Iza 3
3
Dɛnaa Lawa nə́ n bɔ Zudaa gána li
1Á ke, Dɛnaa Lawa
Pàãyiidɛnaa n die
Zeruzalɛmu laanka Zudaa a dɔmalɛ tumaa lɛ diɛ,
a ǹ màn-bii laanka ǹ mi ǹ mu tumaa gɔsɛ ǹ gɔn.
2Foo taãnaan laanka sɔraasin ni,
kiri-wɔlen laanka Lawa a boo gii-dalin ni,
wɔ-kulin ni ka min golen ne,
3sɔraasi posooro mìilandɛnaa nɛ,
ka kiãn nɛ,
yiri kɔ ma la wolen ne,
kɔ́lɔnbaalin ni,
ka dagòãdɛnan nɛ.
4Dɛnaa Lawa n pii:
«Man die nɛnyaanan koɛ
ǹ mìilandɛnan lɛa,
ǹ nə ǹ nyɛɛnaan bɔ,
a kɔnpɛ ka ǹ dinin giã ǹ gɔn nɛ.»
5Minin man die boe kɔn yii ni,
ǹ kakaarɛ kɔ kɔ ǹ ganaa.
Nɛ tenən man die yui
min zizin gialaa,
min kooron nə sìi da
min yii guguru-an ganaa.
6Min tá re ǹ dɔɔ̃n kuĩ
ǹ di a kion,
a pɛ nɛ:
«Mɔnaa bɛ́ nsɛ lon, wɔa kiã baa,
n giã kɛbɔlɔn kɛn mìi la!»
7Sɛnɛ, ǹ dɔɔ̃n lɛ á re a lɛ sii,
a pɛ nɛ:
«Maa boe sii kɔn la ma zɛnaa
kaa lɛa wa.
Maa kion, màn-bii banban,
mɔnaa banban.
Maa boe la ma kiã baa doɛ̃ wa.»
8Zeruzalɛmu kiwi mɛnaa,
Zudaa gána bɔ̀n baa.
A giala, maǹ nə́ n gòãn dii
Dɛnaa Lawa ganaa
ǹ da ǹ boon laanka
ǹ nya ǹ dín gɔ́ɔ̃ nɛ,
maǹ nə́ n gòãn dii a
gugurubaa ganaa.
9Ǹ yɔrɔ gɔ́ɔ̃ din nə
ǹ zɛnaa ǹ siin nyɛɛ.
Ǹ ba ǹ sii baraan duri wa,
maǹ nə ǹ pii ǹ lɛ-a
ka Sodɔmu minin wɔ bɛ́ lɔn.
Koe n ka kɛ nɛ,
maǹ bɔ̀n
yɔrɔ boe ǹ dinin wɔ lɛa.
10Ka pɛ kɛnɛn:
«Min pepere n yii-nyɛɛ la,
a giala,
á re a nya ǹ dí sonboren kɛn là yii.»
11Sɛnɛ, min baraan wɔ n ka bɔ̀n nɛ,
bɔ̀n woo bɔ̀n.
A giala, a baraa mɛn zɛnaa,
bɛ lɛ n die kuĩ a mìi ni.
12Dɛnaa Lawa n pii:
«Maa zaman,
min mɛnɛn bɛ́ n nɔmɛɛ,
nɛnyaanan manɛ.
Ǹ mìilandɛnan man lɔn lɛa.
Ee, maa zaman,
min mɛnɛn bɛ́ n nyɛɛnaan boe,
bɛn manə n yiri siɛ̃.
Maǹ nə n diɛ zii baraa la.»
Dɛnaa Lawa n kiri we Izirayeli a kiãn ganaa
13Dɛnaa Lawa yoo kiri wɔ taman yii,
a n yui,
die kiri we tɔrɔn ganaa.
14A n die kiri we
a zaman a min golen ganaa,
ka ǹ kiãn kɛn nɛ:
«Ka dinin lɛn man ka maa
*rezɛ̃ dan kɛn ziziɛ̃,
ka doobaan gɔn mànan koã,
ka kaa kionən pã nɛ.
15Ka n maa zaman nɔmɛɛ,
ka n pàã nyɛɛ doobaan nɛ.
Bɛ giala mà wàa kəni?»
Dɛnaa Lawa Pàãyiidɛnaa
a da ǹ boo ne.
Lawa n die Zeruzalɛmu lɔn gialaa
16Dɛnaa Lawa n pii:
«*Siɔn kiwi lɔn kɛn tá kɔɔ̃nɛ
ǹ dinin ganaa.
Maǹ nə n wìi dii ǹ nə́ tɔ we,
ǹ nə́ n yii boe minin li.
Maǹ nə n gòã siɛ gogoon,
ǹ gòã wìi ganaa ǹ zanan
kɛn wuu li.»
17Kanna kəni,
Dɛnaa á re kɔǹgɛ boe ǹ mìi-a,
ǹ goã baã gere-an lɛa.
18Bɛa pinaa lɛ nɛ, ǹ nyaǹ mànan kɛn, Dɛnaa á re bɛn woɛ a ǹ bɔ ǹ ganaa: Gòã ganaa ǹ zanan nɛ, giin ni, bɔlɔ-a ǹ giin ni mui nyin nə́ ǹ la, 19too ganaa ǹ kaaranan nɛ, zanan nɛ, lankanan nɛ, 20taparan nɛ, zɔrɔka bisin zɔzɔnɔn nɛ, maabɛlɛn tiɛ̃ nɛ, sɛ́wɔ nɛn nɛ, ka gɛ̀rɛsiɛ bɔ ǹ dagòãn nɛ, 21nyin gɔ́ɔ̃naa ǹ kaaranan laanka a zanan nɛ, 22zɔ́n mɔnaan nɛ, mɔnaa dadaran nɛ, pataran nɛ, takoo bɔnboɛɛnɛn nɛ, 23damalen ne, mɔnaa zɔrɔn nɛ, mìi ganaa ǹ mɔnaa gɔnɔn nɛ, ka yonyolon ne.
24Màn gìĩ kɔɔ̃n bǎã nɛ,
màn bɔnɛɛ gìĩ á re goɛ̃ a tan,
maabɛlɛ bǎã nɛ, biɛ nɛ,
mìi-tiɛ̃ sonbore bǎã nɛ,
mìi-koɛ̃ nɛ,
mɔnaa sonboren bǎã nɛ,
gɛ̀ koa ǹ mɔnaa nɛ.
Sìi n die siĩnbaa bǎã siɛ.
Zeruzalɛmu lɔn man giɔɔrɔn lɛa
25Zeruzalɛmu,
n giĩn tá re gɔya sa gɛ̀ we,
n sɔraasin tá re giɛ̃ zia la.
26Bɛa biikoo li kəni,
kiwi min tumaa á re gɛ̀ koɛ,
ǹ gini ka lɔ mɛn nə́ ke
giã-n tán furu-n,
a gɔn màn tumaa bɔ̀n baa.
Currently Selected:
Iza 3: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
