A Matye koe‑noogo 22
22
Pʋg-peegr yel-bũndi
(Luk 14.15-24)
1A Zeezi leb n wẽe bãmb yel-bũnd n yeele: 2Arzãn soolem wẽnda wa rĩm sẽn maan pʋg-peegr tigr a bi-ribl yĩnga. 3Yẽnda tʋma a tʋmtʋmdb tɩ b tɩ yeel neb nins yẽnda sẽn dag n boolã tɩ b wa, la b rag n ka rat n wa ye. 4Yẽ leb n tʋma tʋmtʋmdb a taab n yeel-b tɩ b kẽng n tɩ yeel neb nins yẽnda sẽn dag n boolã n yeel‑ba: «Mam segla tigrã rɩɩb n sɛ, mam kʋʋ m nag-nobdse, la m rũm-nobdse. Bũmba fãa seglame n sɛ. Wa-y pʋg-peegr tigrã.» 5La b sẽn ka nand boolgã yĩnga, b loogame. Bãmba rãmb kẽnga b pʋtẽ, tɩ bãmba rãmb kẽng leebgo. 6La neb a taabã yõga tʋmtʋmdbã n nams-ba, la b kʋ-ba. 7Rĩmã sũur yikame t'a tʋm a tãb-biisã tɩ b tɩ sãam nin-kʋʋdb kãense, la b yõog b tẽngã bugum. 8Dẽ, a yaool n yeela a tʋmtʋmdbã yaa: «Pʋg-peegrã tigr seglame n sɛ. La neb nins mam sẽn boolã dag n ka zems tɩ rɩ-a ye. 9Woto wã, kẽng-y so-tiisẽ wã n tɩ bool neb nins fãa yãmb sẽn na yã wã tɩ b wa.» 10Tʋmtʋmdbã saa soayã zut n tigs neb nins fãa b sẽn yã wã, nin-wẽns la nin-sõamyã, hal tɩ tigrã roog pid ne nebã. 11Rĩmã kẽeme n na n ges nebã sẽn paam boolgã, la a yãnda rao a yembr be sẽn ka yer pʋg-peegrã tigr fuug ye. 12A yeel-a lame: «M zoa, fo maana a wãn n wa n kẽ ka n ka yeelg pʋg-peegrã tigr fuugu?» La raoã ka tõog n leok tɩ bũmb ye. 13#Mat 8.12, 25.30, Luk 13.28Dẽ, rĩmã yeela tʋmtʋmdbã yaa: «Sẽb-y-yã a nao wã ne a nusã, n lob-a lik bida sẽn be yɩngã pʋgẽ. Yãbr la yẽn wãbr na n zĩnda be.» 14Bala, b sẽn bool b rãmbã yaa kʋʋng wʋsgo, la b sẽn tũus b rãmbã sõor paoodame.
Zemsame tɩ b yao Sezaar yõor yaoodo?
(Mark 12.13-17, Luk 20.19-26)
15Dẽ, Fariizẽ-dãmbã kẽng n tɩ yẽsa ne taaba, n na n bao sor ning b sẽn na n maan n bẽd a Zeezi ne b mengã noor goam n yõke. 16Bãmb tʋma b karen-biis kẽer ne a Erood poorẽ dãmb a Zeezi nengẽ. Bãmb yeela a Zeezi yaa: «Karen-saamba, tõnd miime tɩ yãmb yaa sɩd soaba, la yãmb zãmsda nebã Wẽnnaam soayã ne sɩd n ka zoet ned ye. Bala, yãmb ka get ninsaalbã sẽn yaa to-to wã ye. 17Togs-y-do. Ne yãmb tagsgo, noor beeme tɩ yao Sezaar yõor yaoodo bɩ?» 18La a Zeezi sẽn mi bãmb sɩlmã, b yeel-b lame yaa: «Zãmb dãmba, bõe tɩ y bẽt maam? 19Wilg-y maam ligd ning yãmb sẽn tar n yaood yõor yaoodã.» La b wilga bãmb deniye a yembre. 20La a Zeezi soka bãmba: «Maasmã ne gʋlsmã sẽn be lagfã zugã yaa ãnda rẽnda?» 21La b leokame: «Yaa Sezaar dẽnda.» Dẽ a Zeezi yeela bãmba: «Sã n yaa woto, bɩ y lebs Sezaar bũmb ning sẽn yaa Sezaar dẽnda, la y lebs Wẽnnaam bũmb ning sẽn yaa Wẽnnaam dẽnda.» 22Gom-kãens yɛɛsa bãmba, la b basa a Zeezi n looge.
