Sam2 22
22
Davida gɔ̀lɔ̀baa ǹ loe mɛn lɔ á barka da Lawa nɛ
(Loe 18.1-50)
1Dɛnaa Lawa Davida si a zɔ́ɔn tumaa la ǹ mɛn pinaa, a si Sayulu din la ǹ mɛn pinaa, Davida na á bɛ lɛ a loe lɔ á pɛ:
2Dɛnaa Lawa n ma tamaali lɛa,
a din nə maa duru ǹ bǎã lɛa,
a din nə maa si sii la wole lɛa.
3Lawa n ma tamaali lɛa,
man kiɛ a din yele.
A din nə maa goóro lɛa,
a din pàã kɛ n ma kirisibiɛ.
A din nə maa baa si a duru ǹ
bǎã lɛa.
E, ma kirisibaali,
ń ma kanbaa min kakaarɛn
kɛn ganaa.
4Masɛ n Dɛnaa Lawa para pii.
Ma bɛ́ má bíi,
má gɔ̀lɔ̀baa si maa zɔ́ɔn lɛn la.
5Gɛ̀ na á goã á n gɔn lɔɔ ma nɛ,
a na á n baa mu gole a min
kũ lɛa,
mà a ma papaã.
6Bǎã babaraa kɛ gɔn na á goã
ma ganaa,
gɛ̀ na á goã á kan koa ma nyɛɛnɛ.
7Maa fuu gɔ́ɔ̃ nɛ,
má lɛ dia Dɛnaa Lawa la,
má lɛ dia maa Lawa la.
Á n toa a bǎã sonbore kɛ nɛ,
á ma lɛ ma,
maa lɛ-dɛ kaa a too ne.
8Bɛa biikoo li, tán bìn da,
a giala bɔyaa.
Lon a bìbìn nə́ bìn da.
Maǹ nə́ bìn da,
a giala Dɛnaa foo na á yoo.
9A nyin gɔ́ɔ̃ yii n tɛmaa boe,
tɛ babaraa n soe a lɛ-n,
kun ka tɛ nàn nɛ boe a paǹ yii-a.
10Dɛnaa Lawa lon toɛ̃, á gisĩ.
Á gisĩ ka labara kaara nɛ
a gòãn giulun.
11A n giã-n lon màn yiikoonaa la,
a n piɛ̃ ka nyàa ka na-a,
a n yui ka piɛ̃ bɛ́ lɔn.
12A na á goã durii-n wɔlɔ tì li.
Á bɛ baa a giã ǹ bǎã lɛa.
Á labara tìtìn pɛnɛ a din-a,
mu bɛ́ labaran mɛnɛn nɛ.
13A bɛ́ tɛ pii die,
labaran kɛn man baa sii,
la gii kɛ n boe lon kiɛ,
a n tɛ pii yɛlɛlɛ yɛlɛlɛ.
14Dɛnaa Lawa paraa lon papapã,
lon a Lawa gole boo da.
La gii kɛ n boe lon kiɛ,
a n tɛ pii yɛlɛlɛ yɛlɛlɛ.
15Á kiɛ kaã bɔ, á zɔ́ɔn kɛn pɛsɛ̃,
á paparaa, á ǹ sasawaa.
16Dɛnaa Lawa bɛ́ á gini,
a foo bɛ́ á busu á la yii ni,
á tàn mu piɛ̃,
á kanaa giala da kanaa.
17Dɛnaa Lawa nə́ n toa lon,
á n gɔn dia.
Á ma saa, á ma bɔ mu gole kɛ bii.
18Á ma si maa zɔ́ɔ kakan kɛn la,
maa zɔ́ɔn mɛnɛn lɛn pàã á ke
á la ma nɛ.
19Ma pàã tumaa bɛ́ á nya
ǹ mɛn pinaa,
ǹ nə́ yoo ma gialaa,
sɛnɛ, Dɛnaa Lawa daa n dɔ ma lɛ.
20Á ma si á ma da,
a na á ma si á ma da,
a giala a tá ma narɛ.
21Dɛnaa Lawa na á ma kũ
maa peperebaa li.
A na á ma saraa,
á kɔnpɛ ka maa sii la baã nɛ.
22A giala,
má kɔ Dɛnaa Lawa a zii lɛ,
má kɔ lɛ ka
bɔlɔgoondɛnaabaa nɛ,
man piã ka maa Lawa lɛ-n wa.
23Má n yiri koa a dí-pɛn lɛn li,
man piã ka a dùũ siin kɛn nɛ wa.
24Má n nyɛnaa sii baraa nɛ,
a zɛ̀rɛ ba ma ganaa wa.
25Dɛnaa Lawa na á ma saraa,
á kɔnpɛ ka maa peperebaa nɛ,
a na á ma saraa,
á kɔnpɛ ka maa sii la baã nɛ.
26Bɛ̀ min mɛn tá
bɔlɔgoondɛnaa lɛa,
n dɔ n bɔlɔgoondɛnaabaa
sii zɛnɛɛ bɛ nɛ.
Bɛ̀ min mɛn a sii á pepere,
n dɔ n peperebaa sii zɛnɛɛ bɛ nɛ.
27Bɛ̀ min mɛn nə́ n gɔ́ɔ̃ kaa n nɛ,
n dɔ nə n gɔ́ɔ̃ kiɛ bɛa dɛnaa nɛ.
Sɛnɛ, bɛ̀ min mɛn nə́ n gɔ́ɔ̃ tii n-a,
n dɔ nə ǹ dɛnaa kuĩ a gɔ́ɔ̃ tìbaa li.
