Sam2 1
1
Davida Sayulu a gɛ̀ boo ma ka yɔrɔ mɛn nɛ
1Sayulu a gɛ̀ kio ne, Davida nə́ n bɔyaa á daa giã Siklagi kiwi lɛawaa paa. Bɛ á zɛnɛɛ, bɛ̀ á Amalɛki tɔrɔn kɛn dɛ. 2A lɛawaa sɔɔbaa ǹ wɔ pinaa, bɛ̀ giĩ goon nə́ ke boe Sayulu li, ziabaa ǹ bǎã nɛ die. A mɔnaan tumaa na á goã pɔpɔsiɛ nɛ, a mìi yii n tii lɛa. A bɛ́ á daa á dɔ Davida li, á na á kaa tán, á n mìi zuməə tán. 3Davida tɔ́n nɔ̀n da la: «Ma n boe maa?» Giĩ lɛ ná a lɛ si: «Man má baa si Izirayeli minin ziabaa ǹ bǎã nɛ.» 4Davida wusoo á nɔ̀n da la: «Sii lɛ na á n baa lɔn? Bǐɛ̃ kɔ, n na a yɔrɔ pɛ ma nɛ.» Giĩ lɛ tɔ́n pɛ: «Zia-baalin lɛn nə́ baa da zaman lɛ gòã li. Zaman lɛ din a gigiã gã. Sayulu laanka a nɛgiĩ Zonaatan dɔ din gã.» 5Tɔntɔraagiĩ mɛn da boo lɛ pɛ, Davida wusoo á nɔ̀n da bɛ la kɛnɛn: «Ma n siɛ lɔn ń tá doɛ̃ mà Sayulu gã, ka a nɛgiĩ Zonaatan dɔ nɛ?» 6#Sam1 31.1-6; KZS1 10.1-6Tɔntɔraagiĩ lɛ tɔ́n pɛ nɛ: – Sii lɛ bɛ́ n zɛnɛɛ, bɛ̀ masɛ n Gilboa kele la. Ma bɛ́ giɛ, bɛ̀ Sayulu á ke walan n din we a sɛmiɛ̃ lɛ, zɔ́ɔn ziabaa ǹ wotoron laanka sùidɛnan nə́ giɛ li ǹ nə́ doe a ganaa. 7A bɛ́ á n yɔrɔ bɔyaa á masɛ yɛ, a na á lɛ dia ma la. Má a lɛ si máa ma á ke! 8Á nɔ̀n da ma la: «Die-n ka nsɛ nɛ?» Má tɔ́n pɛ nɛ máa man Amalɛki tɔrɔ lɛa. 9Bɛ kio, á pɛ ma-n kɛnɛn: «Bǐɛ̃ kɔ, n zɔ̃ n nə n mɔrɔ, n golee n ma nyin bɔ. A giala, yii-tii n ma gialaa, haalɛ ta á daa yaa maa fɔ̀foã tumaa tá ma-n bɔrɔ.» 10Bɛ lɛ nɛ, ma golee a li má dɛ. A giala, ma á doɛ̃ má a re liɛ a mɛnaa kɛ kio wa. Kii bafolo mɛn goã a mìi ganaa, zan mɛn dɔ goã a gɔn ganaa, ma bɛn waa má daa ǹ kɔ maa dɛnaagiĩ la kànaa.
