A Zeremi 25
25
No-rɛɛs yʋʋm pisi la a tãab tʋʋmde
1 #
2Rĩm 24.1, 2Kib 36.5-7, Dãn 1.1,2 Ad koɛɛg ning Sẽn-Ka-Saab sẽn kõ a Zeremi Zʋʋda nebã fãa wɛɛngẽ. Yɩɩ Zʋʋda rĩm a Zoziyaas biig a Yoyakim sẽn deeg naam tɩ yʋʋm naaslẽ, sẽn yaa Babilond dĩm a Nebukatnedzaar naamã reegr pipi yʋʋmdã. 2Wẽnnaam no-rɛɛs a Zeremi yalsa Zeruzalɛm nebã fãa taoore, n togs koɛɛg Zʋʋda nebã fãa wɛɛngẽ n yeele:
3«Zʋʋda rĩm a Amon biig a Zoziyaas sẽn deeg naam tɩ yʋʋm piig la a tãablẽ tɩ ta rũndã, yaa yʋʋm pisi la a tãab la Sẽn-Ka-Saab gom ne maam. Mam togs-a-la yãmb n ka bas ye. Mam togs-a-la yãmb la y ka kelg ye. 4Sẽn-Ka-Saab tʋma b tʋmtʋmdbã sẽn yaa bãmb no-rɛɛsdbã yãmb nengẽ, b leb n tʋm-b lame n ka bas ye, la yãmb ka kelg ye. Yãmb ka yok y tʋbr n kelg ye.» 5Bãmb no-rɛɛsdbã rag n yetame: «M kotame tɩ yãmb ned kam fãa bas a manesem-wẽngã ne a tʋʋm-wẽnsã, la y na n zĩnda tẽng ning Sẽn-Ka-Saab sẽn dag n kõ yãmb ne y yaab-rãmbã hal daar zãr zamaan woo zamaanã. 6Ra tũ-y buud a taab wẽnnaam-dãmb n waoog-ba, la ra wõgemd-y n waoog-y-b ye. Ra sãam-y mam sũur ne y nusã tʋʋm ye. Woto, m ka na n maan-y bũmb ye. 7La yãmb ka kelg maam ye. Yãmb yika mam sũur tɩ m sɩbg yãmb y nusã tʋʋmã, n kɩt tɩ toog paam-yã. Maam a Sẽn-Ka-Saab n yeele.» 8Woto yĩnga, Saasẽ-Pãng-Soabã yetame: «Yãmb sẽn kɩɩs n ka sak m goamã yĩnga, 9mam na n kɩtame tɩ buud nins fãa sẽn be wĩntoog sẽn lʋɩtẽ dɩtgã, ne Babilond dĩm a Nebukatnedzaar sẽn yaa m tʋmtʋmdã, wa zab ne tẽn-kãngã nebã, la ne buud nins sẽn gũbg-a wã. Mam na n menesa bãmb n kɩt tɩ tẽngã lebg zĩ-vɩʋʋg wakat fãa yĩnga, tɩ neb sã n yãnd-a, bɩ b yɛɛs n fɩɩle. 10#Zer 7.34, 16.9, Vẽn 18.22,23Mam na n kɩtame tɩ sũ-noog kɩdengo, la sũ-noog yɩɩl sɛ b sʋka. B ka na n leb n wʋm pʋg-paal ne pʋg-paal sɩd yɩɩl rãamd ye. B kõn leb n wʋm neer werb rãamd ye, la b kõn leb n yãnd fɩtl bugum ye. 11#2Kib 36.21, Zer 29.10, Dãn 9.2Tẽn-kãngã fãa na n lebga raboogo, zĩ-vɩʋʋgo, la b na n yõga bu-kãensã n tɩ kẽes yembd Babilond yʋʋm pis-yopoe.
12La yʋʋm pis-yopoe wã sã n wa n pidi, mam na n sɩbga Babilond dĩmã ne soolem-kãng nebã b beegrã yĩnga. La m na n maana Kalde nebã tẽng me a woto, n kɩt t'a lebg zĩ-vɩʋʋg wakat fãa yĩnga. Maam a Sẽn-Ka-Saab n yeele. 13Mam na n kɩtame tɩ bũmb nins fãa mam sẽn dag n yeel tẽn-kãngã wɛɛngẽ tɩ b gʋls seb-kãngã pʋgẽ wã paam-a. Yaa Wẽnnaam no-rɛɛs a Zeremi sẽn dag n togs pĩnd-n-bãngr nins soolem-dãmbã wɛɛngẽ wã. 14Bala, buud sẽn tar pãens ne rĩm-kãsems na n sooga bãmba, la mam na n lebsa bãmb me wa sẽn zems b manesmã ne nusã tʋʋmã.»
