SYB 16

Sansɔn sii mɛn zɛnaa Gaazaa

1Sansɔn woo Gaazaa kiwi, á lɔ kɔrɔ kɔn yɛ walan, á woo ǹ dɔ li. 2Ǹ nə́ pɛ Gaazaa minin manɛ mà Sansɔn daa kànaa. Ǹ nə́ woo wɔlɔ lɛnpɛnɛ, ǹ nə́ kuu kɔ a ganaa kiwi lɛ a kiɛnlɛ-a, tèlò tumu gɔ́ɔ̃ nɛ. Tèlò tumu lɛ gɔ́ɔ̃ nɛ, ǹ nə́ giã kiĩni. Maǹ nə́ goã pii ǹ dinin gɔ́ɔ̃ nɛ mà ǹsɛn man die n yii diɛ, bɛ̀ wɔlɔ fúlu, ǹsɛn nə tɔn dɛ. 3Sansɔn sɛ́ waa tán, yǎa làan kɔ. Á yoo làan nɛ, á kiwi lɛ a kiɛnlɛ-a ǹ goo kũ á woɛ̃, kɔnlɛ ka a gɔn màn paa kɛ nɛ, ka gɔn kɛ dɔ nɛ, ǹ nə́ diɛ a kii la. Á ǹ tumaa kaa a wìi li, á woo ǹ ne yǎa kele kɛ mìi ni, Ebrɔn kiwi yɔrɔ-a.

Sansɔn laanka Delilaa

4Bɛ kio, Sansɔn lɔ goon narɛ Sorɛki kiwi a nyankɔrɔ basa kɛ nɛ. Lɔ lɛ tɔ n Delilaa. 5Filisiti minin kiin nə́ woo lɔ lɛ li, ǹ nə́ pɛ nɛ: «N da Sansɔn gɔ́ɔ̃ li n ga a ganaa, wàa-n toɛ a pàã n gole kɛnɛn, wɔsɛn bɛ́ re boe la lɔn wɔ kũ wɔ yii, wɔ a pàã nya, ga bɛ li. Wɔsɛn gogoonmaa tá re wɔrɔ duu goon ka paabiɛ koe n la.» 6Delilaa tɔ́n pɛ Sansɔn nɛ: «Màn mɛn toa n pàã ń gole kɛnɛn, min doamaa bɛ́ nɛ a n yii lɔn n pàã tɔn nya, bǐɛ̃ kɔ n bɛ pɛ masɛ nɛ.» 7Sansɔn pɛ nɛ: «Bɛ̀ ǹ nə́ ma yii ka sà biɛ buruu sɔbaa nɛ, ǹ mɛnɛn bɛ́ ǹ tɔn laa wa, ma pàã n nyɛɛ, man bɔyaa man baa ka minbuiin nɛ gialakunun kɛn bɛ́ lɔn.» 8Filisiti minin kiin nə́ daa sà biɛ buruu sɔbaa lɛ kɔ Delilaa la, ǹ mɛnɛn bɛ́ ǹ tɔn laa wa. Delilaa Sansɔn yii ka bɛa biɛn lɛn nɛ. 9Bɛa biikoo li, bɛ̀ minin lɛn tá naanɛ a kion. Á n lɛ dɛ Sansɔn ganaa: «Sansɔn wee, Filisiti minin lɛn tá die n gialaa!»

Sansɔn sà biɛn lɛn na, ka gɛ̀sɛ nɛ goon bɛ́ niɛ lɔn, bɛ̀ ǹ nə́ bɔ-n tɛ li. Sɛnɛ, min Sansɔn a pàã lɛ a bɔ ǹ bǎã yɛ wa.

10Delilaa tɔ́n pɛ Sansɔn nɛ: «N nə n sàn kɔ ka masɛ nɛ, ń soɛn bɔbɔ ma nɛ. Ǹ doamaa bɛ́ ǹ nə n yii lɔn, bɛ pɛ masɛ-n sisia kəni.» 11Sansɔn pɛ nɛ: «Biɛ diin mɛnɛn bɛ́ ǹ tɔn dí kɔn nya ǹ nɛ wa, bɛ̀ ǹ nə́ masɛ yii ka bɛn nɛ kakaka, ma pàã n nyɛɛ, man bɔyaa man baa ka minbuiin nɛ gialakunun kɛn bɛ́ lɔn.» 12Delilaa biɛ diin goa kəni, á Sansɔn yii ni. Bɛ kio, á n lɛ dɛ Sansɔn ganaa: «Sansɔn wee, Filisiti minin lɛn tá die n gialaa!» Bɛa biikoo li, bɛ̀ minin lɛn tá naa-n kion. Sɛnɛ, biɛn mɛnɛn lɛn nə goã Sansɔn gɔnɔn ganaa, Sansɔn bɛn na, ka n pɛ mà gɛ̀sɛ nɛ.

