Sõdbo 8
8
1 #
Yik 25.31-40, 37.17-24 Sẽn-Ka-Saab yeela a Moyiis t'a 2yeel a Aarõ yaa: «Fo sã n wa na n ning fɩtl-dãmb a yopoe wã b zĩigẽ, bɩ f kɩt tɩ b vẽenemã tees fɩtl doagendgã taoore.» 3La a Aarõ maana wa Sẽn-Ka-Saab sẽn dag n wilg a Moyiisã, n dogl fɩtl-dãmbã tɩ b vẽenemã teesd fɩtl doagendgã taoore. 4La fɩtl doagendgã sɛɛgã n tɩ tãag a wilsã, b rag n yõg-a-la ne sãnem yeyn-yeyn. La b yõg-a-la wa mamsg ning Sẽn-Ka-Saab sẽn dag n wilg a Moyiisã.
Leevi buudã neb yɩlgre
5Sẽn-Ka-Saab yeela a Moyiis yaa: 6«Yiis Leevi nebã Israyɛll buudã sʋk n yɩlg-ba. 7Ad fo sẽn na n yɩlg-b to-to: Bɩ f rɩk yɩlgr koomã n mes-ba, la f kɩt tɩ b rɩk barg n põng b yĩngã fãa, la b pegs b futã n lebg yɩlma. 8Rẽ zugẽ, bɩ bãmb wa ne lulla, ne zom sẽn nag ne kaam, la bɩ fo mengã wa ne lull sẽn na n maan maoong yel-wẽnã sugr kũun yĩnga. 9-10Dẽ zugẽ, bɩ f tigim Israyɛll nebã fãa n kɩt tɩ Leevi buudã kolg mam taoor sɛk roogã noore. La bɩ Israyɛll nebã tik bãmb ne b nusi. 11Dẽ, a Aarõ na n dɩka Leevi buudã nebã n kõ maam a Sẽn-Ka-Saabo, tɩ b yɩ kũun Israyɛll nebã yʋʋr yĩnga. La bãmb na n welga toor n maan maam a Sẽn-Ka-Saab tʋʋmde. 12La Leevi buudã na n dɩka b nus n tik lulli a yiibã zutã. La bɩ foom a Aarõ rɩk lull a yembr n maan maoong yel-wẽnã sugr kũun yĩnga, la f rɩk a yembrã n maan maoong sẽn yõogd bugum, n yaool n maan b paoogã tʋʋmã Leevi buudã neb zugu, tɩ b tõe n paam b yel-wẽnã sugri. 13La bɩ foom a Moyiis kɩt tɩ Leevi buudã yals a Aarõ ne a kom-dibli wã taoore, tɩ f rɩk bãmb n kõ maam a Sẽn-Ka-Saabo. 14Woto, Leevi buudã neb na n welga toore, n yɩ mam dẽnda. 15Rẽ zugẽ, Leevi buudã tõe n yaool n maana b tʋʋmdã sɛkã roog pʋgẽ. Bɩ f yɩlg Leevi buudã n dɩk-b n kõ maam, 16tɩ bala, b welga bãmb toor Israyɛll nebã sʋka tɩ b lebg mam dẽnda. Mam na n sooga Leevi buudã, la bãmb n na n led Israyɛll nebã kom-dẽems zĩigẽ. 17#Yik 13.2Bala, Israyɛll nebã kom-dẽemsã, ne b rũmsã kom-dẽemsã fãa yaa maam n so. Daar ning mam sẽn kʋ Ezɩpt tẽng nebã kom-dẽemsã, mam welga Israyɛll nebã kom-dẽemsã toore, tɩ b lebg mam dẽnda. 18Mam yãka Leevi buudã tɩ b led Israyɛll kom-dẽemsã zĩigẽ. 19Mam yãka bãmb Israyɛll nebã sʋka, n dɩk-b n kõ a Aarõ ne a kom-dibli wã, tɩ b reeg Israyɛll nebã zĩiga, n maan tʋʋmdã sɛk roogã pʋgẽ, tɩ Israyɛll nebã tõe n paam b yel-wẽnã sugri. Woto, baa Israyɛll buudã ned sã n kolg zĩ-sõngã, mam ka na n sɩbg a soab ye.»
20A Moyiis ne a Aarõ la Israyɛll nebã fãa maana bũmb ning Sẽn-Ka-Saab sẽn dag n yeel a Moyiis tɩ b maan Leevi buudã wɛɛngẽ wã. 21Leevi buudã yɩlga b mense, n pegs b futu, t'a Aarõ rɩk-b n kõ Sẽn-Ka-Saabo. La a Aarõ maana b sugr kosg tʋʋmdã, n yɩlg Leevi buudã. 22Yaa rẽ poor la Leevi buudã wa a Aarõ ne a kom-dibli wã nengẽ tɩ b na n wilg-b tʋʋmdã sɛk roogã pʋgẽ wã, wa Sẽn-Ka-Saab sẽn dag n yeel a Moyiis Leevi buudã wɛɛngẽ wã.
23Sẽn-Ka-Saab leb n yeela a Moyiis yaa: 24«Ad bũmb ninga fo sẽn na n maan Leevi buudã wɛɛngẽ: Leevi buudã neb nins fãa sẽn n wat n ta yʋʋm pisi la a nu wã, tog n kẽe sɛk roogã tʋʋmd pʋga. 25La b sã n wa ta yʋʋm pis-nu, b tog n basa b tʋʋmdã. 26Bãmb tõe n sõngda Leevi buud nins sẽn ket n maand b tʋʋmd sɛk roogã pʋgẽ wã, la b ka tog n leb n kõ bãmb tʋʋmd toor zall ye. Leevi buudã tʋʋmd wɛɛngẽ, yaa woto la fo na n maane.»
Currently Selected:
Sõdbo 8: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
