Sõdbo 23
23
A Balaam ninga Israyɛll nebã barka
1A Balaam yeela a Balak yaa: «Me tẽn-kug a yopoe ka, la f tall lols a yopoe, ne pe-raad a yopoe n wa kõ-ma.» 2La a Balak saka a Balaam gomdã. La tẽn-kugr fãa zugu, bãmb dɩka loalg a ye, ne pe-raoogo, n maan maoongo. 3Dẽ, a Balaam yeela a Balak yaa: «Pa ka, n yals maoongã fo sẽn maanã sɛɛgẽ, tɩ m leb kɛɛnga, n ges Sẽn-Ka-Saab kõn vẽneg b meng ne-ma. B sã n vẽneg b meng ne-ma, m na togs-f koɛɛg ning b sẽn na n kõ-ma.» 4Woto, Wẽnnaam vẽnega b meng ne a Balaam. La a Balaam yeela Wẽnnaam yaa: «Ade, mam mee tẽn-kug a yopoe, la tẽn-kugr fãa zugu, m maana loalg ne pe-raoog maoongo.» 5Dẽ, Sẽn-Ka-Saab wilga a Balaam gomd ninga yẽnda sẽn tog n tɩ togsã. 6A Balaam lebg n leba naab a Balak nengẽ, n tɩ mik t'a ket n yas maoongã sɛɛgẽ, yẽnda ne Moaab nanambsã. 7Dẽ, a Balaam goma gom-minim goam n yeel yaa:
«Moaab naab a Balak kɩtame tɩ b bool maam,
Yẽnda kɩtame tɩ m yi Siiri tãmsã sẽn be yaangã n wa,
Yẽnda yeela maam yaa:
Wa kãab a Zakoob yagensã wẽng n kõ-ma,
Wa kãab Israyɛll nebã wẽnga!
8La mam na n yɩɩ wãna,
N kãab Wẽnnaam sẽn ka kãab b rãmb wẽngã wẽnga?
9Mam zĩnda tãmsã zut n get nin-bamba,
Mam da bee tãmsã zut n get-ba,
La mam mikame tɩ yaa buud sẽn welg toore,
La bãmb miime tɩ b welga toor ne buud a taabã.
10Ãnda n tõe n sõd Israyɛll nebã n sɛ?
Ãnda n tõe n bãng a Zakoob yagensã sõore?
Bãmb yaa wʋsg n yɩɩd tẽng tom.
Bɩ m kũumã yɩ wa nin-bãmbã sẽn yaa nin-tɩrsã kũum,
La bɩ m baoosgã yɩ wa Israyɛll nebã baoosgo!»
11Woto, a Balak yeela a Balaam yaa: «Yaa bõe la fo sẽn maan maam woto wã? Mam boola foom tɩ f wa kãab m bɛɛbã wẽnga, la maan a wãn tɩ fo wa kãabd bãmb kãab-noogo!» 12La a Balaam leoka a Balak yaa: «Dẽ yĩnga, ka Sẽn-Ka-Saab sẽn yeel maam bũmb ningã la mam tog n togs sɩda?»
A Balaam leb n ninga Israyɛll barka
13La a Balak yeela a Balaam yaa: «Wa tũ maam tɩ d kẽng zĩig a to, la be, fo na n tõog n yãnd-b-la gilli, dẽ, f na kãab-b wẽng n kõ-ma. Bala, ka wã, fo nee bãmb bɛk bala.» 14Dẽ, a Balak talla a Balaam n kẽng Sofim pʋʋgã sẽn be Pisga tãngã zugã. La beenẽ, a Balak leb n mee tẽn-kug a yopoe, la tẽn-kugr fãa zugu, yẽnda kʋʋ loalg ne pe-raoog n maan maoongo. 15A Balaam yeela yẽnda yaa: «Pa ka n yals n pẽneg maoongã fo sẽn maanã, tɩ m leb kɛɛng n tɩ gũ koɛɛg ning Sẽn-Ka-Saab sẽn na n kõ-ma.» 16Dẽ, Sẽn-Ka-Saab wa n sega a Balaam, n wilg-a gomd ninga yẽnda sẽn tog n tɩ gomã. La bãmb yeela a Balaam t'a lebg n leb a Balak nengẽ. 17A Balaam lebg n leba a Balak nengẽ, n tɩ mik t'a ket n yas a maandã sɛɛgẽ, yẽnda ne Moaab nanambsã. 18Dẽ, a Balaam goma ne gom-minim n yeel yaa:
«Sipoor biig a Balake,
Yik n kelg maam neere!
19Wẽnnaam ka ninsaal n yagd zĩrẽ ye,
La bãmb leb n ka ninsaal n tekd yam ye!
Bãmb sã n yeel bũmbu, b pidsd-a lame.
20Ade, yaa Wẽnnaam meng n kõ maam noore,
N yeel tɩ m ning nin-bãmbã barka.
Dẽ wã, mam ka tõe n tek bũmb ye.
21Sẽn-Ka-Saab ka ne yell a Zakoob yagensã zug ye,
La b ka ne wẽng a Zakoob buudã sʋk ye.
Bala, Sẽn-Ka-Saab yaa Israyɛll Wẽnnaam,
La bãmb bee b nebã sʋka.
La Sẽn-Ka-Saab reegda b nebã waoogre.
22Yaa Wẽnnaam n yiis bãmb Ezɩpt soolmã pʋgẽ,
Ne pãn-kãseng sẽn wẽnd we-naaf pãnga.
23Tɩɩm ka tõe n maan a Zakoob yagensã bũmb ye,
La bagr me ka tõe Israyɛll nebã ye.
Wẽnnaam vẽnegda bãmb bũmb fãa,
Wa sẽn zems a wakate.
24Ade, nin-bãmbã yikda wa gɩgem-yãanga,
N yikd n yas wa gɩgem-daoogo.
A ka gãanded t'a ka wãb rũng ning a sẽn yõka nemdo,
La a ka gãanded t'a ka yũ rũng ning
a sẽn kʋ wã zɩɩm ye.»
25A Balak yeela a Balaam yaa: «Fo sã n mi tɩ f ka rat n kãab nin-bãmbã wẽnga, bɩ f ra ning-b bark me wɛ.» 26La a Balaam leoka a Balak yaa: «Mam pĩnd n togsa foom tɩ yaa Sẽn-Ka-Saab sẽn na n yeel maamã bal la m na n maane!»
27Dẽ, a Balak leb n yeela a Balaam yaa: «Sã n yaa woto bɩ f wa tɩ m tall f tɩ d kẽng zĩig a to, tɩ daar ning bɩ Sẽn-Ka-Saab sak tɩ f kãab nin-bãmbã wẽng n kõ-ma.» 28La a Balak talla a Balaam n dʋ Pewoor tãngã zugu, zĩig ning sẽn teesd weoogã. 29Dẽ, a Balaam yeela a Balak yaa: «Me tẽn-kug a yopoe ka, la f tall lols a yopoe, ne pe-raad a yopoe n wa kõ-ma.» 30La a Balak saka a Balaam gomdã. La a Balak rɩka loalg ne pe-raoogo, n maan maoong tẽn-kugr fãa zugu.
Currently Selected:
Sõdbo 23: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