13Delilaa wusoo á pɛ Sansɔn nɛ: «Haalɛ tɔn pelo, ma nə n sàn kɔ ka masɛ nɛ, ń soɛn bɔbɔ ma nɛ. Ǹ doamaa bɛ́ nɛ ǹ nə n yii ka màn mɛn nɛ, bɛ pɛ masɛ nɛ.» Sansɔn tɔ́n pɛ nɛ: «Bɛ̀ ń mɔnaa gɔn da kun ka masɛ mìi ka kɛ nɛ, ń tã wɔlɔ sɔbaa, ń doa kɔn ka kɔ̀rɔ gɔn nɛ, ma pàã n nyɛɛ, man bɔyaa man baa ka minbuiin nɛ gialakunun kɛn bɛ́ lɔn.»

14Delilaa toa Sansɔn nyuù wɔ. Á ná a mìi ka lɛ kũ á tã wɔlɔ sɔbaa, kun ka mɔnaa gɔn lɛ nɛ, á doa kɔ̀rɔ gɔn lɛ ganaa, á tɔ́n nə n lɛ dɛ: «Sansɔn wee, Filisiti minin lɛn tá die n gialaa!» Sansɔn yoo á n bɔ a nyuù lɛ nɛ, á kɔ̀rɔ tã ǹ gɔn lɛ laanka mɔnaa gɔn lɛ woɛ̃.

15Delilaa tɔ́n pɛ Sansɔn nɛ: «A n siɛ lɔn ń pii mà n tá ma narɛ, a da yǎa n taasiɛ ba kun ka masɛ wɔ-n wa. N gunyin sɔɔ n ke sàn koe ka masɛ nɛ. Màn mɛn toa n pàã n gole kɛnɛn, n tɔn bɛ pɛ ma-n wa.»

16A bɛ́ n laɛ Sansɔn ganaa, á n nɔmiɛ̃ ka a boon lɛn nɛ baraabaraa, bɛ́ la Sansɔn yii ni ka a daa a gã. 17Sansɔn nɔmaa á n lɛ bũ, á n gɔ́ɔ̃ tumaa pɛ nɛ: «Kùn bin bɔ ma mìi-n wa, a giala, maǹ nə́ masɛ kɔ Lawa la, bɛ̀ má bɛ́ tɔn ma dan gɔ́ɔ̃-n dinin. Bɛ̀ ǹ nə́ ma mìi kɛ kɔɔ̃, masɛ a kakabaa kɛ nə n sii ma la lenlen, ma pàã n nyɛɛ, man bɔyaa man baa ka minbuiin nɛ gialakunun kɛn bɛ́ lɔn.»

18Delilaa bɛ́ á dɔ̃ mà Sansɔn nə́ n gɔ́ɔ̃ tumaa pɛ asɛ nɛ, á minin dia, mà ǹ wo pɛ Filisiti minin kiin lɛn manɛ, mà ǹ da kanna kəni, mà á n gɔ́ɔ̃ tumaa pɛ asɛ nɛ. Filisiti minin kiin lɛn nə́ woo Delilaa a piɛ ka ǹ lɛ kɔ ǹ wɔrɔ lɛ nɛ ǹ gɔn. 19Delilaa toa Sansɔn nyuù wɔ tán a gòã la. Á lɛ dia giĩ goon la, bɛ ná a mìi tiɛ̃ sɔbaa lɛ kɔɔ̃. Á ná a giala kɔ á pàãwɛɛnaa baa, a kakabaa nə́ n si la lenlen. 20Bɛ kio, Delilaa nə́ n lɛ dɛ á pɛ: «Sansɔn wee, Filisiti minin lɛn tá die n gialaa!» Sansɔn yoo á n bɔ a nyuù lɛ nɛ, á n taasɛ mà asɛ á re n din boe a nɛ, a n din si ka lɛlɛ wɔn kɛn lɛn bɛ́ lɔn. Sɛnɛ, a goã doɛ̃, mà Dɛnaa Lawa nə́ n bɔ á n bɔ li lenlen wa. 21Filisiti minin lɛn nə́ kũ, ǹ ná a yii nànan pupuru. Bɛ kio, ǹ nə́ woo ne Gaazaa kiwi, ǹ nə́ yii ka fɔlɔ biɛ nàn paa nɛ, ǹ nə́ da màn lɔ ganaa gii la, kòso nɛn kion. 22Sɛnɛ, ǹ bɛ́ ǹ ná a mìi lɛ kɔɔ̃, a mìi ka lɛ na á wusoo, á ná a giala kɔ á n piɛ̃.

