Eze 3

1 # SNS 10.9-10 Min mɛn lɛ bɛ́ boo diɛ ma nɛ, bɛ́ tɔ́n pɛ: Nsɛ minbuiin a nɛ, sɛ́wɔ-munii kɛ si n sɔ̃, bɛ kio, n tɔn wo boo da ka Izirayeli tɔrɔn lɛn nɛ. 2Má n lɛ bũ, á bɛa sɛ́wɔ-munii lɛ kɔ ma la, má sɔ̃. 3Á tɔ́n pɛ ma nɛ: Nsɛ minbuiin a nɛ, ma sɛ́wɔ-munii mɛn lɛ kɔ n la, n din too ka bɛ nɛ, n kã. Ma bɛ́ soɛ̃, a na á goã kɔɔ̃n ma lɛ-n ka zoo bɛ́ lɔn.

4Á wusoo á pɛ ma nɛ: Nsɛ minbuiin a nɛ, wo Izirayeli tɔrɔn lɛn li, n masɛ lɛ gɔ́ɔ̃ ǹ boon pɛ ǹ nɛ. 5Masɛ bie n diɛ tɔrɔ kɔsɔn li, ǹ bɔlɔ ma ń kaka, min ná a ba a giala miɛ wa. Ma nə n diɛ Izirayeli tɔrɔn li. 6Ta ma nə n diɛ tɔrɔ kɔsɔn kɛn li ǹ bɔlɔn ma ń kaka, n nə́ n ba miɛ wa, bɛn dinin tá re n too koe n lon. 7Sɛnɛ, Izirayeli tɔrɔn lɛn ba re n too koe n lon wa, a giala, ǹ ba li ǹ nə n too kɔ ma din lon wa. Sonbore ne, Izirayeli tɔrɔn lɛn tumaa too n kaka, n laɛ sii dɔ ganaa. 8Á ke, man die n dɔ yii we sii la, ka ǹ dɔn yii á ke we sii la lɔn, ma n too kaka kɔ, ka ǹ dɔn too á ke kaka lɔn. 9Man die n too laɛ ka kɔlɔ bɛ́ lɔn, a kaka kɔ a la gɛ̀fu ni. N nyan nyɛ́ɛ baa wa, n nyan toa ǹ sii nyɛ́ɛ da n ganaa wa. A giala, piã-wɔlen manɛ. 10Á tɔ́n pɛ ma-n doo: Nsɛ minbuiin a nɛ, ma bɛ́ boon mɛnɛn tumaa pii n ni, n too kɔ ǹ li doɛ̃, n nə ǹ gũ n yiri ni. 11Bɛ kio, ǹ minin mɛnɛn bɛ́ ǹ nə́ ǹ goa ǹ nə́ woo ǹ ne bɛ̀rɛbaa ǹ bǎã nɛ, wo dɔ bɛn li, n pɛ ǹ nɛ: «Dɛnaa Lawa n kɛ pii.» Ta ǹ tá n too koe, ta ǹ ba n too koe wa, Dɛnaa Lawa a da ǹ boo ne.

12Bɛ kio, Lawa yiri daa ma saa. Má tɔ́n lɛ-dɛ gole ma ma kio pii: «Dɛnaa Lawa tɔ nə n saa lon a gugurubaa ǹ bǎã kɛ nɛ!» 13Màn yiikoonaan kɛn dɔn, ǹ nyàa kan nə́ goã n tɔtoe kɔn nɛ, má bɛn dɔn nyàa ka wuu ma. A din biikoo lɛ gɔ́ɔ̃ nɛ, má wotoro gòãn kɛn dɔn wuu ma, ka paraa gole kɛ nɛ. 14Lawa yiri lɛ na á ma saa, á woo ma nɛ. Man má woo, ma yɔrɔ ń kɔsiɛ nɛ, ma foo ń ziziɛ̃ nɛ. Dɛnaa Lawa pàã na á goã ma la taãn-taãnɛ. 15Má dɔ goa-wolen lɛn li Tɛl-Abibu. Maǹ nə́ goã giã-n Kebaara tà lɛ-a. Má giã kunun ǹ ni walan ma lɛawaa sɔbaa, boo din ná a n diɛ ma la wa.

