A Zeremi 28
28
A Hananiya zĩrẽ pĩnd-n-bãngr goamã
1 #
2Rĩm 24.18-20, 2Kib 36.11-13 Yʋʋm-kãng pʋgẽ, Zʋʋda rĩm a Sedesiyaas naamã sɩngrẽ, a sẽn deeg a naamã tɩ yʋʋm naaslẽ, kiuug a nu soabã pʋgẽ, Gabawõ tẽng ned a Azʋʋr biig a Hananiya sẽn yaa no-rɛɛsã goma ne maam Sẽn-Ka-Saab roogẽ wã, maan-kʋʋdbã ne nebã fãa taoore, n yeele: 2Ade, Saasẽ-Pãng-Soabã sẽn yaa Israyɛll Wẽnnaamã yetame: Mam kaooda balgr ning Babilond dĩmã sẽn dag n balg yãmbã! 3Keta yʋʋm a yiibu, tɩ mam kɩt tɩ b tall Sẽn-Ka-Saab roogã teed nins fãa Babilond dĩm a Nebukatnedzaar sẽn dag n wʋk zĩ-kãngã n tall n kẽng Babilondã, n lebg n wa. 4Mam na n kɩtame tɩ b tall Zʋʋda rĩm a Yoyakim biig a Zekoniya, ne Zʋʋda neb nins fãa b sẽn dag n yõg n tall n kẽng Babilondã n wa, bala, mam na n kaoo Babilond dĩmã balgrã. Maam a Sẽn-Ka-Saab n yeele.
5A Zeremi leoka a Hananiya maan-kʋʋdbã ne nebã fãa sẽn dag n be Sẽn-Ka-Saab roogã pʋgẽ wã taoore. 6No-rɛɛs a Zeremi yeelame: Ãmina! Bɩ Sẽn-Ka-Saab kɩt t'a yɩ woto! Bɩ Sẽn-Ka-Saab kɩt tɩ pĩnd-n-bãngr goam nins fo sẽn togsã yɩ sɩda, la b kɩt tɩ b tall Sẽn-Ka-Saab roogã teedo, ne neb nins fãa b sẽn yõg n tall n kẽng yembd Babilondã n lebg n wa zĩ-kãngã! 7La bũmb sẽn be bala, m kotame tɩ f kelg gom-kãngã m sẽn na n yeel foom ne nebã fãa wã neere: 8No-rɛɛsdb n zĩnd kʋdem-wẽndẽ sẽn deng maam ne foom, n togs pĩnd-n-bãngr goam n wilg tɩ zabr ne tood la bã-longds na n zĩnda tẽms wʋsg ne soolem-kãsems pʋsẽ. 9La no-rɛɛs sã n wa yetẽ tɩ vɩ-bãan na n zĩndame, yaa a sẽn yeelã sẽn wat n paam pidsgã, la b na n bãng t'a sɩd yaa no-rɛɛs Wẽnnaam sẽn tʋme.
10Dẽ, no-rɛɛs a Hananiya yiisa balgrã sẽn dag n pid no-rɛɛs a Zeremi yublã, n kaoog-a. 11La a Hananiya yeela nebã fãa taoore: Ade, Sẽn-Ka-Saab yetame: Ka ne yʋʋm a yiibu, na n yɩɩ woto. Mam na n sãama balgr ning Babilond dĩm a Nebukatnedzaar sẽn dag n balg buud toay-toayã fãa wã. Dẽ zugẽ, a Zeremi rɩka a sor n looge.
12No-rɛɛs a Hananiya sẽn kaoog balgrã sẽn dag n be a Zeremi yublẽ wã poore, Sẽn-Ka-Saab goma ne a Zeremi n yeele: 13Kẽng n tɩ yeel a Hananiya tɩ maam a Sẽn-Ka-Saab yetame: «Fo tõe n kaoo balgr sẽn maan ne raoogo, la fo na n maana kut balgr n ledg a zĩigẽ.» 14Bala, Saasẽ-Pãng-Soabã sẽn yaa Israyɛll Wẽnnaamã yetame: «Mam ninga kut balgr buud toay-toayã fãa yublẽ, tɩ b sak Babilond dĩm a Nebukatnedzaare, la yẽnda na n sooga bãmba. Mam kɩtame tɩ yẽnda soog baa ne we-rũmsã.»
15La no-rɛɛs a Zeremi yeela a Hananiya: Hananiya, m kot-f lame tɩ f kelg neere! Sẽn-Ka-Saab ka tʋm foom ye, tɩ fo yaool n pirsd nebã tɩ b teeg zĩrẽ. 16Bõn-kãng yĩnga, Sẽn-Ka-Saab yetame: Mam na n menesa foom dũniyã zugu. Rõandã bala, fo na n kiime, fo sẽn kɩt tɩ nebã kɩɩs Sẽn-Ka-Saabã yĩnga. 17Sɩd me, yʋʋm-kãng bala, no-rɛɛs a Hananiya kii kiuug a yopoe soabã pʋgẽ.
Currently Selected:
A Zeremi 28: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
