Sam1 2

Anɛɛ a fòo da ǹ loe

1 # Luk 1.46-55 Anɛɛ Lawa nyankɔ á pɛ:

«Dɛnaa Lawa pàã nɛ,

ma foo á kɔɔ̃n nɛ,

Dɛnaa Lawa pàã nɛ,

ma mìi á lon.

Ma á boe la ma yaa wɔ maa

zɔ́ɔn kɛn ganaa.

Ma nə n nyɛnyɛɛ a giala,

ń ma kanbaa.

2Dɛnaa Lawa miã banban

ka siĩnbaa-n wa.

Dɛnaa Lawa kɔsɔ banban,

bɛ̀ n din lɛ bie wa.

Màn kɔsɔ a wɔ tamaɛ ka

wɔa Lawa bɛ́ lɔn wa.

3Ka baran din golee kɔ ǹ

boo mɔnaa wa.

Ka baran din koa ǹ boo da wa.

Lawa mɛn bɛ́ sii-dɔɛ̃,

bɛ n ka Dɛnaa Lawa nɛ.

A din ni minbuiinin zɛnaa ǹ

sii tumaa a kiri kuri.

4Pàãdɛnan sa yiɛ.

Pàãwɛnaan nə́ pàã yɛ.

5Min mɛnɛn nə́ goã kiɛ̃ nɛ,

sisia, bɛn man dí nyɛɛ.

Man giɛ ǹ lɛ-a ǹ bii li.

Sɛnɛ bòonaan ba dí nyɛɛ doo wa.

Lɔ mɛn din bɛ́ a nɛ yii wa,

bɛ́ nɛ sɔbaa yɛ,

sɛnɛ ǹ mɛn nɛ gigiã yɛ,

nɛ ba bɛ gɔn doo wa.

6Dɛnaa Lawa din ni nyin koe,

a din ni sii.

A din ni min diɛ geren piɛ

a din dɔ n min kanbiɛ a ganaa.

7Dɛnaa Lawa din ni min biɛ doobaa lɛa

a din ni min dɔ biɛ pàãma lɛa.

A din ni min kiɛɛrɛ koe a din

dɔ n min siɛ lɔn.

8A n pàãwɛnaa sii gusuũn la.

A n doobaa dɔ kuĩ tonton bɔlɔ la,

a ǹ kaa tán kun ka min

dadaran nɛ,

a bǎã tɔnaa kɔ ǹ la.

A giala, tán a bìbĩn lɛn

man Lawa wɔn lɛa,

a na á kanaa lɛ giala doa bɛn la.

9Min mɛnɛn bɛ́ a wɔn lɛa,

a n bɛn tamaɛ,

sɛnɛ sii baraa-zɛnaalin

man papaɛ̃ wɔlɔ tì li.

A giala, minbuiin nɛ ba boe la

a gɔ̀lɔ̀ baa ka a din pàã-n wa.

10Dɛnaa Lawa a zɔ́ɔn tá re zɔzoɛ,

lon a Lawa tá re n toɛ lon

a paraa ǹ li.

Lawa tá re kiri we tán

kuturu ganaa.

A tá re pàã koe a kii la.

A din kii mɛn bɔ á koa,

a n bɛ mìi siɛ lon.»

11Ɛlkaana nə́ n bɔyaa á woo piɛ Ramaa. Nɛ lɛ sɛ goã dí nyɛɛ Dɛnaa Lawa nɛ, Lawa a wúlu-bɔle Yiili giulun.

