Iza 14
14
Wo bɛ̀rɛbaa ǹ bǎã n wolen wusoo a da piɛ
1Dɛnaa Lawa á re makara boe Zakɔba tɔrɔn ganaa. Sonbore, á re nyɛɛ mà asɛ din na á Izirayeli tɔrɔn yii gɔgɔɔ̃, á re woe ǹ ne ǹ tán la. Tiin tá re kiɛ kunun ǹ ni, ǹ dɔn nə Zakɔba tɔrɔn baa. 2Tɔrɔ kɔsɔn tá re Izirayeli minin kuĩ ǹ wo ǹ koa ǹ gána nɛ. Dɛnaa Lawa a tán la walan, Izirayeli minin lɛn tá re n bɔyɛɛ ǹ bɛa minin lɛn baa bɛ̀rɛn lɛa, giĩn laanka lɔn nɛ. Min mɛnɛn nə ǹ baa bɛ̀rɛn lɛa lɛlɛ, ǹ dɔn tá re bɛn biɛ bɛ̀rɛn lɛa. Min mɛnɛn nə nɔmaa da ǹ mii-n lɛlɛ, ǹ dɔn tá re bɛn kiãn biɛ sisia.
Baabiloniin kii a gɔn nyɔmiɛ̃
3Izirayeli, ǹ kɔn pinaa, Dɛnaa Lawa á re susui koe n la n nɔmaa damata kɛ laanka n bɛ̀rɛbaa kɛ kio.
4Bɛa waáraa kəni, n die n loe
kɛ lɔ n Baabiloniin kii foo saa nɛ:
Min mɛn goã pàã nyɛɛ wɔ-n lɛlɛ,
bɛa dɛnaa wɔ nya.
A kakaarɛbaa lɛ nya.
Asɛ wɔ nya!
5Dɛnaa Lawa min baraan
pàã nya,
ǹ pàã zɛnaa ǹ bàlà ke, á bɛ yiɛ.
6Bàlà kɛ lɛ na á goã tɔrɔn
dii biikoo tumaa li,
ka foo-yoo gole ne,
ǹ yɔyɔrɛ, nɔmaa diɛ ǹ mìi ni.
7Sisia kəni, tán tumaa golee kiĩni,
a nə n susui.
Min tumaa n foo kɔɔ̃nbaa ǹ lɛ dii.
8Sii mɛn bɛ́ n zɛnɛɛ,
dan dinin manə n nyɛnyɛɛ
bɛ taman yii.
Siprɛsi dan laanka Liban dan
man pii:
«Ǹ nə n da yala kɛ-n lɔn,
min kɔn bin tɔn da wɔ kuru doo wa.»
9Geren piɛ, geren man bìn diɛ,
maǹ nə n yɔrɔ boe die
n diɛ n lɛ n daa waáraa.
N din na a lɛa,
maǹ kanaa a min dadaran yii kiɛ.
Tɔrɔn tumaa a kiin man yui lon,
ǹ nə́ n diɛ n lɛ.
10Ǹ tumaa boo saa kun, ǹ nə́ pii:
«N dɔ pàãwɛɛnaa baa ka wɔ
dɔn bɛ́ lɔn!
Kanna, ma n wɔ dɔn kɔnboe lɛa!»
11N kiibaa lɛ gisĩ tán geren piɛ,
kɔnkoɛɛ̃nɛn wuu li,
Bǎã bɔnɛɛ nə n waa ǹ wɔlɔ lɛa,
nyuunun manə n kɔmalɛ lɛa.
12 #
SNS 8.10; 9.1 Sɔ̀ tɛ-pɛle,
nsɛ baayɛlɛ a nɛ,
a n siɛ lɔn kəni n tá
niɛ̃ lon mɛnɛɛ?
Ń bɔ lon ń mɛnaa!
Ǹ nə́ n zũ tán,
nsɛ mɛn goã tɔrɔn bɔyɛɛ ǹ kiɛ.
13 #
Mat 11.23; Luk 10.15 Ma nə n goã pii n din gɔ́ɔ̃ nɛ:
«Ma á re dii lon,
ma maa kii dankan kɛ koa
Lawa a leeren kɛn lalan.
Kele mɛn bɛ́ gɔsɛ a lɛ̀gɔn la,
lawan lɛsɔkɔn bǎã lɛa,
man die giɛ̃ bɛ la.
14Ma á re dii labaran lalan,
ma goã ka lon a Lawa bɛ́ lɔn.»
15Sɛnɛ, n woo n din yaa
geren piɛ,
nyankɔrɔ gole kɛ gɔ́ɔ̃ nɛ.
16Min mɛnɛn bɛ́ walan,
ǹ yii bɛ n ganaa die,
ǹ nə́ n yiin doa n la, ǹ nə́ pii:
«Giĩ kɛ lɛ yii die,
a din kɛ lɛ bie á goã bìn diɛ
tán ganaa,
a n bɔ̀n diɛ tɔrɔn ganaa wa ya?
17A din lɛ bie á goã
tán bɔyɛɛ biɛ diə gole lɛa,
kiwin yui,
n piɛ̃ ka kòso nɛn kaa-n wa ya.»