11Foo ziziɛ̃ gɔn, Davida ná a mɔnaan kũ á ǹ tɔtoɛ̃. A tá-kun wolen tumaa zɛnaa miɛ̃. 12Ǹ nə́ gɛ̀ lɛ koa. Ǹ nə́ wuu pɛ, ǹ nə́ n lɛ sɔɔ yǎa wasa mɛ, Sayulu laanka a nɛgiĩ Zonaatan taman yii, Dɛnaa Lawa a zaman kɛ taman yii, ǹ mɛnɛn tumaa bɛ́ Izirayeli minin lɛa, ǹ nə́ gã zia la. 13Tɔntɔraagiĩ mɛn da boo lɛ pɛ Davida nɛ, Davida wusoo á nɔ̀n da la: «Ma n boe maa?» Á ná a lɛ si mà asɛ n Amalɛkin giĩ goon a nɛgiĩ lɛa, asɛ di n gùli lɛa gána kɛ nɛ. 14Davida tɔ́n pɛ nɛ: «Kɛ na á saa lɔn? Dɛnaa Lawa kii mɛn bɔ á koa, wàa na á baa, n nyɛ́ɛ baa bɛa dɛ-n wa?» 15Bɛ kio, Davida lɛ dia a dí-nyali goon la, á pɛ nɛ: «N zɔ̃ n dɔ, n dɛ.» Bɛ́ Amalɛki tɔrɔ lɛ dɛ á gã. 16Ǹ bɛ́ dii, Davida na á goã pii ni: – N gɛ̀ lɛ a koen nə goã n din mìi ni. A giala, n din lɛ na á n da sii ni. A na á pɛ kɛnɛn: «Dɛnaa Lawa kii mɛn bɔ á koa, ma din ni má dɛ.»
Davida wuu mɛn pɛ Sayulu laanka Zonaatan a gɛ̀ li
17Davida tɔ́n loe kɛ lɔ Sayulu laanka a nɛgiĩ Zonaatan li. 18#Zoz 10.13 Sa koa ǹ loe ne, á pɛ mà ǹ Zudaa tɔrɔn daraa a ganaa. Ǹ bɛ́ sɛ́wɔ mɛn bíi "min sonbore a sɛ́wɔ", bɛa loe lɛ á kiɛ̃-n walan kɛnɛn:
19E, Izirayeli,
n tɔ lɛ papaã n kelen la,
giĩ foo taãnaan lɛn nə́ bɔ ǹ nə́ kaa zia la.
20Ka nyan kɛ laakalaa Gaati kiwi wa,
ka nyan kɛ boo da Asikalɔn ziin kɛn la wa.
Bɛ bie wa,
Filisiti nɛnɛn kɛn tá re n nyɛnyɛɛ.
Soroman kɛn nɛnɛn tá re paparɛ foo kɔɔ̃nbaa gɔn.
21Gilboa kelen lɛn,
pele nyan kɔ ka la doo wa,
la nyan kaa ka la doo wa.
Wuru nyan yɛ walan doo,
ǹ màn lɛ bibinaa bɔ a-n wa.
A giala, walan lɛ nɛ,
zia-baalin goóro *gɔ̀ baa.
Sayulu a goóro ke,
nyɔɔ goã n loe a ganaa wa,
22yǎa zɔ́ɔn mà,
yǎa zia-baalin kɛn nyɔɔ.
Zonaatan a sa goã n nyɛnɛɛ min ni wa,
Sayulu a gɔya sa kɛ goã n bɔyɛɛ gere wa.
23Sayulu laanka Zonaatan sii goã kɔɔ̃n minin ganaa parsiini.
Yiikoonaabaa gɔ́ɔ̃ nɛ,
gɛ̀ gɔ́ɔ̃ nɛ, ǹ nə n na kɔn wa.
Ǹ yii goã fuu ǹ nə́ la giogialatã-an manɛ,
ǹ nə́ goã kaka ǹ nə́ la yàran manɛ.
24Izirayeli nɛnɛn lɛn,
ka wuu pɛ Sayulu li.
A din na á goã mɔnaa tã sonbore giɔ̀mɔ kaka-an we ka ganaa.
A din na á nyaǹ bɔ ǹ mànan kaa kaa dɔnkɛn paǹ tumaa ganaa, sana lɛa.
25Giĩ foo taãnaan lɛn nə́ mɛnaa zia bii,
Zonaatan gere á tán kele la.
26Ma dɔɔ̃n Zonaatan,
ma foo ziziɛ̃maa-n parsiini n din a lɛa.
N sii goã kaka ma ganaa á la yii ni.
N giaárabaa lɛ na á goã kaãbaa diɛ ma ganaa.
Á goã siĩni á la giĩ a lɔ narɛɛ nɛ.
27Giĩ foo taãnaan lɛn nə́ kaa,
ziabaa ǹ mànan lɛn nə́ ziziɛ̃ kəni!
San Bible Protestant Edition © Bible Society of Burkina Faso, 2011.