Filip‑rãmba 3
3
Maoob tɩ paam bũmb nins sẽn be taoore
1La koɛɛg sẽn keta m ba-biisi, maan-y sũ-noog Zu-soaba tũudum pʋgẽ. Mam ka yɛɛd tɩ leb n gʋls yãmb bõn-kãens ye. La yaa yãmb sõngr yĩnga.
2Gũus-y y mens ne neb nins sẽn wẽnd wa baasã, la y gũus ne tʋʋm-wẽns maandbã la ne sẽn kẽ-b bãong yĩng wɛɛngẽ wã balã. 3Bala, tõnd sẽn waoogd Wẽnnaam ne Sɩɩg-sõng pãnga, n maand sũ-noog a Zeezi Kiris pʋgẽ, n ka teegd yĩngã tʋʋmã, yaa tõnd la zũns sɩd-sɩda.
4Sã n yaa yĩng tʋʋm teegre, mam me ra tõe n teega yĩnga tʋʋma. Neb a taab sã n tẽed tɩ b tõe n teega yĩnga tʋʋma, mam n yɩɩda. 5#Rom 11.1, Tʋʋm 23.6, 26.5Mam lebga zũng mam sẽn wa n tar rasem a nii, mam yaa Israyɛll neda, n yaa a Benzame buudu la Ebre meng-menga. La sã n yaa ne tõog wɛɛngẽ, mam yaa Fariizẽ. 6#Tʋʋm 8.3, 22.4, 26.9-11La wɩngr ne Wẽnnaam tʋʋmdã wɛɛngẽ, mam namsa Kiris tẽedbã, la ne tɩrlem tõog sakr wɛɛngẽ, ned ka tõe n dõd maam ye. 7La bõn-kãens sẽn dag n yaa yõod ne maamã, mam geelga bãmb wa bũmb sẽn ka tar yõodo, Kirisã yĩnga. 8La mam sẽn bãng m fãagd a Zeezi Kiris tɩ rẽ ya sõma wʋsgã, mam pʋs n gesa bõn-kãens fãa wa bũmb sẽn ka yõodo. Kirisã yĩnga, mam sakame n bas fãa, n geelgd bũmb fãa wa sagdo tɩ m tõe n paam Kirisi, 9la m zĩnd bãmb pʋgẽ. Ka ne mam meng tɩrlem, mam sẽn sak tõog n paamã ye, la yaa ne tɩrlem ning ned sẽn paamda, a sẽn tẽed Kirisã yĩnga, tɩrlem sẽn yit Wẽnnaam nengẽ, la sẽn paamd ne tẽebo. 10Mam sẽn dat fãa yaa tɩ bãng Kirisã ne bãmb kũum vʋʋgrã pãnga la m naag bãmb n paam namsgo, n lebg yembr ne bãmb b kũumã pʋgẽ, 11tɩ m sã n tõog bɩ m paam vʋʋgr n yi kũum sʋka.
12Ka tɩ mam zoe n paama m rolbã nanda, wall m tõog n zemsa zãng nand ye. La mam ket n kẽngda taoore, n maoodẽ tɩ gãd-a, bala a Zeezi Kiris zoe n gãda maam. 13M ba-biisi, mam ka tagsd tɩ mam zoe n paama rolbã nand ye, la mam maanda bũmb a yembre: mam yĩmda bũmb nins sẽn be poorẽ wã n nangd pãng n na n paam bũmb nins sẽn be taoorã. 14Mam zoet n dabda taoore, n dat n paam Wẽnnaam arzãn boolg rolbã a Zeezi Kiris maasem yĩnga.
15Dẽ, tõnd fãa sẽn yaa tẽedb sẽn bɩ wã, bɩ d paam tags-kãngã bala. La yãmb sã n tara tagsg a to ne bũmb a taaba, Wẽnnaam na n vẽnega yãmb ne bõn-kãng sẽn yaa a soab me. 16La bũmb sẽn be bala, tõnd sẽn kẽn n ta zĩig ninga wã, d kell n naag taab n kẽne.
17 #
1Kor 4.16, 11.1 M ba-biisi, bɩ yãmb fãa yɩ mam togs-n-taase. Ges-y neb nins sẽn kẽnd wa sẽn zems mamsg ning tõnd sẽn wilg yãmbã. 18Mam dag n togsa yãmb naoor wʋsgo, la m leb n yet-a-la yãmb ne nintãm tɩ neb wʋsg n be tɩ b kẽna wilgdẽ tɩ b yaa Kiris da-pɩkã bɛɛba. 19Bãmb baoosg na n yɩɩ sãoongo, bãmb pʋsã n yaa b wẽnnaam, bãmb maanda sũ-noog ne bũmb ning sẽn yaa yãnd b yĩngã. B ka tagsd bũmb tɩ sã n ka dũniyã yɛl bal ye. 20La tõndo, tõnd yir bee arzãna, la tõnd gũuda tõnd fãagd sẽn yaa Zu-soab a Zeezi Kirisã tɩ b yi be n wa. 21Bãmb na n teka tõnd yĩn-põaagdgã t'a lebg wa bãmb waoogr yĩngã, ne pãng ning bãmb sẽn tar tɩ sek tɩ tõog bũmb fãa tɩ b sak bãmbã.
Currently Selected:
Filip‑rãmba 3: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