18Tɔrɔn tumaa a kiin,
hiĩ ǹ tumaa nə n susui
ka gugurubaa nɛ ǹ yalan nɛ.
19Sɛnɛ, nsɛ, ǹ nə́ n zũ tán kànaa,
sɔsɔɔ n yala ganaa,
ka nɛnyaan mɛn nə́ ke á yɛ
gere lɛa,
nyɛ́ɛ diɛ,
ka gere mɛn nə́ ke, ǹ nə́ yɔyɔrɛ.
Ǹ min mɛnɛn fɔ̃ ka gɔya nɛ,
ǹ nə́ ǹ geren kaa kɔlɔn lalan
yala gole kɛ nɛ,
bɛn man koe ne n gere lɛ.
20Sɛnɛ, ǹ ba re n biĩ kun ka
bɛn nɛ wa.
A giala, ma n nə́ n gána lɛ ziziɛ̃,
n nə́ n tɔrɔn papaã.
Ǹ ba re gɛ̀-dɛle tɔrɔ babaraa kɛ
tɔ bíi doo wa.
21Ka n yɔrɔ bɔ ka a nɛnyaanan dɛ,
ǹ díi a sii baraan kɛn
tumaa taman yii.
Màn mɛn bɛ́ toɛ, ǹ baran n kɔ
tán tumaa lɛ
ǹ kiwi dadaran dɔ la wa.
22Dɛnaa Lawa Pàãyiidɛnaa a da ǹ boo á ke: «Ma á re yui *Baabilonii minin gialaa, ma ǹ tɔ tuturu. Ǹ min mɛnɛn yii bɛ́ re goɛ̃ koo ka ǹ nɛnyaanan nɛ, ka min mɛn tumaa bɛ́ re yii ǹ kio.» Dɛnaa Lawa a da ǹ boo ne.
23«Baabilonii á re kɔlɔn giã ǹ bǎã biɛ. Á re bɛrɛɛ bǎã biɛ. Man die ziziɛ̃ lenlen ka ǹ bɛ́ wɔlɔ wɔrɛɛ lɔn.» Dɛnaa Lawa a da ǹ boo ne.
Dɛnaa Lawa á re Asiirii minin pàã nyɛɛ
24 #
Iza 10.5-34; Nah 1.1–3.19; Sof 2.13-15 Dɛnaa Lawa Pàãyiidɛnaa liɛ wɔ á pɛ:
«Ma boo mɛn da,
bɛ lɛ n die n zɛnɛɛ,
ma màn mɛn yɔrɔ bɔ,
bɛ lɛ n die giala yii!
25Ma á re Asiirii minin
pàã nyɛɛ maa gána nɛ.
Ma á re ǹ yɔyɔrɛ maa kelen
kɛn la.
Ǹ pàã ke maa zaman wìi li
ka zǔu bɛ́ lɔn,
ma á re bɛ siɛ ma bɔ ǹ la.
Ǹ guĩ guguru ke maa
zaman kɔrɔn,
ma á re bɛ gisĩ.»
26Kɛ n gɔn waa ǹ boo lɛa
kanaa tumaa wɔ lɛa,
a gɔn munii n lon,
tɔrɔn tumaa wɔ lɛa.
27Bɛ̀ Dɛnaa Lawa
Pàãyiidɛnaa golee sii li,
die n boe la a kurəə
a zɛnaa ganaa?
Bɛ̀ á n gɔn munii saa lon,
die n boe la a gisĩ?
Filisiti minin gɔn waa manɛ
28 #
Kiin2 16.20; KZS2 28.27 Kii Ahaazi a gɛ̀ lɛ̀ nɛ, boon kɛn nə́ n da:
29 #
Zer 47.1-7; Eze 25.15-17; Zow 3.4-8; Amɔ 1.6-8; Sof 2.4-7; Zak 9.5-7 Filisiti minin lɛn,
bàlà mɛn bɛ́ ka dii,
ta bɛ yiɛ,
ka nyan nə n nyɛnyɛɛ wa.
A giala,
kɔrɔkan nə die soe miɛ̃ gere ne,
tɔɔ babaraa piɛ̃ wole bɔ a dɔ nɛ.
30Doobaan tá re màn-bii yii,
nɔmaa wolen tá re wɛɛ tán
n yiri ǹ bǎã goon ne.
Sɛnɛ kasɛn Filisiti minin kɛn,
bòo á re ka dii.
Kaa min mɛnɛn yii goã koo,
ǹ tá re bɛn dii.
31Ka wuu pɛ ka n lɛ dɛ
kaa kiwi a kiɛnlɛn bii!
Filisiti gána tumaa foo n ziziɛ̃ nɛ.
A giala,
tɛmaa bara n boe
gɔsɛ a lɛ̀gɔn la die.
Zɔ́ɔn bii,
min kɔn ba n wɔlɔ lui
zia-baalin ganaa wa.
32Wɔ n die Filisiti minin
dia dí-a wolen kɛn lɛ sii lɔn?
Wɔ n die pii:
Dɛnaa Lawa din na
á *Siɔn kiwi koa,
a zaman lɛ a doobaan tá re
mìi duru ǹ bǎã yii walan.
Currently Selected:
Iza 14: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
