A Zozoe 4
4
B wʋka kaset kug piig la a yiibu
1Israyɛll nebã fãa sẽn pɩʋʋg Zʋrdẽ kʋɩlgã n sɛ wã, Sẽn-Ka-Saab yeela a Zozoe yaa: 2«Yãk raop piig la a yiibu, rao a yembr buud fãa pʋgẽ, 3n yeel-b tɩ b wʋk kug piig la a yiib Zʋrdẽ kʋɩlgã tẽn-sʋka, zĩig ningã maan-kʋʋdbã sẽn yalsẽ wã, n tall n tɩ rʋʋg zĩig ning yãmb sẽn na n gãand rũndã yʋngã.» 4Dẽ, a Zozoe boola neb piig la a yiibã yẽnda sẽn dag n kɩt tɩ b yãk Israyɛll buudã sʋkã, buud fãa pʋgẽ rao a yembrã, 5n yeel-b yaa: «Loog-y Sẽn-Ka-Saab sẽn yaa yãmb Wẽnnaamã kaoolã koglg taoore, n kẽ Zʋrdẽ kʋɩlgã tẽn-sʋka, tɩ yãmb ned kam fãa rɩk kugr n palg a bãoko, tɩ sõorã zems ne Israyɛll buudã sõore. 6Woto, bõn-kãng na n yɩɩ bãnd sẽn be yãmb sʋka, tɩ yãmb kambã sã n wa sok yãmb tɩ kug-kãensã võor yaa bõe, 7bɩ y leok-b yaa: Daar ning Sẽn-Ka-Saab kaoolã koglgã sẽn wa n na n pɩʋʋg Zʋrdẽ kʋɩlgã, a koomã welgame. Dẽ, kug-kãensã na n tẽegda Israyɛll nebã bõn-kãng wakat fãa.»
8Israyɛll nebã maana wa a Zozoe sẽn yeelã. Bãmb yãka kug piig la a yiib Zʋrdẽ kʋɩlgã tẽn-sʋka, wa Sẽn-Ka-Saab sẽn dag n yeel a Zozoe wã, wa sẽn zems Israyɛll buudã sõore. La b talla kugã n pɩʋʋg kʋɩlgã n tɩ rʋʋg b sikã zĩigẽ. 9La a Zozoe kɩtame tɩ b vigl kug piig la a yiibã Zʋrdẽ kʋɩlgã tẽn-sʋka, zĩig ning maan-kʋʋdb nins sẽn tʋk kaoolã koglgã sẽn dag n tab n yasẽ wã, la kug-kãens keta be hal tɩ ta rũndã. 10Maan-kʋʋdb nins sẽn tʋk kaoolã koglgã kell n yalsa Zʋrdẽ kʋɩlgã tẽn-sʋka, hal tɩ b maan bũmbã fãa wa Sẽn-Ka-Saab sẽn dag n yeel a Zozoe t'a yeel nebã tɩ b maanã. La kell n yɩɩ wa a Moyiis sẽn dag n wilg a Zozoe wã. Dẽ, nebã rʋʋga kʋɩlgã tao-tao. 11La nebã fãa sẽn dʋʋg kʋɩlgã n sɛ, kaoolã koglgã ne maan-kʋʋdbã lʋɩɩ nebã taoore. 12A Rubɛn buudã ne a Gaad buudã n paas a Manaase buudã pʋɩ-sʋk zãa b zab-teed n lʋɩ Israyɛll nebã taoor wa a Moyiis sẽn dag n yeel-b tɩ b maanã. 13Raop sõor sẽn kolg tus pis-naas n bob b zab-teedo, n lʋɩ Sẽn-Ka-Saab kaoolã koglg taoore, n dabd Zeeriko tẽn-nabdrã sẽnẽ. 14Badaare, Sẽn-Ka-Saab kɩtame t'a Zozoe lebg nin-kãseng Israyɛll nebã nifẽ, la b waoog-a-la wa b sẽn waoog a Moyiis a vɩɩmã tɛkã.
15Sẽn-Ka-Saab yeela a Zozoe yaa: 16«Yeel maan-kʋʋdb nins sẽn tʋk kaoolã koglgã tɩ b yi Zʋrdẽ kʋɩlgã pʋg n yals yɩnga.» 17Dẽ, a Zozoe yeela maan-kʋʋdbã tɩ b yi kʋɩlgã pʋga. 18Maan-kʋʋdb nins sẽn tʋk kaoolã koglgã sẽn yi kʋɩlgã pʋgẽ wã bala, b sẽn yiis b naoã kʋɩlgã pʋgẽ n tabg tẽn-koɛɛngã zugã bal yee, la Zʋrdẽ koomã sẽn leb n sɩng zoees n pid n tãag a kogsã.
19Yɩɩ pipi kiuugã rasem piig daare, la Israyɛll nebã rʋʋg Zʋrdẽ kʋɩlgã, n tɩ sig Gilgall sẽn be Zeeriko tẽngã yaanga. 20Kug piig la a yiibã b sẽn dag n wʋk Zʋrdẽ kʋɩlgã pʋgã, a Zozoe kɩtame tɩ b tu n vigl-b Gilgalle. 21A Zozoe yeela Israyɛll nebã yaa: «Yãmb kambã sã n wa n sok yãmb nindaare, tɩ kug-kãensã võor yaa bõe, 22ad yãmb sẽn na n leok-ba: Zʋrdẽ kʋɩlgã lebga koɛɛng tɩ Israyɛll nebã pɩʋʋg n looge. 23Bala, Sẽn-Ka-Saab sẽn yaa yãmb Wẽnnaamã kʋɩɩsa Zʋrdẽ koomã yãmb yĩnga, sẽn na n yɩl tɩ yãmb tõog n pɩʋʋg wa b sẽn dag n kʋɩɩs mogr miuugã tõnd taoor tɩ tõnd tõog n pɩʋʋgã. 24Woto fãa yaa sẽn na n yɩlẽ tɩ dũniyã rãmb fãa bãng tɩ Sẽn-Ka-Saab tara pãnga, la yaa tɩ yãmb me tõe n zoe Sẽn-Ka-Saab sẽn yaa yãmb Wẽnnaamã daar fãa.»
Currently Selected:
A Zozoe 4: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
