã nɛ.
19Kiin nə́ daa zia baa,
Kanaan kii nə́ zia baa
Tanaaki kiwi,
Megidoo tà lɛ-a.
Haalɛ wɔrɔ goone,
ǹ saa zia la ǹ nə́ daa-n wa.
20Lon a leeren dɔn nə́ zia baa.
Ǹ nə́ n toa ǹ kiɛ̃ ǹ zii la ǹ nə́
zia baa Sizeraa ganaa.
21Kisɔn tà mu nə́ ǹ goa á kiɛ̃
ǹ nɛ,
lɛlɛ lɛlɛ tà, Kisɔn tà mu lɛ.
Maǹ tɔ we sisia,
nyɛ́ɛ ná a ba ma ganaa wa.
22Á ke sùin gòã wuu á boe,
zia-baalin man baa la, baa la.
23Dɛnaa Lawa a lon a
dia dí-a wole a boo ne:
Ka lɛn baraa bíi Merozi kiwi kɛ li,
ka lɛn baraa bíi a kiwi minin
kɛn li.
A giala, ǹ da n dɔ Dɛnaa Lawa lɛ wa,
ǹ da n dɔ Dɛnaa Lawa laanka
a zia mìilandɛnan kɛn lɛ wa.
24Lɔn bii,
Lawa die a barka da Kenii
tɔrɔ Ebɛɛrɛ a lɔ Zayeli ganaa.
Mɔnaa kion lɔn tumaa bii,
Lawa die a barka da asɛ
lɛ ganaa.
25Sizeraa bɛ́ mà a mu kɔ,
asɛ na á bɔ̀nyaa kɔ la,
á nàari kɔ la min dadaran mu
mi ǹ màn nɛ.
26Zayeli nə́ n gɔn dia á kiɛ saa,
á dí-nyalin tutoarɛ dɔ saa
a gusin ni.
Á Sizeraa dɛ nɛ, á ná a mìi yu.
Á yɔyɔrɛ, á ná a paragiala fɔ̃.
27Á n munu tán Zayeli giulun,
á mɛnaa, á n lɛ bɔ tán,
á mɛnaa á n lɛ bɔ tán a giulun.
A mɛnaa bǎã mɛn nɛ,
á n munu tán a giulun walan,
á gã.
28A nə n toɛ kion n yii koe,
Sizeraa a náa nə n toɛ kion
n yii koe.
«Wàa na á baa a ziabaa ǹ
wotoro kɛ́ nyɔɔbaa kio pelo,
wàa na á baa a ziabaa ǹ
wotoron lɛn tá nyantoto kɛnɛn pelo?»
29A lɔn lɛn sii-dɔ̃li goon ná
a lɛ si.
A na á goã bɛ lɛ taasɛ a din
gɔ́ɔ̃ nɛ á n pii:
30Kɔntan, maǹ màn yii zia kɛ la,
ǹ nə́ gii kɔn:
Nɛniɛ goon hinlaa paa
zia-baali goon wɔ lɛa.
Ǹ nə́ mɔnaa nyaǹ dɛnaa si zia la,
Sizeraa wɔ lɛa,
mɔnaa-wɔrɛɛ lɛa nyaǹ
ná a ganaa,
mɔnaa-wɔrɛɛ màn paa lɛa,
gɔ̀lɔ̀ wɔ lɛa.
31Dɛnaa Lawa,
toa ǹ zɔ́ɔn lɛn tumaa gã ka
Sizeraa wɔ kɛ bɛ́ lɔn.
Sɛnɛ, toa ǹ giaáran lɛn tumaa
goã ka wasa bɛ́ lɔn
ka zereen a bɔ tán waáraa.
Bɛ lɛ n ke gána lɛ goã susui la
lɛ̀ pusi gɔ́ɔ̃ nɛ.
Currently Selected:
SYB 5: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.