Kiin2 3
3
Izirayeli gána laanka Moabu gána a zia baa kɔn
1Akaabu a nɛgiĩ Zoramu kii baa Izirayeli gána mìi la, Samarii kiwi, Zudaa gána a kii Zozafati a kiibaa lɛ̀ fulukiwisibaa ǹ wɔ li. Zoramu na á kiibaa zɛnaa lɛ̀ fulupaa. 2Sii mɛn bɛ́ baraa Dɛnaa Lawa yii li, Zoramu na á goã bɛ zɛnɛɛ, sɛnɛ a bie ka a na á goã ǹ di laanka ǹ dan wɔ kɛ miã tɔrɔ zɛnɛɛ wa. Ǹ di goã á tíĩ mɛn doa *Baali wɔ lɛa, Zoramu bɛ din wuru. 3Sɛnɛ Nebaati a nɛgiĩ Zeroboamu goã á Izirayeli minin da sii baraa mɛn a zɛnaa ganaa, Zoramu gɔn na á goã paraa-n bɛa zɛnaa ganaa, a n bɔ a zɛnaa wɔlɔ li wa.
4Moabu gána a kii Mesia na á goã tɔɔn toe. A na á goã sère ten duu paabiɛ (100 000) laanka sère gɔ̀lɔ̀ gusugə duu paabiɛ koe Izirayeli gána a kii lɛ la, nyin giɔ̀mɔ lɛa lɛ̀ woo lɛ̀. 5Sɛnɛ Izirayeli gána a kii Akaabu bɛ́ á gã, Moabu gána a kii lɛ nə́ n gòãn dii Izirayeli gána a kii ganaa. 6Kii Zoramu lɛ tɔ́n yoo gɔrɔ á soo á n bɔ Samarii, á Izirayeli a sɔraasin tumaa nimi. 7Bɛ kio, á yoo á zii saa, á minin dia woe pii Zudaa gána a kii Zozafati-n kɛnɛn: «Moabu gána a kii na á n gòãn dii ma ganaa, n tá re woe zia biɛ kun ka ma nɛ, Moabu gána lɛ ganaa ya?» Zozafati tɔ́n na a lɛ si: «Ma á woe. Man die n gòɛ̃ we zia lɛ nɛ ka n din bɛ́ lɔn. Maa zaman gòɛ̃ tá re goɛ̃ zia lɛ nɛ ka n wɔ bɛ́ lɔn, maa sùin gòɛ̃ tá re goɛ̃ a nɛ ka n wɔn bɛ́ lɔn.» 8Zozafati nə́ n toa doo: «Wɔ n die boe ka zii mɛn nɛ?» Zoramu ná a lɛ si: «Edɔmu a diə gole zii ke.»
9Bɛ kio, Izirayeli gána a kii ni, ka Zudaa gána a kii laanka Edɔmu gána a kii yoo ǹ nə́ zii saa. Ǹ bɛ́ ǹ nə́ dɔ lɛawaa sɔbaa zii la, ǹ mu nya ǹ ganaa. Mu goã a tan sɔraasi lɛn tá mii wa, tɔɔn mɛnɛn dɔn nə goã koe ǹ lɛ, a goã a tan bɛn dɔn tá mii wa. 10Izirayeli gána a kii tɔ́n nə n toa: «Bɔ̀n! Dɛnaa Lawa na á lɛ dia kii sɔɔ kɛ la, á n die ǹ we Moabu gána minin gɔn.» 11Kii Zozafati nɔ̀n da: «Dɛnaa Lawa a boo gii-dali ba kànaa, wɔ n boe la wɔ n doa a ganaa, a nɔ̀n da Dɛnaa Lawa la wa?» Izirayeli gána a kii a dí-nyali goon boo saa á pɛ: «Safati a nɛgiĩ Yiliizee lɛ, á goã dí nyɛɛ Yilii giulun, bɛ tá kànaa.» 12Zozafati nə́ n toa: «Dɛnaa Lawa a boo gii-dali taãn nɛ.» Izirayeli gána a kii ni, ka Zudaa gána a kii laanka Edɔmu gána a kiin lɛn nə́ tɔ́n kiɛ̃, ǹ nə́ woo Yiliizee li. 13Yiliizee pɛ Izirayeli gána a kii lɛ nɛ: «Wàa dɔ n wɔsɛn bii ni? N di laanka ǹ dan goã woe Lawa a boo gii-dalin soɛ-bɔlin mɛnɛn lɛn li, wo bɛn lɛn li.» Izirayeli gána a kii lɛ ná a lɛ si: «Haayii! A giala Dɛnaa Lawa na á lɛ dia kii sɔɔ kɛ la, á n die ǹ we Moabu gána a kii gɔn.» 