Sõdbo 16
16
A Koore kɩɩsgo
1 #
Zʋʋ 1.11
Leevi roogã ned a yembr yʋʋr sẽn boond t'a Koore, n yaa Kehat roogã ned a Yitseyaare biigã Pirsa a Elyaab kambã: a Datã, a Abiram, ne a Pelɛt biig a One, b tãabã fãa yaa a Rubɛn yagense, 2n paas ne neb kobs-yi la pis-nu sẽn yaa Israyɛll nebã taoor-dãmbã, tɩ b na n zab ne a Moyiisi. 3Dẽ, bãmb tɩ tigma taab n zab ne a Moyiis la a Aarõ n yeele: «Tõnd yamã yii ne yãmb manesmã! Bala, nebã fãa welga toor Sẽn-Ka-Saab yĩnga, la Sẽn-Ka-Saab bee bãmb sʋka. La bõe yĩng tɩ yãmb zẽkd y mens wa yãmb yɩɩda neb a taabã?»
4A Moyiis sẽn wʋm gom-kãensã wã, a wõgemdame n fõgen a neng tẽnga. 5La Moyiis yeela a Koore ne a poorẽ dãmbã yaa: «Beoog yibeoogo, Sẽn-Ka-Saab na n kɩtame tɩ b bãng ned ning sẽn welg toor n yaa bãmb dẽnda, n kɩt t'a kolg bãmba, la yaa bãmb sẽn na n yãk a soabã n na n kolge. 6Dẽ wã, ad foom a Koore ne f poorẽ dãmbã sẽn na n maane: bɩ y rɩk wisd yõogr laase. 7La beoogo, bɩ y ning bugum ne wisd b pʋse, n tall n wa Sẽn-Ka-Saab taoore. Woto, d na n bãnga ned ning Sẽn-Ka-Saab sẽn yãkã. La yaa nin-kãng soab n welg toore. Bala, yãmb a Leevi nebã sẽn maandã yaa n looga nugu.»
8Rẽ poore, a Moyiis yeela a Koore yaa: «Leevi buudã, kelg-y-yã! 9Israyɛll Wẽnnaamã sẽn welg yãmb toor Israyɛll nebã sʋkã, n kɩt tɩ yãmb tõe n kolg n maan bãmb sɛk roogã tʋʋmdã, la y yals Israyɛll nebã taoor n sõng-bã ket n ka sek yãmba? 10Sẽn-Ka-Saab sakame tɩ foom a Koore ne f saam-biisã fãa sẽn yaa Leevi yagensã tõe n kolg bãmba, tɩ yãmb leb n baood n dat n yɩ maan-kʋʋdba! 11Foom ne f poorẽ dãmbã sẽn maan woto wã wilgdame tɩ yãmb naaga taab noor a yembr n kɩɩs Sẽn-Ka-Saabo! Bala, ka ne a Aarõ la yãmb sẽn yẽgemdã ye.»
12Rẽ zugẽ, a Moyiis tʋmame tɩ b tɩ bool a Datã, ne a Abiram sẽn yaa a Elyaab kom-dibli wã tɩ b wa. La bãmb yeelame tɩ b tɩ yeel a Moyiis yaa: «Tõnd ka na n wa ye. 13Fo yiisa tõnd tẽng sẽn pid ne bĩisim la sɩɩd wʋsg pʋgẽ, n tall tõnd n wa weoogã pʋgẽ ka tɩ d na n ki, tɩ rẽndã ka sek foom ye, tɩ f leb n dat n modg tõnd n soog-do! 14Sẽn paas menga, ka tẽng sẽn pid ne bĩisim la sɩɩd wʋsg pʋgẽ la fo tall tõnd n tɩ kẽes ye. Leb n ka pʋt ne reezẽ tɩɩs la f kõ-d me ye. Fo tẽedame tɩ nebã yaa zoens la? Tõnd ka na n wa ye.» 15La a Moyiis sũurã puuga hal wʋsg t'a yeel Sẽn-Ka-Saab yaa: «Da sak-y n deeg-y nin-bãmbã kũunã ye. Bala, mam nan zɩ n deeg bãmb ned ba a yembr bũmbu, baa bõang mengã ye. La mam nan zɩ n maan b ned ba a yembr wẽng me ye.»