Yiili a nɛgiĩn

12Yiili a nɛgiĩn lɛn man nə́ goã min gɛsɛn lɛa, ǹ goã Dɛnaa Lawa doɛ̃ wa. 13A laanɛ ǹ tá Lawa a wúlu-bɔlen lɛa, maǹ nə́ goã sii zɛnɛɛ zaman lɛ nɛ yɔrɔ kɛ la: bɛ̀ min ná a *wúlu màn dɛ, siĩ lɛ a kɔrɛɛ biikoo li, Lawa a wúlu-bɔle a dí-nyali n die ka siĩ fɔ̃ ǹ bàlà nɛ a gɔn. 14A n siɛ a dere siĩ màn lɛ nɛ. Bɛ̀ siĩ fɔ̃ ǹ bàlà lɛ kɔnpɛ ka ǹ mɛn nɛ, Lawa a wúlu-bɔle lɛ din ni nɔmɛ bɛ ganaa. Izirayeli min mɛn tumaa goã woe Lawa a kion, Siiloo, maǹ nə́ goã zɛnɛɛ ǹ nɛ miɛ̃. 15Ǹ tɛn din ni, Lawa a wúlu-bɔle a dí-nyali lɛ ba toɛ siĩ nyɔɔ lɛ nə n tã#2.15 siĩ nyɔɔ lɛ nə n tã: A kɔnpɛ ka wúlu bɔ ǹ landa nɛ, LWS 3 nɛ, man wúlu màn lɛ a nyɔɔ tiɛ̃ bibinaa nɛ. bɔrɔ wa, a n die pii wúlu màn-dɛli lɛ nɛ kɛnɛn: «Siĩ kɔ ma la, ma tã Lawa wúlu-bɔle wɔ lɛa. A die lɛ koe a siĩ kɔrɛɛ si n la bɛ̀ a fumaa ná a bie wa.» 16Bɛ̀ giĩ lɛ pɛ nɛ mà siĩ nyɔɔ lɛ doa nɛ a n tã bɔrɔ, bɛ kio, bɛ̀ a tá ǹ mɛn li a tɔn bɛ saa, dí-nyali lɛ na a lɛ si kɛnɛn: «Haayii, n doama nɛ n kɔ ma la sisia, bɛ̀ bie wa, man sii ka pàã nɛ.» 17Nɛ tenən lɛn sii baraa gole kɔ parsiini Dɛnaa Lawa yɔrɔ-a, a giala, ǹ nə́ goã barka boe Dɛnaa Lawa a wúlu màn lɛ nɛ.

Samayeli a tá Siiloo

18Samayeli sɛ na á goã dí nyɛɛ Dɛnaa Lawa yɔrɔ-a. A bɛ́ nɛnyaan lɛa, dí nya ǹ mɔnaa yii nɔnɔɔ sonbore na á goã a ganaa. 19Lɛ̀ tunaa nɛ, ǹ dan na á goã dɔnkɛ tiɛ̃ bɛ̀ a kɔ la, bɛ̀ ǹ laanka ǹ zuũ tá woe lɛ̀ li ǹ wúlu boe ǹ mɛn waáraa. 20Yiili na á goã barka diɛ Ɛlkaanaa laanka a lɔ ganaa bɛ̀ á n pii. «Nɛ mɛn nə́ n kɔ Dɛnaa Lawa la ke, Dɛnaa Lawa die a toa n nɛ kɔsɔn yɛ n lɔ lɛ ganaa bɛ lɛ dòo.» Bɛ kio, ǹ nə́ wusoo ǹ nə́ woo piɛ. 21Dɛnaa Lawa bǐɛ̃ kɔ Anɛɛ ganaa, á wusoo á nɛnyaanan kɔsɔn yɛ, nɛgiĩ sɔɔ ka nɛlɔ paa nɛ. A nɛginin Samayeli dɔ goã gole koe, bɛ̀ á n kun ka Lawa nɛ.

Elii a nɛnyaanan boo

22Yiili goã á zizi kɔ parsiini. A nɛgiĩn lɛn nə goã sii mɛn zɛnɛɛ Izirayeli minin tumaa nɛ, á bɛa boo ma minin lɛ-n. Lɔn mɛnɛn nə goã soe-n kɔn kɔn yɛ ǹ kion kɛa kiɛnlɛ-a, á ma dɔn mà ǹ nə́ goã giɛ̃ kun ka bɛn nɛ. 23Á pɛ ǹ nɛ mà wàa na á baa ǹ tá siin kɛn miãn zɛnɛɛ? Mà asɛ bɛ́ nya ǹ dí baraan mɛnɛn miɛ ǹ wɔ paǹ li, mà bɛ lɛ n zaman tumaa lɛ-n. 24Mà asɛ nɛnyaanan lɛn ganaa, mà ǹ bɛ lɛ da. A giala, mà asɛ bɛ́ boo mɛn miɛ pɔpɔpɔ nɛ, Dɛnaa Lawa a zaman lɛ-n, mà bɛ́ a siĩn wa. 25Bɛ̀ min sii la ǹ miã kɔsɔ la, Lawa n die bɛ yɔrɔ boe. Sɛnɛ bɛ̀ min sii la Dɛnaa Lawa la, die n die yii, a bɛ yɔrɔ bɔ? Sɛnɛ ǹ nə n too kɔ ǹ di lɛ a boo ganaa wa, a giala, Dɛnaa Lawa na á goã giɛ li mà a ǹ nyin bɔ. 26#Luk 2.52 Samayeli sɛ bɛ́ nɛ ten lɛa, á goã gole koe woe nyɛɛnɛ, a sii goã kɔɔ̃n Dɛnaa Lawa laanka minbuiinin ganaa.