Dɛnaa Lawa Ezekieli koa bǎã-lɛduə̃li lɛa

16Lɛawaa sɔbaa lɛ lɛ bɛ́ á pã, Dɛnaa Lawa tɔ́n boo da ma nɛ á pɛ: 17Nsɛ minbuiin a nɛ, man die n koɛ Izirayeli tɔrɔn lɛn bǎã-lɛduə̃li lɛa. Bɛ̀ n boo mɛn ma ma lɛ-n, n die n bɛ pɛ ǹ nɛ, ma din a gɔn waa ǹ boo lɛa. 18Bɛ̀ ma pɛ min baraa nɛ má á re giɛ̃, bɛ̀ n nə n gɔn waa-n wa, bɛ̀ n boo da min baraa lɛ nɛ, màn mɛn bɛ́ toɛ, a na a tɔ wɔ ǹ gɔn baraa kɛ kaa ń giɛ a yii á goɛ̃ koo wa, min baraa lɛ á re giɛ̃ sɛn. Sɛnɛ, man die a gɛ̀ lɛ a sii diɛ n din mìi ni. 19Sɛnɛ, bɛ̀ n nə́ n gɔn waa min baraa lɛ nɛ, bɛ̀ a na a baraabaa lɛ laanka a tɔ wɔ ǹ gɔn baraa lɛ kaa wa, a din nə die giɛ̃ a sii baraan taman yii. Sɛnɛ, nsɛ yii á re goɛ̃ koo. 20A din yii goon ne, bɛ̀ min pepere dɔ ná a peperebaa kaa, á n sii kɔkɔrɔ zɛnɛɛ, a giala mà má n da a gɔ̀ɔ̃ li, ma á re dii a sã lɛ taman yii a gã. Bɛ̀ n nə n gɔn waa-n sɛn wa, a n die giɛ̃ a sii baraan lɛn taman yii. A sii peperen mɛnɛn zɛnaa lɛlɛ, ma bie re giɛ bɛn ganaa wa. Sɛnɛ, man die a gɛ̀ lɛ a sii diɛ n din mìi ni. 21Sɛnɛ, bɛ̀ n nə́ n gɔn waa min pepere lɛ nɛ, màn mɛn bɛ́ toɛ a baran sii baraa zɛnaa wa, bɛ̀ a sii baraa zɛnaa sonbore wa, a yii á re goɛ̃ koo, n gɔn waa nɛ lɛ taman yii. N dinmaa dɔ á re kirisibiɛ.

Sii a kɔnboen, Izirayeli minin wɔ lɛa

22Dɛnaa Lawa pàã gisĩ ma la walan doo. Á tɔ́n pɛ ma nɛ, mà ma yoo ma wo nyankɔrɔ lɛ kɛ nɛ, mà asɛ á re boo diɛ ma-n walan. 23Má yoo, má woo nyankɔrɔ lɛ lɛ nɛ. Ma bɛ́ giɛ, bɛ̀ Dɛnaa Lawa a gugurubaa á ke walan dɔ nɛ, ka bibinaa wɔ kɛ lɛ bɛ́ lɔn má yɛ Kebaara tà lɛ-a. Má tɔ́n bɔ má mɛnaa tán ma lɛ la. 24Bɛ kio, Lawa yiri daa wɔ ma nɛ, á ma saa, á ma da lon. Á tɔ́n pɛ ma nɛ: «Wo n dɔ n kion, n kiɛnlɛ tã n din lɛ.» 25Nsɛ minbuiin a nɛ, n too kɔ: Ǹ tá re biɛn kiɛ n ganaa, ǹ nə n yii, n ba re boe la n soo n wo ǹ li doo wa. 26Ma á re n lɛwɔn damɛ n lɛ gɔ́ɔ̃ nɛ, n ba re boe la doo, n boo da, n piã-wɔlen kɛn zɛ̀rɛbaa wa. 27Sɛnɛ, bɛ̀ ma boo da n nɛ ǹ mɛn waáraa, ma á re n lɛwɔn fore, n pɛ ǹ nɛ: «Dɛnaa Lawa n kɛ pii.» Bɛ̀ min mɛn tá n too koe, bɛa dɛnaa nə n too kɔ. Bɛ̀ min mɛn ba li a n too kɔ wa, bɛa dɛnaa baran n too kɔ wa: Tɔrɔ piã-wɔlen manɛ.

Currently Selected:

Eze 3: SBPE2011

Highlight

Copy

Compare