Iza 11
11
Davida paabaa ǹ wɔ
1 #
SNS 5.5; 22.16 Nɛgiĩ á re yii Zesee tɔrɔ basa nɛ,
ka da giala piri zizi bɛ́ lɔn
gɔn ten boe.
A gòonən tá re gɔn dii boe.
2Dɛnaa Lawa Yiri n die goɛ̃ la:
Yiridɛnaabaa laanka
sii bɔbɔ kɔn lɛ ǹ yiri
n die goɛ̃ a lon,
daraa ka foo tãbaa ǹ yiri ni,
Dɛnaa Lawa doɛ̃ laanka
a guguru kɔ ǹ yiri ni.
3Nyɛ́ɛ baa Dɛnaa Lawa yii ni n
die goɛ̃ a foo sii lɛa.
A yii bɛ sii mɛn ganaa a re kiri kuri bɛ li wa.
A too bɛ boo mɛn miɛ,
a re sii yɔrɔ boe bɛ li wa.
4 #
Tes2 2.8
Sɛnɛ, a n die kiri kuri
pàãwɛɛnaan la ka peperebaa nɛ.
A n die peperebaa zɛnɛɛ
gána lɛ a doobaan manɛ.
A da ǹ boo n die goɛ̃ ka bàlà
bɛ́ lɔn gána lɛ nɛ minin duwii.
A lɛ gɔ́ɔ̃ ǹ boo n die min
baraan dii gɛ̀ lɛa.
5 #
Efɛ 6.14
A n die n binbin kuĩ
ka peperebaa nɛ
a n binbin yii
ka bɔlɔgoondɛnaabaa nɛ.
6 #
Iza 65.25
Bɛa biikoo li kəni,
don gin laanka sère nɛ á re
goɛ̃ kun,
goe laanka bòe nɛ á re
wɛɛ tán kun,
diin nɛ ka yàra á re màn bii kun,
nɛginin boɛɛn nə́ ǹ lɛ duĩ.
7Dii laanka gòon màn babaraa
á re màn bii bǎã goon ne,
ǹ nɛn nə waa tán kɔn li.
Yàra n die buu soɛ̃ ka dii bɛ́ lɔn.
8Nɛnyaan tiɛɛ̃n tá re sàn koe
damanti a waa ǹ bǎã nɛ,
nɛnyaan boɛɛn tá re
n gɔn we kɔrɔkan li yala-n.
9 #
Ebr 2.14
Baraabaa laanka kakaarɛbaa
goon din ba re n zɛnɛɛ
Dɛnaa Lawa a
kele sonbore kɛ la wa.
A giala, gána lɛ n die piɛ̃
ka Dɛnaa Lawa doɛ̃ nɛ,
ka yìsi mu bɛ́ piɛ̃ nɛ ka mu-n lɔn.
10 #
Rɔm 15.12
Bɛa pinaa lɛ nɛ,
Zesee tɔrɔ lɛ n die goɛ̃
ka zanzan bɛ́ lɔn
kanaa a tɔrɔn tumaa yɔrɔ-a.
Tɔrɔ tumaa á re die giɛ yiri li a li.
A bɛ́ re gɛnɛɛ bǎã mɛn nɛ,
gugurubaa n die tɛ pii walan.
Bɔ bɛ̀rɛbaa ǹ bǎã-n wolen
11Bɛa pinaa kɛ nɛ,
Dɛnaa n die n pàã nyɛɛ,
ka a paabaa ǹ wɔ nɛ.
Á re Izirayeli min gialakunun
kɛn sii a ǹ kaa,
ǹ mɛnɛn yii goã koo
Asiirii gána nɛ,
Ezipti gána a tán nɛ a lɛ̀gɔn la nɛ
a lon ne a lɛ̀gɔn la nɛ,
Etiopii gána nɛ,
Elamu gána nɛ, Amaati ni,
*Baabilonii gána nɛ,
ka gánan mɛnɛn bɛ́ mu bii.
12Dɛnaa Lawa n die zanzan zumi,
a n gɔn waa bɛa gánan kɛn
lɛn manɛ,
mà asɛ á re Izirayeli a wo
bɛ̀rɛbaa ǹ bǎã-n wolen soekɔn,
Zudaa gána minin mɛnɛn
tumaa bɛ́ pɛsiɛ̃ nɛ
kanaa paǹ tumaa ganaa,
a bɛn sɔkɔn.
13Bɛa waáraa kəni,
Efrayimu gána a foo wuu pɛ
á re nyɛɛ.
Zudaa gána a zɔ́ɔn tá re bɔ̀n biɛ.
Efrayimu gána foo a re
wuu pii Zudaa gána li doo wa.
Zudaa gána a re Efrayimu
gána biɛ zɔ́ɔ doo wa.
14Lɛ̀nyɛɛn gɔn la,
maǹ die n mìi foɛ̃
Filisiti minin kelen kɛn ganaa,
lɛ̀giala gɔn la,
n tá re diə gole minin kɛn
gɔn mànan kokoe.
Edɔmu gána laanka Moabu
gána n die goɛ̃ ǹ pàã giulun,
Amɔn tɔrɔn nə dí nya ǹ nɛ.
15 #
SNS 16.12
Dɛnaa Lawa á re Ezipti tà
diɛ piɛ̃ ganaa.
Á re parɛɛ Efrati tà li,
a n gɔn pepere li.
A n die niɛ̃ kɔn gùrù sɔbaa
ka a boo sii la pàã nɛ,
minin nə boo la ǹ kiɛ̃ a nɛ
ka ǹ gòã nɛ.
16A zaman mɛn yii goã koo
Asiirii gána nɛ,
á re zii boe bɛn manɛ,
ka a bɛ́ á goã á bɔ Izirayeli
minin man lɔn,
ǹ soo Ezipti gána-n biikoo li.
Currently Selected:
Iza 11: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