27Lawa a boo gii-dali goon n daa Elii li á pɛ nɛ mà Dɛnaa Lawa n kɛ pii: «Á ke, masɛ nə́ n din nyaa n digolon#2.27 ǹ digolon: Bɛ giala Levii tɔrɔn mɛnɛn nə goã Lawa a wúlu boe. lɛn manɛ foãnɛ, a ǹ toa Faarahɔn a bɛ̀rɛbaa gɔ́ɔ̃ nɛ Ezipti gána nɛ. 28#BBN 28.1-4; LWS 7.35-36 N din digolon kɛn lɛn manɛ, má ǹ bɔ Izirayeli tɔrɔn tumaa bii, má ǹ baa maa wúlu-bɔlen lɛa, màn mɛn bɛ́ toɛ ǹ wo *wúlu bɔ ǹ bǎã nɛ, ǹ da yon gìĩ kɔɔ̃n tã, ǹ dí nya ǹ mɔnaa wɔ masɛ yɔrɔ-a. Izirayeli nɛnyaanan bɛ́ wúlu màn mɛn din tumaa tiɛ̃, ma bɛ kɔ n digolo lɛ laanka a tɔrɔn la. 29Wàa na á baa ka tá barka boe masɛ a wúlu màn lɛ laanka masɛ gɔ ǹ màn lɛ nɛ? Ma bɛ́ máa ka ǹ mɛnɛn bɔ maa kion. Wàa na á baa Elii ná a nɛnyaanan narɛ á la masɛ nɛ, a giala, manə ǹ dinin toe ka masɛ a zaman, Izirayeli nɛnyaanan gɔn màn tumaa a sonbore ne. 30Bɛ lɛ na á toa, Dɛnaa Lawa, Izirayeli a Lawa lɛ n kɛ pii: Sonbore ne, masɛ goã má pɛ máa n kion minin laanka n tɔrɔn tá re dí nyɛɛ masɛ nɛ duduu. Sɛnɛ sisia Dɛnaa Lawa n kɛ pii: Bɛ ba masɛ bǎã-n doo wa. A giala, min mɛnɛn bɛ́ ma guguru koe, man die bɛn guguru koe. Sɛnɛ, min mɛnɛn bɛ́ ma puusə koe, bɛn tá re paan biɛ ma gɔn. 31Á ke, biikoo á re doe, bɛ gɔ́ɔ̃ nɛ, man die n kion min tenən laanka n tanlɛ min tenən dii, min zizi din ná a die yii n kion doo wa. 32Ń tá re min kɔsɔ yii wúlu lɛ boe n bǎã nɛ, Izirayeli minin sii tumaa á re bǐɛ̃ koe, Sɛnɛ, min zizi na a die yii nsɛ kɛa kion doo wa. 33Man die n din a min goon toɛ maa wúlu bɔ ǹ bǎã lɛ nɛ màn mɛn bɛ́ toɛ bɛ bɔ n yii ni a n foo busu. N nɛnyaanan mɛnɛn tumaa bɛ́ re n kion lɛ giala boe li, bɛn kɔ́n ba re zizi koe ǹ tɔn gã wa. 34#Sam1 4.11 Sii mɛn bɛ́ re n nɛgiĩ min paa lɛ yii, Ɔfuni laanka Fineyasi, bɛ n die sii a kɔnboe biɛ n gɔn. Ǹ dinin paanan tá re giɛ̃ pinin goon. 35Masɛ n die bɔlɔgoondɛnaa koɛ maa wúlu-bɔle lɛa. A sii zɛnaa tá re kɔnpii ka ma foo dùũ ni. Ma á die toɛ a nɛnyaanan nə wúlu-bɔlen baa miɛ̃ duduu. Ma kii mɛn bɔ, á re tɔ we bɛ yɔrɔ-a biikoo yii li. 36Min woo min, a n die goɛ̃ Elii a kion, bɛ á re die n kurumii tán wúlu-bɔle lɛ giulun, wɔrɔ boɛɛn laanka màn-bii taman yii. Ǹ tá re pii wúlu-bɔle lɛ nɛ, bǐɛ̃ kɔ ma ganaa, n ma goɛ̃ wɔ wúlu bɔ ǹ dí lɛ kɔn nɛ, ǹ giɛ ma tá màn-bii boɛɛn yii ma bii.»

Currently Selected:

Sam1 2: SBPE2011

Highlight

Copy

Compare