Sõdbo 5
5
B yiisa sẽn ya-b rẽgdã sik zĩigẽ wã
1Sẽn-Ka-Saab yeela a Moyiis yaa: 2«Yeel Israyɛll nebã tɩ b yiis neb nins fãa sẽn yaa rẽgdã sik zĩigẽ wã: Yaa sẽn bẽed-b yĩn-gãong bãaga, bɩ sẽn tar-b taoor bãaga, wall sẽn sɩɩs-b kũumã. 3Yaa pag tɩ yaa raoa, bɩ y yiis b fãa sik zĩigẽ wã, tɩ b ra wa rẽgem sik zĩig ning pʋg mam sẽn be wã ye.» 4Dẽ, Israyɛll nebã maana wa Sẽn-Ka-Saab sẽn yeel a Moyiisã. Bãmb yiisa neb nins fãa sẽn yaa rẽgdã sik zĩigẽ wã.
Wagdem bũmb lebsg tõogo
5-6 #
Mk 5.20-26
Sẽn-Ka-Saab yeela a Moyiis t'a yeel Israyɛll nebã yaa: «Pag bɩ rao sã n zuk a to bũmbu, yẽnda beega Sẽn-Ka-Saabo. 7Bɩ yẽnda wa togs a kongrã, la a lebs bũmbã soab a bũmbu, la a bao bũmbã sẽn pʋɩ zĩis a nu pʋɩɩr a yembr n paase. 8La sã n mikame tɩ bũmbã soab kiime, tɩ ned ka be n na n deeg bũmbã, bɩ bɛɛgdã rɩk bũmbã n kõ maam a Sẽn-Ka-Saabo, tɩ yɩ maan-kʋʋdã rẽnda, la sẽn paase, bɛɛgdã tog n waa ne pe-raoogo, tɩ b maan maoongo, a beegrã yĩnga. Dẽ, maan-kʋʋdã rɩkda rũngã n maan b paoosg tʋʋmdã, a soabã yel-wẽnã sugr kũun yĩnga. 9Kũun ning fãa Israyɛll nebã sẽn yãk Sẽn-Ka-Saab yĩng n tall n tɩ kɩs maan-kʋʋdã, yaa maan-kʋʋdã n so. 10Ned sã n wa ne kũun n na n kõ Sẽn-Ka-Saabo, yaa maan-kʋʋdã la a kɩta. La ned sã n tall kũun n wa kõ maan-kʋʋdã, kũun-kãng yaa maan-kʋʋdã n so.»
Rao sẽn dõt a pag yoob wɛɛngẽ tõogo
11-12Sẽn-Ka-Saab yeela a Moyiis yaa: «Yeel Israyɛll nebã tɩ pag sã n zãmb a sɩd n yo, 13a paooga a menga, a sẽn soos n kẽ ne rao a to wã yĩnga. La bũmb tõeeme n ka n be n wilgdẽ tɩ yaa sɩda, la ned me ka yãnd-a a yoobã zĩigẽ ye. 14La sũ-kiir sã n yõk a sɩdã, t'a tagsdẽ t'a pagã rẽgma a menga, tɩ sũ-kiirã sẽn yõk a sɩdã yĩnga, a tagsdame t'a pagã yoome, tɩ yaool n ka sɩda, 15tɩ raoã baas n ket n sãmbd ne-a, bɩ a tall a pagã n kẽng maan-kʋʋdã nengẽ. La bɩ raoã tall kũun ning a sẽn tog n yao pagã yĩngã n wa ne. Yaa Oorz zom wũmbl a tãabo. La a ka tog n ning zomã kaam bɩ tɩdar ye. Bala, yaa sũ-kiir kũun b sẽn kõte, beegr tẽegr yĩnga. 16La bɩ maan-kʋʋdã kɩt tɩ pagã kẽng n tɩ yals Sẽn-Ka-Saab taoore. 