Sam2 3
3
1Zia lɛ belebɔ Sayulu a minin lɛn laanka Davida a minin lɛn bii. Màn na á goã miɛ Davida sɛ pàã li miɛ̃. Sɛnɛ màn na á goã n boe Sayulu a minin lɛn sɛn pàã lɛ miɛ̃.
Davida a nɛnyaanan mɛnɛn nə yɛ Ebrɔn
2Davida nɛgiĩn kɔnɔn yɛ Ebrɔn kiwi. A nɛgiĩ bibinaa lɛ tɔ n Amnɔn, á yɛ Zizereyɛlin Ayinoamu ganaa. 3A paabaa ǹ wɔ n ka Kileyabu ni. Abigayili mɛn goã Karmɛli min Naabali a lɔ lɛa, a na á Kileyabu yɛ bɛ ganaa. A sɔɔbaa ǹ wɔ n ka Abusalɔn nɛ. Gesuurun kii Talmayii a nɛlɔ Maakaa n bɛ dan lɛa. 4A siibaa ǹ wɔ n ka Adoniya nɛ, á yɛ Agiti ganaa. A soorobaa ǹ wɔ n ka Sefatiya nɛ, á bɛ yɛ Abitaali ganaa. 5A sɔrɔbaa ǹ wɔ n ka Yitramu ni, Davida bɛ yɛ a lɔ Egla ganaa. Bɛn lɛn man Davida a nɛnyaanan lɛa, ǹ nə́ yɛ Ebrɔn kiwi.
Abnɛɛrɛ laanka Isbosɛti a mɛ-kɔn
6Zia bɛ́ á goã Sayulu a minin lɛn laanka Davida a minin lɛn bii ǹ mɛn waáraa, Abnɛɛrɛ na á goã giɛ gòãn wɔ tán bǎã li. 7Lɔ kɔsɔ goã Sayulu gɔn li, a tɔ n Rispaa, Ayiyaa a nɛlɔ nɛ. Ǹ kɔn pinaa, Isbosɛti pɛ Abnɛɛrɛ nɛ: «Wàa na á baa ń giã kun ka masɛ a díi a lɔ nɛ?» 8Bɛa boon lɛn nə́ Abnɛɛrɛ foo yoo parsiini, á tɔ́n pɛ: – Zudaa minin lɛn gin nə ka masɛ nɛ? A da kaa pelo lɛ, man tɔn bǐɛ̃ zɛnɛɛ n di Sayulu a kion minin manɛ, n dɔɔ̃nɔn nɛ, ka n giaáran nɛ. Má n doa, màn mɛn bɛ́ toɛ, Davida gɔn nyan dɔ n ganaa wa. Pelo-n kəni, n tá ma zɛ̀rɛ biɛ lɔ kɛa sii taman yii! 9Dɛnaa Lawa nə n lɛ kɔ Davida la ka sii mɛn nɛ, bɛ̀ a daa yaa masɛ bɛ zɛnaa Davida-n wa, Lawa dɔlɔ babaraa bɔ masɛ Abnɛɛrɛ ganaa. 10#Sam1 15.28 Dɛnaa Lawa na á pɛ kɛnɛn: «Man die kiibaa lɛ sii Sayulu a kion minin la, ma Davida koa kii lɛa Izirayeli laanka Zudaa mìi la, a saa Dan ganaa gɔsɛ a lɛ̀gɔn la a wo Bɛɛr-Sebaa yaa gusin a lɛ̀gɔn la.» 11Isbosɛti boo la á Abnɛɛrɛ lɛ si ka boo goon ne wa. A giala, a na á goã nyɛ́ɛ biɛ nɛ.
Abnɛɛrɛ a kaa kun ka Davida nɛ
12Abnɛɛrɛ minin dia Davida li ka a din tɔ nɛ, mà ǹ pɛ-n kɛnɛn: «Gána lɛ n die kɔsɔ wɔ lɛa? Lɛ kɔ kɔn la wɔ ka masɛ nɛ, ma á re n doe n lɛ, ma Izirayeli minin lɛn tumaa bɔyaa ma ǹ kaa kunun n ni.» 13Davida tɔ́n pɛ nɛ: «Á siĩni, ma á re lɛ kɔ kɔn la woe ka n nɛ. Sɛnɛ, man die sii goon dinsɔɔ̃ nyankoe n lon. Bɛ̀ n bie n da ka maa lɔ Sayulu a nɛlɔ Mikaali kɛ-n bɔrɔ wa, n nyan toa n da masɛ li wa.» 14#Sam1 18.27 Davida minin dia Sayulu a nɛgiĩ Isbosɛti la, mà ǹ pɛ nɛ: «Maa lɔ Mikaali lɛ, wusoo n kɔ masɛ la. Man má Filisiti min paabiɛ giulun lɛpìi kuru, ǹ nə́ tɔ́n kɔ ma la.»
