SYB 14

Sansɔn a kɔn-wɔ

1Ǹ kɔn pinaa, Sansɔn woo Timnaa kiwi, á nɛniɛ goon yɛ kun ka Filisiti minin kɛn nɛnɛn nɛ walan. 2A bɛ́ á n bɔyaa á woo piɛ, á ná a boo yɔrɔ pɛ ǹ di laanka ǹ dan nɛ mà asɛ nɛniɛ goon yɛ kun ka Filisiti nɛnɛn nɛ Timnaa kiwi. Mà ǹ wo a sii yɔrɔ bɔ, ǹ kɔ asɛ la lɔ lɛa. 3Ǹ di laanka ǹ dan tɔ́n pɛ nɛ: «Lɔ na a ba wɔ dɔɔ̃nɔn nɛlɔn kɛn laanka ma tɔrɔn kɛn bii wa, yǎa n woe lɔ siɛ Filisiti min soroman kɛn li?» Sɛnɛ, Sansɔn pɛ ǹ di ni mà a bɛ lɛ saa a kɔ asɛ la, a giala, mà bɛ lɛ sii n kɔɔ̃n asɛ ganaa. 4Ǹ di laanka ǹ dan goã doɛ̃, mà bɛa sii lɛ n boe Dɛnaa Lawa li wa. A giala, Dɛnaa Lawa na á goã giɛ gɔn kũ ǹ bǎã li, a yoo Filisiti minin lɛn gialaa. Bɛa biikoo li, Filisiti minin lɛn man nə́ goã Izirayeli minin lɛn mìi la.

5Sansɔn yoo kun ka ǹ di laanka ǹ dan nɛ, ǹ nə́ woo Timnaa kiwi. Ǹ bɛ́ re doe Timnaa *rezɛ̃ da wurun kɛn li, bɛ̀ yàra ten bɛ́ die a ganaa, á n wɔɔsaa we. 6Dɛnaa Lawa Yiri wɔ Sansɔn nɛ. Á yàra lɛ kũ á woɛ̃ kɔn paa ka ǹ bɛ́ bòe banɛɛ woɛ̃ kɔn lɔn, a da yaa màn kɔn ba a gɔn wa. Sɛnɛ, a sii mɛn zɛnaa, a pɛ ǹ di laanka ǹ dan nɛ wa. 7Á woo Timnaa, á boo da bɛa lɔ lɛ nɛ. Lɔ lɛ sii kɔɔ̃n kɔ Sansɔn ganaa.

8Lɛawaan kɔnɔn kiɛ̃ kio, á n bɔyaa, mà a n woe a lɔ lɛ siɛ. Ǹ bɛ́ zii la, á kanaa mà a n giɛ yàra gere lɛ ganaa, bɛ̀ zoo bɛ́ á kaa a nɛ, á nyɔɔ kɔ. 9Á ǹ kɔn bɔ a gɔn, a n bii bɛ̀ á n tɔ we. A bɛ́ á dɔ ǹ di laanka ǹ dan li, á ǹ kɔn kɔ ǹ la, ǹ nə́ bii. Sɛnɛ, á pɛ ǹ nɛ, mà asɛ na á zoo nyɔɔ lɛ bɔ yàra gere-n wa.

Sansɔn nyiǹ mɛn da Filisiti minin manɛ

10Sansɔn a díi woo lɔ lɛ li. Sansɔn kɔn wɔ ǹ màn-bii zɛnaa, a giala, tɔntɔraan man goɛ̃ bɛ̀ ǹ zɛnaa miɛ̃. 11Filisiti minin lɛn nə Sansɔn yɛ lɔn gɔrɔ, ǹ nə́ tɔntɔraa pɔsɔɔ bɔ, mà bɛn nə giã a li. 12Sansɔn pɛ bɛn manɛ: Man die nyiǹ diɛ ka nɛ. Kɔn wɔ ǹ zɔ́n kɛ lɛ a lɛawaa sɔbaa kɛ lɛ gɔ́ɔ̃ nɛ, bɛ̀ ká a binyəə yɛ ká pɛ masɛ nɛ, man die dɔnkɛ dadara pɔsɔɔ koe ka la, ka zɔ́n mɔnaa pɔsɔɔ nɛ. 13Sɛnɛ, bɛ̀ ka a boe la ka tá a binyəə pii ma-n wa, ka dinin man die dɔnkɛ dadara pɔsɔɔ laanka zɔ́n mɔnaa pɔsɔɔ koe ma la. Ǹ nə́ pɛ nɛ mà a na a nyiǹ lɛ da, ǹsɛn nə ma. 14Sansɔn tɔ́n pɛ ǹ nɛ:

