Yel‑bũna 2
2
Yam yõodo
1M biiga, fo sã n sak n deeg mam goamã,
la f sã n bĩng m tõodã f sũurẽ,
2fo sã n yok f tʋbr n kelg yam zãmsgã neere,
la f sak n bao tɩ wʋm a võore,
3n yẽe! Fo sã n bao bãngre,
la fo sã n zẽk f koɛɛg n bao yam-sõngo,
4fo sã n bao-a wa f sẽn baood
wanzuri to-to wã, la f sã n maag
f yĩng n bao-a wa f sẽn baood arzegsã,
5woto, f na wʋm Sẽn-Ka-Saab zoees
võore, la f bãng Wẽnnaam.
6Bala, yaa Sẽn-Ka-Saab n kõt yam,
la bãngr ne yam-sõng yita bãmb noorẽ.
7Bãmb tara sõngr nin-tɩrsã yĩnga.
La bãmb yaa gãong burkĩmbã yĩnga.
8Bãmb kogenda neb nins sẽn kẽnd zemsgã soay zutã,
la b gũud pʋ-peelem dãmbã.
9Woto la f na n bãng zemsgo, ne sɩd la
tɩrlem võore, sẽn dat n togs tɩ soay nins
fãa sẽn dabd naar zĩigẽ wã.
10Bala, fo na n paama yam,
la bãngrã na n kõo foom sũ-noogo.
11Tagsgã na n kogla foom,
la bãngrã na n gũ-f-lame,
12n fãag foom so-wẽngã zugu,
la ne ned ning sẽn gomd gom-yoodo,
13la ne neb nins sẽn basd-b tɩrlem soayã,
n kẽnd soay sẽn yaa lik pʋgẽ wã.
14Nin-bãmb maanda sũ-noog ne wẽngã maanego,
la b kɩdemd b tʋʋm-yoodã maaneg yĩnga.
15Nin-bãmb yel-manesmã yaa kɛga,
la b tʋʋmã fãa yaa goalmã.
16Rẽndã n na n fãag foom ne pʋg-yoodre,
la a fãag-f ne pʋg-sãang sẽn gomd
no-noom goamã.
17Sẽn bas-a a bi-bɩɩlem wakatẽ sɩdã,
la a yĩm yẽnda ne a Wẽnnaamã kaoolã.
18Ade, yẽnda yel-manesmã rabda ne-a kũum zĩigẽ,
la a soayã tar-a lame n dabd kɩɩm-kulgu.
19Neb nins fãa sẽn kẽnd-b yẽnda nengẽ wã ka lebgd ye.
Bãmb ka leb n tõe n yãnd vɩɩm sor n tũ ye.
20Dẽ wã yĩnga, bɩ f rɩk nin-sõamyã mamsgo,
la f rɩk nin-tɩrsã mamsgo.
21Bala, yaa nin-tɩrsã n na n vɩɩmd dũni zugu,
La yaa burkĩmbã n na n pa be n vɩɩmde.
22B na n menesa nin-wẽnsã tẽngã pʋga.
La b võ zãmb dãmbã wa mood n yiis tẽngã.
Moore Bible © Bible Society of Burkina Faso, 2014.