15Isbosɛti tɔ́n minin dia mà ǹ wo si ǹ zuũ Paltiyeli, Layiisi a nɛgiĩ kɛ la. 16Ǹ zuũ lɛ kɔ a kio lɛ miɛ̃, ka wuu ni yǎa Bawurimu kiwi. Sɛnɛ, Abnɛɛrɛ pɛ nɛ: «N lɛ goa dɛ!» A dɔ nə́ n lɛ goa.
17Abnɛɛrɛ kɔn yɛ ka Izirayeli a min golen ne, á pɛ ǹ nɛ: – Ka bɛ́ giɛ li haalɛ bibi mà Davida kaa kii baa, 18sii zɛnaa biikoo lɛ n ke. Sonbore, Dɛnaa Lawa na á pɛ Davida wɔ paǹ li kɛnɛn: «Ma á die maa zaman Izirayeli minin lɛn sii ma ǹ bɔ Filisiti minin laanka ǹ zɔ́ɔn tumaa a pàã giulun, ka maa dí-nyali Davida pàã nɛ.» 19Abnɛɛrɛ bɛa boo lɛ pɛ Bɛnzamɛn tɔrɔn manɛ. Bɛ kio, sii mɛn tumaa kɔɔ̃n kɔ Izirayeli minin lɛn laanka Bɛnzamɛn tɔrɔn lɛn tumaa ganaa, Abnɛɛrɛ woo bɛ pɛ Davida nɛ Ebrɔn kiwi.
20Abnɛɛrɛ ti kun ka min fuə ne, á woo dɔ Davida li Ebrɔn kiwi. Davida màn-bii zɛnaa á kɔ Abnɛɛrɛ laanka a tá-kun wolen lɛn la. 21Abnɛɛrɛ tɔ́n pɛ Davida nɛ: «Masɛ n die woe, ma Izirayeli minin lɛn tumaa sɔkɔn maa dɛnaagiĩ kii wɔ lɛa. Ǹ tá re lɛ kɔ kɔn la we n nɛ, n tá re kii biɛ bǎã tumaa nɛ n din foo dùũ li.» Davida zii kɔ Abnɛɛrɛ la, á woo ka là nyantoro ne.
Zoabu a Abnɛɛrɛ dɛ
22Sɛnɛ, boɛɛnɛ, bɛ̀ Zoabu laanka Davida a minin lɛn nə ke boe zia la die ka màn gigiã nɛ. Bɛ á zɛnɛɛ, bɛ̀ Abnɛɛrɛ ba Davida li Ebrɔn doo wa. A giala, Davida toa á woo ka là nyantoro ne. 23Zoabu laanka a zia-baalin tumaa bɛ́ ǹ nə́ daa ǹ nə́ dɔ, min daa pɛ Zoabu ni: «Nɛɛrɛ a nɛgii Abnɛɛrɛ daa kii li, bɛ dɔ́ toa á woo ka là nyantoro ne.» 24Zoabu daa dɔ kii li á pɛ nɛ: «Wàa mɛn sii n ke ń zɛnaa kɛnɛn? Abnɛɛrɛ lɛ bɛ́ ke á daa n piɛ, wàa na á baa n tá toɛ á woe zɔzɔ̃nɔ? 25Táa n tá Nɛɛrɛ a nɛgiĩ Abnɛɛrɛ lɛ doɛ̃: A daa lɛ mìi n ka kɛ nɛ, a n soo kion laanka n wɔ kion dɔ̃. N bɛ́ sii mɛn tumaa zɛnɛɛ, a bɛ dɔ dɔ̃.»
26Zoabu bɛ́ á soo Davida li, á minin dia Abnɛɛrɛ kio. Ǹ nə́ woo kũ Siraa a mu yala kɛ lɛ-a ǹ nə́ daa nɛ, Davida din ná a ba a siére-a wa. 27Abnɛɛrɛ bɛ́ á n bɔyaa á daa Ebrɔn, Zoabu kũ á woo-n tìãlɛ-a, kiwi lɛ a kiɛnlɛ-a. Á n baa ka a n boo diɛ nɛ ka durii ni. Á dɛ a nɔ̀ ganaa walan á gã, á ǹ dɔɔ̃ngiĩ Azayeli a gɛ̀ dòo bɔ a ganaa.