«Màn-bii bɔ màn-biili gɔ́ɔ̃ nɛ,

màn kɔɔ̃n bɔ màn kaka gɔ́ɔ̃ nɛ.»

Á woo dɔ lɛawaa sɔɔ, bɛ̀ tɔntɔraan lɛn ba tɔn boe la, ǹ nə́ nyiǹ lɛ a binyəə yii ǹ nə́ pii wa. 15Sɛnɛ, a lɛawaa sɔbaabaa ǹ wɔ pinaa, ǹ nə́ pɛ Sansɔn a lɔ nɛ kɛnɛn: «N da ǹ zuũ lɛ gɔ́ɔ̃ li, màn mɛn bɛ́ toɛ, n nyiǹ lɛ a binyəə pɛ wɔsɛn manɛ. Bɛ̀ n zɛnaa miɛ̃ wa, wɔsɛn tá re tɛ diɛ n ganaa, n din laanka n di kion minin ni. Ka n ka lɛ dia wɔsɛn la, ka á wɔ gɔn yui hinlaa wàa nɛ?»

16Sansɔn a lɔ goã a gialaa ka wuu ni. A na á goã pii-n kɛnɛn: «Zɔ́ɔbaa dinsɔɔ̃ nə n gɔ́ɔ̃ nɛ masɛ wɔ paǹ li. N ba masɛ narɛ wa. Nyiǹ ke ń da ma tɔrɔ minin kɛn manɛ, n na a binyəə pɛ masɛ-n wa.» Sansɔn tɔ́n pɛ nɛ: «Ma a binyəə pɛ ma di laanka ma dan din ni wa, sanparɛ nsɛ?» 17Á wuu pɛ Sansɔn kio miɛ̃, zɔ́n lɛ a biikoo lɛawaa sɔbaa lɛ gɔ́ɔ̃ nɛ. A lɛawaa sɔbaabaa ǹ wɔ pinaa, Sansɔn nyiǹ lɛ a binyəə pɛ nɛ. A giala, lɔ lɛ nə́ n laa a ganaa á la yii ni. Lɔ lɛ nyiǹ lɛ a binyəə pɛ a tɔrɔ minin lɛn manɛ. 18A lɛawaa sɔbaabaa ǹ wɔ pinaa, wasa á pii mà a n die miɛ̃, kiwi minin lɛn nə́ pɛ Sansɔn nɛ kɛnɛn:

Wàa n kɔɔ̃nɛ á la zoo ne,

Wàa n kaka á la yàra nɛ?

Sansɔn tɔ́n pɛ ǹ nɛ: «Bɛ̀ ka bie ka ǹ da maa lɔ kɛ gɔ́ɔ̃ li wa, ka a re maa nyiǹ kɛa binyəə yii wa.» 19Bɛ kio, Dɛnaa Lawa Yiri wɔ Sansɔn nɛ. Sansɔn woo Asikalɔn kiwi, á bɛn min pɔsɔɔ dɛ, á ǹ mɔnaan waa á ǹ bɔ ǹ ganaa. Min mɛnɛn nə nyiǹ lɛ a binyəə pɛ, á mɔnaan lɛn kɔ bɛn la. Bɛ kio, á zii saa, á woo ǹ di a piɛ, a foo n yoo-n ka kurukuru. 20Ǹ ná a lɔ lɛ kɔ a tá-kun wole goon la, ǹ mɛn lɛ bɛ́ á ná a siére baa kɔn-wɔ lɛ gɔ́ɔ̃ nɛ.

Currently Selected:

SYB 14: SBPE2011

Highlight

Copy

Compare