Iza 1
1
A. Dɔlɔ bɔ ǹ boo
(1–35)
1 #
Kiin2 15.1-7,32-38; 16.1-20; 18.1–20.21; KZS2 26.1–32.33 Boon kɛn man Amɔsi a nɛgiĩ Izayii a sii yɛn lɛa, Zudaa gána laanka Zeruzalɛmu kiwi a paǹ li. Bɛa sii yɛn lɛn biikoo na á kɔnpɛ kii Oziasi a biikoo ne, Zoatamu wɔ nɛ, Ahaazi ni ka Ezekiasi wɔ nɛ, Zudaa gána mìi la.
Lawa a zaman ba Lawa doɛ̃ wa
2Lon, n too kɔ!
Tán, n dɔ nə n too da!
Dɛnaa Lawa n kɛ pii:
«Man nɛnyaanan too,
ǹ nə́ dadara kɔ,
sɛnɛ, ǹ nə́ n gòãn dii ma ganaa.
3Dii tá a dɛnaa doɛ̃,
dundun na a màn-bii ǹ goo doɛ̃,
ǹ dɛnaa bɛ́ màn-bii koe la
ǹ mɛn lɛ nɛ.
Sɛnɛ, Izirayeli sɛ a màn kɔ́n
doɛ̃ wa,
maa zaman kɛ a màn kɔ́n
giala miɛ wa.»
Zudaa gána n ka diə gole bɛ́ lɔn
4Nsɛ, sii baraa-zɛnaali tɔrɔ,
n sii baraan nə́ la yii ni,
n wɔ n ka bɔ̀n nɛ!
Nɛnyaan gòãn dii wole,
tɔrɔ babaraa,
ka n dɔ̀ɔ̃ wɔ Dɛnaa Lawa nɛ!
Ká Izirayeli a Lawa sonbore
kɛ bɔlɔ tii,
ka n gòãn dii a ganaa.
5N mìi tumaa n busulɛ lɛa,
n foo tumaa zɔzɔɔ.
Man die boe la ma n dɛ
n paǹ mɛn kɔsɔ-a doo
nsɛ mɛn bɛ́ tɔn nə n gòãn dii gɔ́ɔ̃ nɛ?
6A saa n gòã tìsì ganaa
a wo n baã bii yaa,
bɛ tumaa n sɔsɔlɛɛ nɛ,
n paǹ tumaa n busulɛ lɛa,
bayɛrɛ nɛ, ka mandɛ lɛ nɛ.
Min kɔn nə ǹ lɛ pii wa,
min kɔn nyɔɔ lɔ ǹ ganaa wa,
min kɔn màn yii ǹ ganaa wa.
7Kaa gána n kɛbɔlɔ lɛa.
Tɛ kaa kiwin kũ.
Tiin man kaa wurun
ziziɛ̃ ka dinin yii ni.
Kaa wurun man ka kɛbɔlɔ bɛ́ lɔn,
ká kaa zɔ́ɔn man nə́ bɔ ǹ nɛ.
8 *Siɔn kiwi dinsɔɔ̃ na á goã,
ka mìi susu ǹ bǎã bɛ́ lɔn
rezɛ̃ wuru-n,
ka zìã bɛ́ lɔn dù gɔrɔ-n,
ka kiwi bɛ́ lɔn,
zɔ́ɔn sɔraasin na á lɛnpɛnɛ.
9 #
SGK 19.24; Rɔm 9.29 Bɛ̀ Dɛnaa Lawa Pàãyiidɛnaa
bie á min tɛn yii toa koo
wɔ bii wa,
bɛ̀ wɔ n die papaɛ̃ lenlen
ka Sodɔmu laanka
Gomɔɔrɔ kiwi bɛ́ lɔn.
Giã ǹ gɔn bɔyaa
10Kasɛn Zudaa a kiãn kɛn,
ka n ka Sodɔmu kiãn bɛ́ lɔn:
Ka n too kɔ Dɛnaa Lawa a
da ǹ boon li.
Kasɛn Zudaa minin,
ka n ka Gomɔɔrɔ minin bɛ́ lɔn:
Ka n too kɔ Dɛnaa Lawa a boo li,
ka n too kɔ wɔa Lawa a
doroon li!
11 #
Amɔ 5.21-22
Dɛnaa Lawa n pii:
Kaa *wúlu màn damata kɛ
là n ka wàa nɛ ma ganaa?
Ka bɛ́ sère kuturun mɛnɛn
tiɛ̃ lenlen maa wɔ lɛa,
tɔɔ kasiɛ̃ wolen nyɔɔ ke
ka á koe wúlu màn lɛa,
bɛn tumaa tìĩ bɔ ma yin ni kanna.
Dii gɔ̀lɔ̀n mà ke,
sère nɛ tenən wɔ nɛ,
ka butumun wɔ nɛ,
ma ba ǹ li doo wa.
12Bɛ̀ ka daa ma yɔrɔ-a,
die na á ka bíi mà ka da giã
maa kion a sumu-n?
13Kaa Lawa gɔ ǹ màn ke,
ka n susu ka bɛa koe ne.
A là banban.
A tɛmaa gìĩ kɔɔ̃n ke,
bɛ tìĩ bɔ ma nyin ni.
A giala,
kaa mui dii zɔ́nɔn kɛn bɛ̀
ka ǹ zɛnaa,
kaa susu ǹ piin kɛn nɛ,
ka kaa zɔ́n dadaraan kɛn nɛ,
ka n sii baraan zɛnɛɛ bɛn li.
Ma a bɛ sii ma ganaa duduu wa.
