A Matye koe‑noogo 11
11
A Zãmbatiis tʋma neb a Zeezi nengẽ
(Luk 7.18-35)
1A Zeezi sẽn wilg bãmb karen-biisã piig la a yiibã b tʋʋmã n sɛ, b meng yii be n kẽng n tɩ zãms nebã la b moon koe-noogã b tẽmsã pʋse. 2A Zã zĩnda bi-bees roogẽ n wʋm tɩ b gomd a Zeezi tʋʋmã yelle. Dẽ, yẽnda tʋma a karen-biisã tɩ b tɩ sok a Zeezi yaa: 3«Yãmb la sẽn tog n wa-a wã bɩ, bɩ d tog n gũ ned a to?» 4A Zeezi leok-b lame n yeele: «Kẽng-y n tɩ togs-y-yã a Zã bũmb nins yãmb sẽn wʋmd la y yãtã: 5#Eza 35.5,6, Eza 61.1zoens nin pugsdame, wobs kẽndame, yĩn-gãong bãas sẽn tar-b rãmbã yĩns lebgda yɩlma, wʋms wʋmdame, kũum vʋʋgdame, la koe-noogã moonda naong rãmb sʋka. 6Bark bee ned ninga mam sẽn kõn yɩ kug-lakdg a yĩngã zugu.»
7La a Zã karen-biisã sẽn looge, a Zeezi sɩngame n gom ne neb kʋʋngã a Zã yell n yeele: Bõe la yãmb kẽng n tɩ ges we-rasempʋɩɩgẽ wã? Tãnwĩig sobg sẽn miimda? 8La yaa bõe la yãmb tɩ gese? Dao sẽn yeelg waoogr futu? Neb nins sẽn yer fu-bʋgs sẽn yaa neebã bee rĩm-dãmb zagsẽ. 9Dẽ, bõe la yãmb kẽng n tɩ gese? Wẽnnaam no-rɛɛsa? Mam yeta yãmb tɩ n-yẽe. La yaa ned sẽn yɩɩd Wẽnnaam no-rɛɛsa. 10#Mal 3.1Bala, yaa rao-kãng yell la b sẽn dag n gʋls n yeel a woto wã:»
«Ade, mam tʋmda m koe-toagsda,
t'a reng fo taoore,
n lʋɩ taoor n maneg f sorã.»
11Sɩd-sɩda, mam yeta yãmb tɩ pagb sẽn dog b rãmbã sʋka, ned ka zĩnd sẽn yaa kãseng n yɩɩd a Zã ye. Baoosgo, soab ning sẽn yaa-a yao-zʋʋg arzãn soolmẽ wã yaa kãseng n yɩɩd yẽnda. 12#Luk 16.16Hal sẽn sɩng ne a Zã wakat tɩ ta moasã, yaa ne pãng la nebã kẽed arzãn soolmẽ. La yaa pãens rãmbã n tõogd n paamd-a. 13Wẽnnaam no-rɛɛsdbã fãa ne tõogã togsa pĩnd-n-bãngr goam soolmã wɛɛngẽ hal tɩ ta a Zã wakate. 14#Mal 3.23, Mat 17.10-13, Mark 9.11-13La yãmb sã n na n sak n deege, yẽnda yaa Eli ning sẽn dag n tog n wa-a wã. 15Sẽn tar-a tʋb bɩ a wʋme.
16Mam na n mamsa zamaan-kãngã nebã ne ãnda rãmba? Bãmb wẽnda wa kamb sẽn zĩ raagẽ n boond taab n yetẽ: 17«Tõnd peeba wɩɩs la yãmb ka sao ye. Tõnd yɩɩla kʋʋr yɩɩl la yãmb ka wiis ye.» 18Bala, a Zã waame n ka rɩt la a ka yũud ye, tɩ b yet tɩ sɩ-wẽng n tar-a. 19Ninsaal Bi-riblã sẽn wa wã, b rɩtame la b yũuda, tɩ nebã yetẽ tɩ b yaa yão-be-neda, la rã-yũuda, la yaood-dɛɛgdb ne yel-wẽn maandbã zoa. La yam tʋʋm‑sõama n wilgd yam sẽn yaa a soaba.
A Zeezi lenga tẽms kẽere
(Luk 10.13-16)
20Dẽ poore, a Zeezi sɩngame n leng tẽms nins bãmb sẽn maan bõn-bãn wʋsg b pʋsẽ wã, bala, bãmb ka sak n na n tek yam n kos sugr ye. 21#Eza 23.1-18, Eze 26.1—28.26, Zow 4.4-8, Amo 1.9,10, Zaka 9.2-4Bãmb yeelame: «Korazin, fo na paam toogo! Betsayɩɩda, fo na paam toogo! Bala, bõn-bãn nins sẽn maan yãmb pʋsẽ wã sã n dag n maanẽ Tɩɩr ne Sɩdõ sẽn yaa tẽn-wẽnsã pʋse, bãmb dag n na n tekẽ‑la yam hal daar zãra, n pil bot n zĩnd tompeglmẽ n kos sugri. 22Yaa woto yĩng la mam yet yãmb tɩ bʋʋdã daare, Tɩɩr ne Sɩdõ nebã sɩbgrã toolem kõn ta yãmb dẽndã ye. 23#Eza 14.13-15, Sɩng 19.24-28La foom, Kapɛrnaom, b na n zẽka foom hal tɩ f ta arzãna? Ayo, b na n sika foom hal tɩ ta kɩɩm-kulgu. Bala, bõn-bãn nins sẽn maan fo pʋgẽ wã sã n dag n maanẽ Sodom pʋgẽ, a rag n na ketẽ tɩ ta rũndã. 24#Mat 10.15, Luk 10.12Yaa woto yĩng la mam yet yãmb tɩ bʋʋdã daare, Sodom sɩbgrã toolem ka na n ta foom ye.»
Vʋʋsg sẽn yɛ-bã yĩnga
(Luk 10.21-22)
25Wakat-kãnga, a Zeezi gomame n yeele: M ba sẽn yaa arzãn la dũniyã Zu-soaba, mam pẽgda yãmba, yãmb sẽn solg bõn-kãens ne yam-dãmba, la ne yẽesem-dãmba, n yaool n vẽneg bõn‑kãens ne kom-bãoonegã yĩnga. 26N-yẽe! M ba, yãmb n dat tɩ yɩ a woto. 27#Zã 3.35, Zã 1.18, 10.15M ba ninga bũmb fãa mam nugẽ, la ned ba a yembr ka mi Bi-riblã ye, sã n ka ba wã bala. La ned ba a yembr ka mi ba wã, sã n ka Bi-riblã bala, la Bi-riblã sẽn dat vẽneg ba wã ne ned ninga.
28Bɩ y wa mam nengẽ yãmb‑dãmb fãa sẽn yɛ, la sẽn tʋk zɩɩb sẽn yaa zɩsgo, la mam na n kõo yãmb vʋʋsgo. 29#Zer 6.16Rɩk-y mam yubl-balgr n pidi, la y sak mam zãmsgã. Bala, mam yaa nin-bʋgsgo, la m yaa sũ-mar soaba, la yãmb na paam vʋʋsgo. 30Bala, yubl-balgr ning mam sẽn pit yãmbã yaa faoogo, la zɩɩb ning mam sẽn tʋkd yãmbã yaa faasga.
Currently Selected:
A Matye koe‑noogo 11: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