14Yiliizee pɛ: «Dɛnaa Lawa Pàãyiidɛnaa Yiikoonaa mɛn bɛ́ masɛ n dí nyɛɛ nɛ, bɛ lɛ tɔ taman yii, bɛ̀ ma bie n taasɛ Zudaa gána a kii Zozafati a lɛa wa, ma ba n yiri goon din diɛ li, ma ga n ganaa dinin wa. 15Kanna, ka da ka kɔnkoɛɛ̃-dɛli ni masɛ li.» A kɔnkoɛɛ̃-dɛli lɛ toa kɔnkoɛɛ̃ dii, Dɛnaa Lawa Pàã goã Yiliizee la. 16Yiliizee nə́ n toa: «Dɛnaa Lawa mà ka nyankɔrɔ didi fɔ̃ tán nyankɔrɔ lɛ kɛ nɛ. 17Dɛnaa Lawa mà ka a re piɛ̃ yii boe wa, ka a re la yii kiɛ wa, sɛnɛ, nyankɔrɔ lɛ dɔ n die piɛ̃ ka mu ni, ka tá re boe la ka mu mi, ka dinin ni, kaa sɔraasin laanka kaa tɔɔn nɛ. 18Sɛnɛ, bɛ din ba màn kɔn lɛa Dɛnaa Lawa yii li wa, a tá re Moabu minin lɛn dɔn we ka gɔn. 19Kungɔn bɛ́ ǹ kiwin mɛnɛn ganaa, ka á re bɛn kɛbɔlɔ kiɛ, ka ǹ kiwin mɛn tumaa bɛ́ barka nə́ ǹ nɛ. Ka á re ǹ da nɛ-kɔlen tumaa kiɛ, ka ǹ mu pìãn tumaa tã, ka kɔlɔn kaa tán ǹ buu kɔsɔ ǹ bǎã sonboren ne, ka ǹ ziziɛ̃.» 20Baayɛlɛ, *wúlu màn tiɛ̃ biikoo li, bɛ̀ mu á ke á n toa Edɔmu gána li, á baa si á daa gána lɛ pã.
21Moabu gána minin tumaa ma, mà kii sɔɔ lɛ na á daa mà maǹ zia biɛ ǹsɛn ganaa, giĩn mɛnɛn tumaa lɛ̀ bɛ́ á dɔ ziabaa ganaa, ka min mɛn tumaa bɛ́ a lɛ̀ kiɛ̃ ziabaa la, ǹ nə́ lɛ dia bɛn yii la, ǹ nə́ n doa gèlè la. 22Ǹ bɛ́ ǹ nə́ yoo baayɛlɛ, wasa yooreen bɛ́ mu lɛ dii tɛ pii, Moabu gána minin lɛn nə́ mu yɛ tán ǹ nyɛɛnɛ ka n pɛ mà mà nɛ. 23Ǹ nə́ tɔ́n nə n toa: «Mà nɛ! Kiin lɛn dinin man nə́ yoo kɔn gialaa ǹ nə́ kɔn dɛ. Ka daa wɔ wo ǹ mànan kokoo sisia.» 24Ǹ nə́ woo ǹ nə́ dɔ Izirayeli minin giã ǹ bǎã nɛ, yǎa Izirayeli minin lɛn nə tɔn yoo ǹ nə́ ǹ dɛ. Moabu gána minin lɛn nə́ tɔ́n nə n gòã da baa nɛ ǹ nyɛɛnɛ. Izirayeli minin lɛn nə́ woo ǹ kio Moabu gána nɛ ǹ nə́ ǹ dɛ. 25Ǹ nə́ ǹ kiwin ziziɛ̃, buu kɔsɔ ǹ tánan mɛnɛn bɛ́ siĩni, ǹ nə́ kɔlɔn zuzũ tán bɛn yii ni, ǹ gɔ́ɔ̃ pã. Mu pìãn mɛnɛn bɛ́ ǹ tan, ǹ nə́ ǹ tumaa tatã, ǹ nə́ da nɛ-kɔlen tumaa kaa. A na á n zɔ̃ á goã Kiiri-Erɛsi kiwi ni, sɛnɛ baragii-zũlin nə́ bɛ lɛ dɔ lɛnpɛnɛ, ǹ nə́ kũ ka zia nɛ. 26Moabu gána a kii yii bɛ́ a ganaa, zia lɛ pàã la nɛ, á giĩ gɔya zia-baali biɛsɔbaa (700) kũ á ǹ kaa kun ka a din ni, mà maǹ boe ǹ zɔ̀ɔn lɛn bii kiɛ̃ woe Edɔmu gána a kii li, sɛnɛ ǹ nə́ fɔ̃ li. 27Moabu gána a kii lɛ gɔn binaa mɛn bɛ́ nɛginin lɛa, a kiibaa lɛ doamaa nɛ a n doe a ganaa, á bɛ kũ á wúlu bɔ nɛ kiwi lɛ a kungɔn la. Moabu minin lɛn foo yoo Izirayeli minin lɛn li parsiini, Izirayeli minin lɛn nə́ n wɔlɔ lui Moabu gána a kii lɛ ganaa, ǹ nə́ n bɔyaa ǹ nə́ woo ǹ gána nɛ.
San Bible Protestant Edition © Bible Society of Burkina Faso, 2011.