Iza 16
16
Moabu gána n giɛ Zeruzalɛmu a dɔmalɛ li
1Moabu a kiãn man pii:
«A kũ Selaa ganaa diə gole ne,
ka sère gɔ̀lɔ̀ dia gána lɛ a kiã la,
*Siɔn kele la.»
2Moabu gána lɔn man
golee-n Arnɔn tà lɛ-a.
Maǹ ka bàan baa-silin bɛ́ lɔn,
ǹ nə́ ǹ loo ǹ nə́ ǹ bɔ ǹ kii ni.
3Ka yiri kɔ wɔ la,
ka golee goon la.
Penleen, ka n wúlu kɔ wɔ lɛ,
ka tèlò bɛ́ lɔn.
Ka n kɔ wɔa baasi wolen lɛ,
ka nyan nə ǹ giala da kanaa wa.
4Lɛ kɔ Moabu a baasi wolen
kɛn ganaa,
n toa ǹ nə n yu n la.
Ǹ kanbaa ziziɛ̃ wole kɛ ganaa.
Min mɛn bɛ ǹ kio lui,
bɛa re goɛ̃ yǎa duduu wa.
Basaã lɛ á re nyɛɛ.
Ǹ dɛnaa á re woe a wɔa gána
lɛ toa walan.
5Bɛ kio,
kii pàã á re gole koe
a bǐɛ̃baa taman yii.
Bɛa kii bɔlɔgoondɛnaa
kɛ lɛ Davida tɔrɔ lɛa,
á re gána lɛ nyɛɛnaan boe
ka peperebaa nɛ.
A n die goɛ̃ kiri-wɔle lɛa,
a n koe dí-pɛn lɛ,
a nə́ n yiri koɛ peperebaa li.
Gɛ̀ loe Moabu gána la
6Zudaa minin man pii:
Wɔ́ Moabu a din gole kɔ boo ma,
a din koa nɛ, a din narɛɛ nɛ,
a yiri koa ma din-a nɛ.
A bɛ́ boo mɛn yii diɛ,
boo fofolo ne.
7Sisia kəni,
Moabu minin man wuu pii
ǹ gána la.
Min tumaa n wuu pii.
Maǹ gini rezɛ̃ mɔ̀mɔn kɛn li,
ǹ nə́ goã zɛnɛɛ Kiiri-Herɛsi.
Ǹ foo ziziɛ̃maa nɛ parsiini.
8A giala, Ɛsibɔn dù gɔrɔ basaã baa.
Tɔrɔn gánadɛnan nə́ Sibmaa
a *rezɛ̃ da wuru sonbore kɛ ziziɛ̃.
A na á goã woe yǎa Yaazɛrɛ,
á gole kɔ yǎa diə gole ne.
A da gɔnɔn manə nyoɛ̃
yǎa yìsi mu kio.
9Bɛ lɛ nɛ, ma á wuu pii
kun ka Yaazɛrɛ minin ni
Sibmaa a rezɛ̃ dan la.
Ɛsibɔn laanka Elaalee,
man die n yii mu kiɛ ka la.
A giala,
foo kɔɔ̃n nə́ n lɛ da kaa rezɛ̃
laanka kaa kaa-piɛ mànan la.
10Foo kɔɔ̃nbaa mɛn goã kaa
da nɛ-kɔle wurun kɛn nɛ, bɛ nya.
Loe laanka foo kɔɔ̃nbaa ǹ lɛ-dɛ á boe
kaa rezɛ̃ wurun ni doo wa.
Min kɔn ba rezɛ̃ tɔrɛ
a tɔrɔ ǹ bǎã-n doo wa.
Má foo kɔɔ̃nbaa ǹ lɛ-dɛ sàabaa.
11Bɛ lɛ taman yii,
ma foo á ziziɛ̃ nɛ Moabu a paǹ li.
Maa ginii n ka tùtu wuu bɛ́ lɔn.
Man gini Kiiri-Herɛsi la.
12Moabu minin manə
n dinin nɔmɛɛ,
ǹ nə́ woe wúlu bɔ ǹ bǎãn nɛ,
woe gòã-kũ diɛ ǹ dì kionən ne,
sɛnɛ, bɛ là banban.
13Dɛnaa Lawa boo mɛn da
Moabu a paǹ li lɛlɛ,
bɛ n ka kɛ nɛ.
14Sisia, Dɛnaa Lawa n kɛ pii: «Kànaa ka lɛ̀ sɔɔ ka te, Moabu gána a min dadaran laanka a zaman damata kɛ a re màn kɔn biɛ doo wa. Min mɛnɛn yii bɛ́ re goɛ̃ koo, bɛn ba re tɛ koe wa. Ǹ ba màn lɛa wa, ǹ ba re màn kɔn dɔ biɛ wa.»
Currently Selected:
Iza 16: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