14Kaa mui dii zɔ́nɔn kɛn
tìĩ bɔ ma nyin ni,
ka kaa zɔ́n dadaraan kɛn nɛ.
Maǹ guguru ma ganaa,
má ǹ si ma ganaa
ma nɔmaa ǹ nɛ.
15Bɛ̀ ka n gɔnɔn goa lon ka á ma nyankoe,
man ma yɔrɔ bɔyɛɛ ma bɔ ka la.
Ta ka ma nyankɔ lɔn,
maa n too koe wa.
Ka gɔnɔn man mà lɛa.
16Ka n zoo,
ka *gɔ̀ bɔ ka dinin ganaa.
Kaa sii bɔbɔnɛɛn kɛn,
ka bɛn pii ka ǹ bɔ ma yɔrɔ-a,
ka kaa sii baraan kɛn kaa.
17Ka n daraa sii sonbore
zɛnaa ganaa,
ka ga peperebaa li.
Ka min kakaarɛ doroo,
ka bǐɛ̃ zɛnaa nɛ toen ne,
ka lɔ giɔɔrɔ a guĩ saa.
18Dɛnaa Lawa n pii kɛnɛn:
«Ka daa wɔ kɔn ma.
Ta kaa sii baraan man nə́
tì kɔ lɔn,
ǹ tá re fu koe ka bɔ̀nyaa bɛ́ lɔn.
Ta maǹ nə́ tì kɔ lɔn
ǹ tá re fu koe ka koara bɛ́ lɔn.
19Bɛ̀ ka lɛ kɔ, ka n too kɔ,
ka á re gána lɛ a
màn sonboren bii.
20Sɛnɛ, bɛ̀ ka n piã,
ka woo nyɛɛnɛ ka n gòãn dii
ma ganaa,
gɔya sa n die ka bɔ̀n biɛ.»
Dɛnaa Lawa na á pɛ.
Dɛnaa Lawa n die Zeruzalɛmu yoreen koe
21E! A na á saa lɔn kiwi sonbore
kɛ á n bɔyɛɛ á n kɔrɔbaa zɛnɛɛ?
Lɛlɛ, peperebaa goã Zeruzalɛmu,
sonborebaa dɔ goã a nɛ.
Sɛnɛ, sisia,
kiwi lɛ piɛ̃maa-n
ka gɛ̀-dɛlen ne.
22Zeruzalɛmu,
ma n min yiri gisĩ
ka wɔrɔ a màn koorobaa nɛ,
ǹ nə́ mu kaa n duvɛ̃ kɔɔ̃n kɛ li.
23N kiãn man gòãn dii wolen lɛa.
Maǹ nə n lɛ kiɛ kun
ka wurumun ni.
Lɛ pii ǹ mànan si n
kɔɔ̃nɛ ǹ ganaa.
Maǹ baa sii bɛn kio.
Ǹ ba bǐɛ̃ zɛnɛɛ nɛ toen ne wa,
ǹ ba lɔ giɔɔrɔ a guĩ siɛ wa.
24Bɛ lɛ nɛ,
Pàãyiidɛnaa Lawa,
Izirayeli a Lawa Kaka a daǹ
boo á ke:
Koe n ka kɛ nɛ!
Ma á re yui gòãn dii wolen
kɛn gialaa,
ma maa gɛ̀ dòo bɔ
maa zɔ́ɔn ganaa!
25Zeruzalɛmu, ma á re n bɔyɛɛ
nsɛ li,
man pii ka sɔmaa nɛ,
n *yoreen kɔ.
Ma á re n gɔ̀ yoe ma bɔ n ganaa,
ma n yoreen kɔ.
26Ma á re toɛ n kiri-wɔlen
kɛn nə goã ka lɛlɛ ǹ wɔn bɛ́ lɔn,
n sii yɔrɔ-bɔlen nə ǹ lɛlɛ ǹ giã ǹ gɔn saa.
Bɛ kio kəni,
ǹ tá re n bíi "kiwi pepere",
"kiwi bɔlɔgoondɛnaa".
27Bɛ̀ Siɔn kiwi kɔ peperebaa ǹ zii lɛ,
á re kirisibiɛ.
A min mɛnɛn bɛ́ re n bɔyɛɛ
ǹ da masɛ li,
bɛn tá re kirisibiɛ
ǹ peperebaa taman yii.
28Sɛnɛ, gòãn dii wolen kɛn,
ka sii baraa-zɛnaalin kɛn nɛ,
bɛn tumaa wɔ n ka bɔ̀n nɛ.
Min mɛnɛn bɛ́ n dɔ̀ɔ̃ we
Dɛnaa Lawa nɛ,
bɛn man die bɔ̀n biɛ.
29Bɛa biikoo li kəni,
dan kɛn kɔɔ̃n ka-a,
ká goã wúlu boe ǹ ganaa,
ka foo á re ziziɛ̃ bɛn taman yii.
Dù gɔrɔn kɛn kaa wúlu
bɔ ǹ bǎãn lɛa,
sìi á re ka kuĩ bɛn taman yii.
30Ka n die goɛ̃ ka da mɛn bɛ́
a luu kaa,
ka dù gɔrɔ mɛn nə́ ke
mu nyaabaa a ganaa.
31Min kaka n die goɛ̃ ka buu
gere bɛ́ lɔn,
a zɛnaa ǹ sii n die goɛ̃ ka tɛ
nàn bɛ́ lɔn,
ǹ tumaa n die kuĩ kun,
min kɔn ba re boe la a nimi wa.
Currently Selected:
Iza 1: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
