Sõdbo 28
28
Daar fãa maoong tõogo
1Sẽn-Ka-Saab yeela a Moyiisi, 2t'a gom ne Israyɛll nebã n yeel-b yaa: «Ade, yãmb tog n talla y maandã ne y kũunã sẽn yõogd bugmã n wa kõ maam wa sẽn zems a wakate. La bõn-kãng na n yɩɩ yũ-noog sẽn tat maam a Sẽn-Ka-Saab yam. 3La daar fãa, yãmb tog n talla pe-ribli a yiib sẽn ka tar zanga, n wa maan maoong sẽn yõogd bugum n kõ maam. La y na n maanda maoon-kãng daar fãa. 4Bɩ b rɩk pe-ribl a yembr n maan maoong yibeoogo, la b rɩk a to wã n maan maoong zaabre. 5La b tog n paasa zom wam a tã sẽn nag ne oliiv kaam lengr la pʋɩ-sʋka. 6Daar fãa maoon-kãngã, sẽn yaa maoong sẽn yõogd bugum t'a yũugã sẽn yaa noogã tat mam yamã, na n kell n yɩɩ wa maoong ning b sẽn maan n kõ maam Sɩnayi tãngã zugã. 7La y sã n na n maan yibeoog pe-riblã maoongo, bɩ y paas reezẽ rãam litr a ye la pʋɩ-sʋka, tɩ b tall n wa ne Sẽn-Ka-Saab taoore. 8La zaabre, bɩ y rɩk pe-ribl a yiibẽ soabã n maan maoongo, la y paas reezẽ rãam lɩng a yembr la pʋɩ-sʋka, wa yãmb sẽn paas yibeoog maoongã. La a na n yɩɩ maoong sẽn yõogd bugum t'a yũugã yaa noog n tat maam a Sẽn-Ka-Saab yam.
Maand buud toor-toore
9La vʋʋsg daarã, yãmb na n talla yʋʋmd pe-ribli a yiib sẽn ka tar zanga, n wa maan maoongo. Yãmb tog n paasa ne zom wũmbli a yoob sẽn nag ne kaam, la ne reezẽ rãam. 10La vʋʋsg daar fãa, bɩ y maan maoon-kãng n paas daar fãa maoongã b sẽn maande, n naagd ne zom la reezẽ rãamã.
11Kiuug fãa pipi daare, yãmb na n maana maoong sẽn yõogd bugum n kõ maam a Sẽn-Ka-Saabo. Maoon-kãng yaa lulli a yiibu, ne pe-raoog a ye, la yʋʋmd pe-ribli a yopoe sẽn ka tar zanga. 12La yãmb na n naga zom ne kaam n tũnug rũng fãa. Lull fãa yaa zom kɩlo a wɛ, la pe-raoog yaa zom kɩlo a yoobe. 13La pe-ribl fãa na n yɩɩ zom kɩlo a tãabo, la bõn-kãens na n yɩɩ maoong sẽn yõogd bugum t'a yũug yaa noog n tat maam a Sẽn-Ka-Saab yam. 14La yãmb sã na n wa ne reezẽ rãam kũuni, loalg fãa yaa reezẽ rãam lɩms a tãabo, la pe-raoog yaa lɩms a yiibu, la pe-ribl fãa yaa lɩng a ye la pʋɩ-sʋka. Woto yaa maoong b sẽn tog maan yʋʋmdã pʋgẽ kiuug fãa pipi daare. 15La yãmb tog n maana boɛɛg maoongo, y yel-wẽnã sugr kũun yĩnga, n paas daar fãa maoongã b sẽn maande, n naagd ne reezẽ rãam n kõtẽ wã.
Pak tigrã maanego
16 #
Yik 12.1-13, Tõ 16.1,2 Yʋʋmdã pipi kiuugã rasem piig la a naas daarã, yãmb na n tigma taab Pak tigrã yĩng n waoog maam a Sẽn-Ka-Saabo. 17#Yik 12.14-20, 23.15, 34.18, Tõ 16.3-8La kiu-kãng rasem piig la nu wã daare, yãmb na n sɩngame n maan tigrã rasem a yopoe, la rasem a yopoe wã pʋgẽ, yãmb tog n wãba bur sẽn ka ning bɩlle. 18La tigrã pipi daare, yãmb ka tog n tʋm tʋʋmd ye, la y segd n tigma taab n waoog maam a Sẽn-Ka-Saabo. 19Yãmb tog n talla lulli a yi, la pe-raoog a ye, ne yʋʋmd pe-ribli a yopoe sẽn ka tar zãnga, n wa maan maoong sẽn yõogd bugum n kõ maam a Sẽn-Ka-Saabo. 20La rũng fãa, yãmb na n paasa zom sẽn nag ne kaam. Lull fãa yaa zom kɩlo a wɛ, la pe-raoog yaa zom kɩlo a yoobe. 21La pe-ribli a yopoe wã, a yembr fãa yaa zom kɩlo a tãabo. 22La yãmb na n talla boɛɛg n wa tɩ b kʋ n maan maoong y yel-wẽnã sugr kũun yĩnga. 23Maan-bãmbã fãa na n paasa yibeoog fãa maoongã b sẽn yõogd bugmã. 24La tigrã rasem a yopoe wã pʋgẽ, bɩ y maan dɩɩb kũun daar fãa, n yõog bugum t'a yũug yɩ noog n ta Sẽn-Ka-Saab yam. La kũun-kãens tog n naaga daar fãa maoongã ne a reezẽ rãamã b sẽn tũnugdã. 25La rasem a yopoe wã daare, bɩ y tigim taab n waoog maam a Sẽn-Ka-Saabo, la yãmb ka tog n tʋm tʋʋmd badaar ye.
Dẽenem biis tigri
26 #
Yik 23.16, 34.22, Tõ 16.9-12 Daar ninga yãmb sẽn na n tigs y pipi bõn-koaadlã, bɩ y yãk y koodã dẽenem biisi, n tall n wa kõ maam a Sẽn-Ka-Saabo. La badaare, bɩ y tigim taab n waoog maam. La y ka tog n tʋm tʋʋmd badaar ye. 27Yãmb tog n talla lols a yi, la pe-raoog a ye, ne yʋʋmd pe-ribli a yopoe sẽn ka tar zãnga, n wa maan maoong sẽn yõogd bugum n kõ maam a Sẽn-Ka-Saabo. 28La rũng fãa, yãmb na n paasa zom sẽn nag ne kaam. Lull fãa yaa zom kɩlo a wɛ, la pe-raoog yaa zom kɩlo a yoobe. 29La pe-ribli a yopoe wã, a yembr fãa yaa zom kɩlo a tãabo. 30La yãmb na n talla boɛɛg n wa tɩ b kʋ n maan maoong y yel-wẽnã sugr kũun yĩnga. 31La yãmb tog n maana maoon-kãngã, n paas daar fãa maoongã b sẽn maande, n naag ne a zomã, la a reezẽ rãamã. Bɩ y wa ne rũms sẽn ka tar zanga, n paas reezẽ rãamã b sẽn naagdã.
Currently Selected:
Sõdbo 28: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