28Min mɛnɛn bɛ́ n dinin gisĩ,
n nə n bɛa dɛnan kirisibiɛ.
Min mɛnɛn bɛ́ n dinin gole koe,
n nə n bɛa dɛnan gisĩ.
29Taãn nɛ,
n din nə toɛ ma yii á koo.
Dɛnaa Lawa, maa Lawa,
n din nə wɔlɔ fúlu boe ma nɛ.
30Man die woe zia-baalin
gialaa ka n din pàã nɛ.
Man die boe ǹ la ka maa
Lawa pàã nɛ.
31Lawa din a zii lɛ n pepere,
bɛ̀ Dɛnaa Lawa boo mɛn da
a n goɛ̃ bɛ-a.
A n ka goóro bɛ́ lɔn,
min mɛn tumaa bɛ́ kiɛ a yele,
a n bɛn tamaɛ.
32A giala,
die kɔsɔ n Lawa lɛa kəni,
bɛ̀ n din bie wa, Dɛnaa Lawa?
Die kɔsɔ n wɔ tamaɛ,
bɛ̀ wɔa Lawa kɛ bie wa?
33Bɛa Lawa lɛ n maa duru ǹ
bǎã sonbore lɛa.
A din nə zii lɛ wɛɛ ma nyɛɛnɛ.
34 #
Abak 3.19
A din nə toɛ ma gòã á siɛ
ka yuùnun wɔ bɛ́ lɔn.
A din nə ma tamaɛ kele la.
35A din nə ma darɛɛ
zia-baa ganaa.
A din nə ma darɛɛ sa kaka#22.35 Sa kaka: Sa mɛn bɛ́ ǹ ná a gɔn zɛnaa ka zan tã nɛ.
zuĩ ganaa.
36N din nə́ n kirisibaa kɔ
ma la goóro lɛa.
N din gɔn na á n dɔ ma lɛ.
N din a bǐɛ̃baa kɛ na á màn
da ma li.
37N din nə toɛ ma gòã á siɛ fufuu,
n din pàã nɛ,
ma gòã din ba talɛɛ wa.
38Má maa zɔ́ɔn lɛn loo má dɔ ǹ-a.
Bɛ̀ ma ǹ nya wa,
ma ba n bɔyɛɛ wa.
39Man die kɛn pɔpɔsɛ,
ǹ nə́ ǹ ba boe la ǹ yoo doo wa.
Maǹ die kiɛ tán ma gòãn giulun.
40N din nə́ n ziabaa ǹ pàã kɔ ma la,
ń maa zɔ́ɔn lɛn pusu n nə́ ǹ kɔ ma la.
41N din nə toɛ maa zɔ́ɔn lɛn
tá baa sii ma nyɛɛnɛ.
Min mɛnɛn bɛ́ ma biɛ zɔ́ɔ,
ma á re bɔ̀n diɛ bɛn-a.
42Ǹ tá re n lɛ dii,
min ba re yii a ǹ kirisibaa wa.
Ǹ tá re n lɛ dii
Dɛnaa Lawa ganaa,
a re ǹ lɛ sii wa.
43Má ǹ suu ka gusuũ bɛ́ lɔn piɛ̃ li,
má tɔtɔrɔ ǹ la ka bɛrɛɛ bɛ́ lɔn
zii giala-a.
44Ń ma kanbaa maa zaman
kɛa gòãn-dii ganaa.
Ń ma koa tɔrɔn mìi la,
tɔrɔn mɛnɛn dinin bɛ́ ma a
ǹ doɛ̃ wa,
bɛn nə́ ke dí nyɛɛ ma nɛ.
45Tiin man kiɛ tán ma giulun.
Bɛ̀ má dí pɛ ǹ nɛ lɔn,
maǹ ma lɛ sii.
46Gána kɔsɔ minin nə́ ma lɛ wɔ,
tiin nə́ ma bebele ǹ nə́ fɔ̃ ma li.
Ǹ dinin nə́ soo ǹ duru ǹ bǎãn nɛ,
ǹ gɔ̀nɔn nə́ bìn diɛ.
47Dɛnaa Lawa á boe sii la.
Ma tamaali ni, ma á barka diɛ nɛ.
Lawa n ma kirisibaali lɛa,
ma na a din tɔ boe.
48Bɛa Lawa lɛ n maa gɛ̀ dòo boe,
a din na á ma koa tɔrɔ kɔsɔn
mìi la.
49Dɛnaa Lawa,
n din nə ma kanbiɛ maa
zɔ́ɔn ganaa,
n din nə ma biɛ gɔ̀lɔ̀ lɛa maa
zɔ́ɔn kɛn mìi la,
n din nə ma kanbiɛ min
kakaarɛn kɛn ganaa.
50 #
Rɔm 15.9
Bɛ lɛ n ke, Dɛnaa Lawa,
ma á re n tɔ boe tɔrɔn bii.
Ma á re loe loe,
ma n tɔ guguru kɔ nɛ.
51Dɛnaa Lawa din kii mɛn bɔ,
a din na á sii dadaran zɛnaa,
á gɔ̀lɔ̀baa kɔ la.
A din kii mɛn koa,
a din na á kɔn-narɛɛ gole nyaa bɛ nɛ,
Davida laanka a tɔrɔn manɛ
yǎa duduu.
San Bible Protestant Edition © Bible Society of Burkina Faso, 2011.