Iza 21
21
Baabilonii a nya
1Diə gole#21.1 Bɛ n Baabilonii gána boo diɛ. mɛn bɛ́ kunu yìsi mu ganaa, bɛa boo gii:
Zɔ́ɔ n boe diə gole ne.
Gána mɛn bɛ́ nyɛ́ɛ diɛ,
a n boe walan.
A n ka piɛ̃ gole bɛ́ lɔn,
boe Negɛvu gána nɛ.
2Dɛnaa Lawa n kaãbaa sii
nyɛɛ ma nɛ:
Giaára zizi nə́ n bɔyaa
á tenten baa,
ziziɛ̃ wole n ziziɛ̃ we
woe-n nyɛɛnɛ.
Elamu minin, ka yoo ǹ gialaa!
Mɛdi gána minin,
ka ǹ kiwi lɛ lɛnpɛnɛ!
Man die ginii kɛ tumaa lɛ kuri.
3Bɛ lɛ nɛ, ma kii á busi,
ma nɔmaa maa nɛ,
ka lɔ bɛ́ lɔn nɔɔrɔ koe.
Là paparɛɛ la ma yii ni
ma too a màn kɔn miɛ wa,
nyɛ́ɛ la ma yii ni
ma yii a màn kɔn yii wa.
4Ma yiri yoo,
nyɛ́ɛ n ma gɔ̀nɔn bìn diɛ.
Ma nə n yii diɛ wasamiɛ̃n la,
ma boo la man susu,
sɛnɛ, tèlò-n, nyɛ́ɛbaa n ma ganaa.
5Màn-bii nə́ n zɛnaa,
nyaǹ mɔnaan nə́ n naa tán,
minin man màn bii,
ǹ nə́ màn mii.
Bǎã goon ne, min nə́ n lɛ dɛ:
«Sɔraasi nyɛɛnaandɛnan lɛn,
ka yoo.
Ka kaa ziabaa ǹ mànan yɔrɔ bɔ!»
6Dɛnaa na á kɛ pɛ ma nɛ:
Woo, n wɔlɔ-lɛduə̃li koa.
Bɛ̀ á màn mɛn yɛ, á re bɛ pii.
7Bɛ̀ á sùi màn paa yɛ
ziabaa ǹ wotoro goon baɛ̃,
bɛ̀ á sùidɛnan yɛ dundunun la,
hinlaa nyɔɔmaan la,
a doamaa nɛ a yiri bɔ,
a yiri bɔ parsiini.
8Bǎã-lɛduə̃li lɛ paraa ka yàra
bɛ́ lɔn:
Mìinaa, man giã-n bǎã lɛduə̃
ǹ bǎã lɛ nɛ,
lɛawaa tumaa gɔ́ɔ̃ nɛ,
man bǎã lɛduə̃ ǹ bǎã lɛ nɛ
ka tèlò tumaa nɛ.
9 #
SNS 14.8; 18.2 Ka ga, min nə́ ke yii die:
A n giã-n ziabaa ǹ wotoro la,
sùi màn paa n baɛ̃.
A nə n lɛ dii á n pii:
«*Baabilonii mɛnaa!
Baabilonii mɛnaa!
A dì nyínin kɛn,
bɛn nə́ yɔyɔrɛ tán!»
10Maa zaman, ǹ nə nsɛ mɛn duwəə
ka n bɛ́ *belee duwii lɔn,
ma doroo mɛn yɛ boe
Dɛnaa Lawa Pàãyidɛnaa,
Izirayeli a Lawa li, bɛ n ka kɛ nɛ.
Bɛ n kibərə lɛa, man pii n ni.
Edɔmu minin gɔn waa manɛ
11Duumaa a boo gii.
Lɛ-dɛ n boe Seyiri a n pii:
«Wɔlɔ-lɛduə̃li,
ma n wàa boo diɛ tèlò paǹ li?»
«Wɔlɔ-lɛduə̃li,
ma n wàa boo diɛ tèlò paǹ li?»
12Wɔlɔ-lɛduə̃li lɛ ná a lɛ si, á pɛ:
«Lɛ̀ n wɛɛ, sɛnɛ tèlò n tɔn a tan.
Bɛ̀ ka á li ka wusoo ka da nɔ̀n da,
ka wusoo ka da biikoo kɔsɔ
li doo!»
Larabun gána a gɔn waa manɛ
13Larabun gána a boo gii:
Dedan a diə gole zii tɔ-wɔlen lɛn,
ka á re lɛ̀ wɛɛ Larabun
gána-n don.
14Kasɛn mɛnɛn dɔn bɛ́
giã-n Temaa kiwi,
mu boro bɛ́ min mɛnɛn ganaa,
ka wo mu kɔ bɛn la,
ka màn-bii kɔ baa-silin kɛn la.
15Minin manɛ, ǹ nə́ baa si
zia nyɛɛnɛ,
gɔya sa lɛ-bɔlen ne,
sa dii wolen kɛn nɛ,
zia a wɔ̃ taman yii.
16A giala Dɛnaa boo mɛn pɛ ma nɛ á ke: «Kànaa ka lɛ̀ goon ka te, Kedaara a yii gugurubaa kɛ tumaa á re nyɛɛ. 17A kiɛ-bɔlen zanbian mɛnɛn bɛ́ re goɛ̃ Kedaara a nɛnyaanan bii, ǹ ba re tɛ koe wa.» Dɛnaa Lawa, Izirayeli a Lawa boo mɛn pɛ, bɛ n ka kɛ nɛ.
Currently Selected:
Iza 21: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