Sansɔn a gɛ̀ dòo bɔ laanka a gɛ̀

23Ǹ kɔn pinaa, Filisiti minin kiin lɛn nə́ n lɛ sɔkɔn. Ǹ dì Dagɔn kɛ lɛ ǹ lawa lɛa, ǹ nə́ *wúlu màn gole kɔ bɛ la, ǹ nə́ n nyɛnyɛɛ. N nə́ goã loe loe kɛnɛn:

wɔa lawa na á wɔa zɔ́ɔ Sansɔn lɛ wɔ wɔ gɔn.

24Zaman lɛ bɛ́ á Sansɔn yɛ, ǹ nə́ loe lɔ, ǹ nə́ ǹ lawa lɛ tɔ bɔ nɛ, bɛ̀ ǹ tá pii:

Wɔa lawa na á wɔa zɔ́ɔ lɛ wɔ wɔ gɔn,

min mɛn bɛ́ á goã wɔa gána lɛ ziziɛ̃,

á goã wɔa min gigiã dii.

25Ǹ foo bɛ́ kɔɔ̃nɛ, ǹ nə́ pɛ: «Ka lɛ dia Sansɔn la, a da yaa da wɔ ganaa.» Ǹ nə́ min dia, á woo Sansɔn bɔ kòso kion lɛ nɛ. Sansɔn yaa da ǹ sii zɛnaa ǹ yɔrɔ-a. Bɛ kio, ǹ nə́ Sansɔn kũ, ǹ nə́ da kion lɛ a bìbìn bii. 26Nɛginin mɛn bɛ́ Sansɔn kuĩ a gɔn-a, Sansɔn pɛ bɛ nɛ: «Mɛ ma nyɛɛnɛ, bìbìn mɛnɛn bɛ́ kion lɛ guĩ, n ma gɔn kũ n da bɛn ganaa, màn mɛn bɛ́ toɛ, man telə́ ǹ ganaa.»

27Kion lɛ na á goã piɛ̃-n ka giĩn laanka lɔn nɛ. Filisiti minin kiin lɛn tumaa goã walan. Giĩn laanka lɔn mɛnɛn nə goã kala la, bɛn nə́ dɔ min duu sɔɔ kɛ miã, ǹ mɛnɛn lɛn nə goã, ǹ nə́ ga Sansɔn a yaa da minin ganaa ǹ sii lɛn ganaa. 28Sansɔn Dɛnaa Lawa nyankɔ á pɛ: «Dɛnaa Lawa ganaa, masɛ nə n nyankoe. N din Lawa nə n yiri koa masɛ li. E Lawa! Wusoo n pàã kɔ ma la, haalɛ ta sisia kɛ dinsɔɔ̃ nɛ, ma boo la, ma maa gɛ̀ dòo bɔ Filisiti minin lɛn ganaa goon lɛa, ma yii nàn paa kɛa purii taman yii.»

29Bɛ kio, bìbì màn paa mɛn bɛ́ bii kion lɛ guĩ, Sansɔn bɛn kũ, a gusin nə́ goon ganaa, a gɔsɛ n goon ganaa, á n dii bɛn ganaa. 30Sansɔn tɔn nə n lɛ dɛ á pɛ: «Masɛ dɔ din gã kun ka Filisiti minin kɛn nɛ.»

Bɛ kio, á bìbìn lɛn nyanaa ka a pàã tumaa nɛ, á kion lɛ wuru á kɔ Filisiti kiin lɛn lɛ, ka min mɛn tumaa dɔ bɛ́ á goã walan. A gere mɛn bɔ a din a gɛ̀ kɛ gɔ́ɔ̃ nɛ, bɛn nə́ mɔnaa ǹ nə́ la minin kɛn manɛ á ǹ dɛ, bɛ̀ a yii bɛ́ koo. 31Ǹ dɔɔ̃nɔn laanka a di kion minin tumaa daa a gere saa. Ǹ nə́ woo ne, ǹ nə́ bĩ ǹ di Manoa a yala kɛ nɛ, Soreya kiwi laanka Ɛsitawɔli kiwi biin ni.

Sansɔn na á goã á Izirayeli minin lɛn sii yɔrɔ bɔ lɛ̀ fuə gɔ́ɔ̃ nɛ.

Currently Selected:

SYB 16: SBPE2011

Highlight

Copy

Compare