A Koore, ne a Datã la a Abiram sɩbgre
16Dẽ, a Moyiis yeela a Koore yaa: «Beoogo, bɩ foom ne f poorẽ dãmbã wa yals Sẽn-Ka-Saab taoore. La bɩ a Aarõ me wa. 17Bɩ yãmb ne y neb kobs-yi la pis-nu wã ned kam fãa rɩk a wisd yõogr laag n zã, la a ning wisd a pʋgẽ n tall n wa Sẽn-Ka-Saab taoore. La bɩ foom ne a Aarõ me maan a woto.» 18La bãmb ned kam fãa rɩka a wisd yõogr laag n ning bug-saala, la a yugl wisd bug-saalã zugu, n tall n kẽng n tɩ yals sɛk roogã noore. La a Moyiis ne a Aarõ me rag n bee be. 19A Koore tigma a poorẽ dãmbã fãa, n kɩt tɩ b wa yals a Moyiis ne a Aarõ taoor sɛk roogã noore. La wakat-kãng bala, Sẽn-Ka-Saab ziirã pukame tɩ nebã fãa yãnde.
20Dẽ, Sẽn-Ka-Saab yeela a Moyiis ne a Aarõ yaa: 21«Yi-y nebã sʋk n leb kɛɛnga, tɩ m na n sãam-b-la wakat-kãngã bala.» 22La a Moyiis ne a Aarõ wõgemdame n fõgen b nens tẽng n yeel yaa: «Wẽnnaam! Yaa yãmb n kõt bũmb nins fãa yãmb sẽn naanã vɩɩm! Rẽ yĩnga, yãmb na n yika y sũur ne nin-kãensã fãa, tɩ yaool n yaa nin-yɛng bal n beegã?»
23La Sẽn-Ka-Saab yeela a Moyiis yaa: 24«Yeel nebã tɩ b zãag b mens ne a Koore la a Datã ne a Abiram fu-rotã.» 25Dẽ, a Moyiis yikame n kẽng a Datã, ne a Abiram nengẽ, la Israyɛll kãsem-dãmbã me yik n pugla yẽnda n kẽnge. 26La a Moyiis yeela nebã yaa: «Zãag-y y mens ne nin-wẽn-kãensã rotã, la y ra sɩɩs bãmb bũmb ba a yembr ye, tɩ bãmb yel-wẽnã yĩng ra wa n kɩt tɩ yãmb naag n ki ye.» 27Dẽ, nebã zãag n basa a Koore ne a Datã, la a Abiram dotã. La a Datã ne Abiram yiime n yals b fu-rotã noyã, ne b pagbã, la b kambã ne b yagensã.
28Dẽ a Moyiis yeelame yaa: «Yãmb na n bãngame tɩ yaa Sẽn-Ka-Saab n tʋm maam tɩ m maan bõn-kãense, la ka maam n yãk yam n maandẽ ye. 29Nin-bãmbã sã n ki kũ-zaall wa nebã fãa sẽn kiidã, rẽnd ka Sẽn-Ka-Saab n tʋm maam ye. 30La Sẽn-Ka-Saab sã n maan bũmb sẽn zɩ n zĩndi, n kɩt tɩ tẽngã yaag a noor n vel bãmb ne bũmb nins fãa b sẽn so wã, tɩ b sig kɩɩm-kulg pʋgẽ vɩɩse, yãmb na yaool n bãng tɩ nin-bãmbã paooga Sẽn-Ka-Saabo.»
31A Moyiis sẽn nan gom n sɛ bal yee, la tẽn-gãongã sẽn pãrg a Datã ne a Abiram naoã tẽngre. 32Tẽn-gãongã yaaga a noor n vel a Datã ne a Abiram ne b yirã rãmb fãa, n paas a Koore nebã fãa, ne b laogã zãnga. 33Nin-bãmbã siga kɩɩm-kulg pʋgẽ vɩɩse, ne b sẽn so wã fãa, la tẽngã lebs n munums-b lame. Yɩɩ woto tɩ bãmb menem Israyɛll buudã sʋka. 34La Israyɛll neb nins fãa sẽn dag n pẽ bãmbã sẽn wʋm b kelemsã, bãmb zoeeme. Bala, b rag n yɛɛsdame tɩ tẽn-gãongã na n wa vel bãmb me. 35La Sẽn-Ka-Saab kɩtame tɩ bugum wa rɩ neb kobs-yi la pis-nu wã sẽn dag n zãad b wisd yõogr laasã n yasẽ wã.
Currently Selected:
Sõdbo 16: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