Sokr kũum vʋʋgr poorẽ
(Mark 12.18-27, Luk 20.27-40)
23 #
Tʋʋm 23.8
Badaar bala, Saduusẽ-dãmbã, sẽn yet-b tɩ kũum vʋʋgr ka be wã kolga a Zeezi n sok-b sok-kãnga: 24#Tõ 25.5«Karen-saamba, a Moyiis yeelame tɩ ned sã n ki n ka bas biiga, a ba-biig na n deega pʋg‑kõorã n dog kamb a ba-biigã sẽn ki wã yĩnga. 25La ba-biis a yopoe n dag n be tõnd sʋka. Kãsmã peega paga, la a kiime. La a sẽn ka paam biig yĩnga, a basa a pagã ne a yao wã. 26Yiib soabã me yɩɩ a woto, tɩ ta tãab soabã, hal tɩ ta b yopoe wã fãa. 27Bãmb fãa sẽn ki n sɛ, pagã me kiime. 28Kũum vʋʋgrã wakate, bʋg ba-biisã a yopoe wã sʋk n na n soog pagã? Bãmb fãa la sẽn tall-a wã la!» 29A Zeezi leoka bãmb yaa: «Yãmb bee tudgr pʋgẽ, yãmb sẽn ka wʋmd gʋls-sõamyã wall Wẽnnaam pãngã võorã. 30Bala, kũum vʋʋgrã wakate, raop ka na n leb n peeg pagba, pagb ka na n kuil sɩdba, la b na n yɩɩ wa Wẽnnaam malegsã sẽn be arzãnã. 31La ne kũum vʋʋgrã yelle, yãmb nan ka karem Wẽnnaam sẽn yeelã la?: 32#Yik 3.6‹Mam yaa a Abrahaam Wẽnnaam, a Izak Wẽnnaam, la a Zakoob Wẽnnaam›? Wẽnnaam ka kũum Wẽnnaam ye, bãmb yaa nin-vɩɩs Wẽnnaam.» 33La a Zeezi zãmsgã linga neb kʋʋngã sẽn dag n kelgd bãmbã.
Tõog sẽn yaa kãseng n yɩɩda
(Mark 12.28-34, Luk 10.25-37)
34Fariizẽ-dãmbã sẽn wʋm t'a Zeezi kɩtame tɩ Saduusẽ-dãmbã noyã muma, b tigsa taaba. 35La bãmb ned a yembr sẽn yaa tõog karen-saamb soka a Zeezi sokr n na n mak bãmba: 36«Karen-saamba, tõodã sʋka, bʋg n yaa kãseng n yɩɩda?» 37#Tõ 6.5A Zeezi leoka yẽnda n yeele: «Nong Zu-soaba fo Wẽnnaam ne f sũur fãa, la ne f sɩɩgã fãa, la ne f tagsgã fãa.» 38Yẽnda n yaa pipi tõogo, n leb n yɩɩd b fãa. 39#Mk 19.18La tõog a to me sẽn pʋgd yẽnda n yaa kãseng wa yẽnda: «Nong f to wa f menga.» 40#Luk 10.25-28Tõodã fãa ne Wẽnnaam no-rɛɛsdbã koees fãa yẽbga tõ-kãensã b yiibã zutu.
Kiris yaa ãnda biiga?
(Mark 12.35-37, Luk 20.41-44)
41Fariizẽ-dãmbã sẽn tigmã, a Zeezi sok-b-la woto: 42«Yãmb tagsda bõe ne Kirisã yelle? B yaa ãnda biiga?» B leokame: «A Davɩɩde.» 43La a Zeezi yeel-b lame: «La yɩta a wãn t'a Davɩɩd gom ne Sɩɩg-sõng pãng n bool bãmb tɩ Zu-soaba?» bãmb yeelame: 44#Yɩɩn 110.1«Zu-soabã yeela mam Zu-soabã yaa: ‹Zĩnd mam dɩtgo, hal tɩ m kɩt tɩ f tab f bɛɛbã.›» 45A Davɩɩd sã n boonda bãmb tɩ Zu-soaba, bãmb leb n yɩta wãn n yaa yẽnda biiga? 46Ned baa a yembr ka tõog n yãnd gomd n leok bãmb ye. La sẽn sɩng ne badaare, ned baa a yembr ka leb n saag n sok bãmb bũmb ye.
Currently Selected:
A Matye koe‑noogo 22: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