28Bɛ kio, Davida bɛ́ á ma, á tɔ́n pɛ: «Dɛnaa Lawa din tá doɛ̃, mà masɛ sii ba Nɛɛrɛ a nɛgiĩ Abnɛɛrɛ a gɛ̀ kɛ-n wa, ma bɛ́ kii lɛ a min mɛnɛn dɔn mìi la, bɛn dɔn sii ba a-n wa. 29A gɛ̀ lɛ a koen nə kũ Zoabu din laanka a kion minin tumaa mìi ni. Giulun a nyiǹ bɔ ǹ busudɛnan laanka gɔ̀nɔn ki busu babaraa dɛnan baran nya Zoabu a kion duduu wa. Giĩn die ǹ yɛ a kion biikoo tumaa li, ǹ nə́ boe lɔn dí dinsɔɔ̃ la. Minin die ǹ yɛ a kion biikoo tumaa li, ǹ nə́ bɛn dii zia la, kɛn nə́ foɛ̃ màn-bii li.» 30Bɛ̀ ń yaa Zoabu laanka ǹ dɔɔ̃ngiĩ Abisayii Abnɛɛrɛ dɛ, a giala, a dɔ na á ǹ dɔn dɔɔ̃ngiĩ Azayeli dɛ Gabawɔ̃ zia lɛ la.
31Davida pɛ Zoabu laanka Zoabu a tá-kun wolen lɛn tumaa nɛ: «Ka kaa mɔnaan tɔtoɛ̃, ka gɛ̀ koa ǹ mɔnaan wɔ, ka mɛ Abnɛɛrɛ gere nyɛɛnɛ, ka a gɛ̀ wuu pɛ.» Kii Davida din na á goã tɔ we gere lɛ kio. 32Ǹ nə́ Abnɛɛrɛ bĩ Ebrɔn kiwi. Kii lɛ din na wuu ni Abnɛɛrɛ a yala la, zaman lɛ tumaa kaa wuu ni. 33Davida tɔ́n loe kɛ lɔ Abnɛɛrɛ li á pɛ:
Bɛ̀ Abnɛɛrɛ doamaa nɛ a baãnaan gɛ̀ kɛ miã tɔrɔ wɔ?
34N gɔnɔn bie ǹ nə́ goã yii-n wa,
ǹ bie ǹ nə́ n gòãn kaa fɔlɔ biɛ-n wa.
Sɛnɛ, ń ke ń mɛnaa,
ka min baraan bɛ́ min dii ǹ da tán lɔn.
Zaman lɛ tumaa wusoo á wuu pɛ Abnɛɛrɛ la doo. 35Bɛ kio, zaman lɛ tumaa daa Davida li, mà maǹ màn-bii kɔn koe la a bii, bɛ̀ wasa baa miɛ̃. Sɛnɛ, Davida nə́ n liɛ á pɛ: «Bɛ̀ wasa bie a mɛ wa, bɛ̀ ma buuru pɔrɔ ma lɛ-a, hinlaa ta màn woo màn nɛ, Lawa dɔlɔ babaraa bɔ masɛ ganaa!» 36Zaman lɛ tumaa bɛ dɔ̃, á kɔɔ̃n kɔ ǹ ganaa. Kii bɛ́ á goã sii mɛn tumaa zɛnɛɛ dinin, bɛ na á goã kɔɔ̃n zaman lɛ tumaa ganaa. 37Bɛa pinaa kɛ lɛ nɛ, zaman lɛ tumaa laanka Izirayeli min tumaa dɔ̃ mà Davida gɔn ba Nɛɛrɛ a nɛgiĩ Abnɛɛrɛ a gɛ̀ sii lɛ-n wa. 38Kii tɔ́n pɛ a dí-nyalin manɛ: «Ka a doɛ̃ mà ǹ nə́ kaa nyɛɛnaandɛnaa gole goon dɛ Izirayeli gána-n pelo wa? 39A laanɛ ká masɛ bɔ ká ma koa kii lɛa, ma pàã á tɔn kiɛɛrɛ. Minin kɛn, Seruzaa a nɛgiĩn kɛn lɛn, ǹ pàã á gole á la maa wɔ nɛ. Dɛnaa Lawa die a min baraa saraa a kɔnpɛ ka a baraabaa nɛ.»
San Bible Protestant Edition © Bible Society of Burkina Faso, 2011.