17La bɩ maan-kʋʋdã rɩk yagd laag n toog koom ning sẽn welg toor Sẽn-Ka-Saab yĩngã, la a yõng sɛk roogã pʋgẽ tẽngã tom n ning koomẽ wã. 18Dẽ, maan-kʋʋdã na n kɩtame tɩ pagã yals Sẽn-Ka-Saab taoore, t'a zũndg pagã zoobdã, la a rɩk sũ-kiir kũunã sẽn yaa beegr tẽegr kũunã pagã sɩd sẽn tall n wa wã, n sagl pagã nugẽ. La bɩ maan-kʋʋdã meng zã kãab-wẽng koomã a nugẽ. 19La maan-kʋʋdã na n kɩtame tɩ pagã wẽene, t'a yeel-a yaa: Sã n yaa tɩ rao a to ka tol n kẽ ne foom, la tɩ fo ka soos n zãmb f sɩdã n dẽgem f mengã, bɩ ko-kãngã sẽn yaa kãab-wẽng koomã ra maan-f bũmb ye. 20La sã n mikame tɩ fo zãmba f sɩdã n soos n dẽgem f mengã, tɩ rao a to kẽ ne foom, 21bɩ maan-kʋʋdã kɩt tɩ pagã wẽene, n kãabe. La bɩ a yeel pagã yaa: Bɩ Sẽn-Ka-Saab sɩbg-fo, n kɩt tɩ f lebg kiiri, tɩ f pʋgã wuki, tɩ f buudã neb sã n wa kãabd kãab-wẽnga, bɩ b kãabd ne fo yʋʋre. 22La bɩ ko-kãngã sẽn yaa kãab-wẽng koomã kẽ n wɩk ne f pʋgã, n kɩt tɩ f lebg kiiri, n ka leb n tõe dog ye. La bɩ pagã yeel tɩ Ãmina! Ãmina!»
23«La maan-kʋʋdã na n gʋlsa kãab-wẽngã goamã sebr zugu, n dɩk-a n los ko-tɩɩsengẽ wã n yẽes gʋlsmã. 24Sẽn deng tɩ maan-kʋʋdã rɩk ko-tɩɩsengã n kõ pagã t'a yũ tɩ sig a pʋgẽ, 25Maan-kʋʋdã reegda sũ-kiir kũunã sẽn yaa beegr tẽegr kũunã pagã sɩd sẽn tall n wa wã, n kẽng Sẽn-Ka-Saab taoor n tɩ maan b rog-n-mikã, la a tall kũunã n kẽng tẽn-kugrẽ wã. 26La bɩ yẽnda yõng tẽegr maoongã zom ne nug n yõog tẽn-kugrã zugu. La rẽ poore, bɩ a rɩk ko-tɩɩsengã n kõ pagã t'a yũ. 27Maan-kʋʋdã sã n kɩt tɩ pagã yũ koomã n sɛ, tɩ b mik tɩ pagã sɩd zãmba a sɩdã n yo n dẽgem a mengã, kãab-wẽng koomã sẽn kẽ yẽnda pʋgẽ wã na n wɩka ne a pʋgã, la yẽnda na n lebga kiiri. La yẽnda buudã sʋka, b sã n kãabd kãab-wẽnga b na n kãabda ne yẽnda yʋʋre. 28La sã n mikame tɩ pagã ka yo n dẽgem a menga, la a sã n yaa yɩlemde, b ka na n ning-a taal ye. Dẽ, pagã na n põsa kãab-wẽngã, la a na n paama rogem.»
29Woto yaa tõog sẽn wilgd sũ-kiir yelle, pag sẽn zãmb a sɩd n yo n dẽgem a meng wɛɛngẽ. 30La tõ-kãngã leb n yaa rao sẽn wat n maand sũ-kiir ne a paga, n tagsdẽ t'a pagã zãmb-a lame n yo. Bɩ raoã tall a pagã n wa maam a Sẽn-Ka-Saab taoore, tɩ maan-kʋʋdã maan bũmb nins fãa tõogã sẽn wilgã. 31La sã n mikame tɩ pagã beegame, a beegrã sɩbgr na n lʋɩ a zugu, la b ka na n ning a sɩdã taal ye.
Currently Selected:
Sõdbo 5: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