Wẽnnaam sũ-puugr ne buud toay-toayã
15Bala, Sẽn-Ka-Saab sẽn yaa Israyɛll Wẽnnaamã yeela maam yaa: Reeg reezẽ rãam wam-kãngã sẽn be mam nugẽ, n pid ne sũ-puugr dãamã, n tɩ yũnug buud nins fãa mam sẽn tʋmd foom b nengẽ wã. 16Bɩ bãmb yũ n tuum la b zʋbse, zabr sʋʋgã mam sẽn tʋmd b sʋkã yĩnga. 17Dẽ, mam deega wamdã Sẽn-Ka-Saab nugẽ n tɩ yũnug buud nins fãa Sẽn-Ka-Saab sẽn dag n tʋm maam b nengẽ wã. 18Mam sɩnga ne Zeruzalɛm ne Zʋʋda tẽmsã, ne Zʋʋda rĩm-dãmbã ne a nanambsã, n kɩt tɩ b lebg ra-boodo, la zĩ-vɩɩdo, tɩ nebã sã n yãnd-b bɩ b yɛɛs n fɩɩle, a kãab-wẽngã yĩnga. Yaa rẽ n kɩt t'a ket n yaa woto hal tɩ ta rũndã.
19Sẽn pʋgd yaa bu-kãensã: Ezɩpt rĩm a Faarõ ne a tʋmtʋmdbã la a nanambsã, ne a nebã fãa, 20la sãambã fãa sẽn be Ezɩptã, ne Uts tẽng rĩm-dãmbã fãa, la Filistẽ nebã rĩm-dãmb nins sẽn be Askelon ne Gaaza, la Ekron ne Asdood zĩis nins sẽn ketã, 21la Edom ne Moaab la Amo nebã, 22ne Tɩɩr la Sɩdõ ne tẽms nins sẽn be ko-kãsengã rʋʋndã rĩm-dãmb fãa, 23la Dedan ne Tema la Buuz tẽmsã nebã, ne neb nins sẽn kõogd b yɛɛmã, 24la Arabi rĩm-dãmbã ne neb nins sẽn be we-raoogã pʋgẽ wã rĩm-dãmb fãa, 25ne Zimri la Elam ne Medi rĩm-dãmbã fãa, 26la rĩm-dãmbã fãa sẽn be tẽms nins sẽn be rɩtgã, sẽn pẽ-ba, la sẽn zãr-b ne taabã, la soolem nins fãa sẽn be dũniyã zugã. La sẽn na n yɩ-a yaoolem soab n yũ yaa Babilond dĩmã. 27Yeel bãmb tɩ Saasẽ-Pãng-Soabã sẽn yaa Israyɛll Wẽnnaamã yetame: Yũ-y-yã! Yũ-y tɩ y nens yilim tɩ y wʋbe, n lʋɩ n da leb n yik ye, y sẽn yã zabr sʋʋgã mam sẽn tʋm y sʋkã yĩnga. 28«La bãmb sã n zãgs tɩ b ka na n deeg wamdã sẽn be fo nugẽ wã n yũ, bɩ f yeel-b tɩ Saasẽ-Pãng-Soabã yetame: ‹Yaa tɩlɛ tɩ y yũ! Y na yũ-a lame!› 29Bala, mam na n sɩnga toogã ne tẽng ning b sẽn boond mam yʋʋrã a pʋgẽ wã. La yãmb tẽedame tɩ b na n basa yãmb taal bɩ? B ka na n bas-y taal ye, mam sẽn na n kɩt tɩ zabr zĩnd dũniyã nebã fãa zugã yĩnga. Maam a Saasẽ-Pãng-Soabã n yeele.»
30Woto yĩnga, bɩ foom a Zeremi togs-b
pĩnd-n-bãngr goam bõn-kãensã fãa wɛɛngẽ
n yeel-b yaa:
«Sẽn-Ka-Saab bee yĩngr n tãsdẽ,
b be b zĩ-sõngẽ wã n zẽkd-b koɛɛga.
Bãmb be b zĩigẽ wã n tãsdẽ.
Bãmb zẽkda b koɛɛg n kaasd wa
neb sẽn wobd reezẽ, reezẽ wobr wakate,
la wa neb sẽn tabd reezẽ, reezẽ wẽkr
koglg pʋgẽ,
n zabd ne dũniyã nebã fãa.
31Bʋrg n sãt n tat dũniyã tɛk fãa.
Bala, Sẽn-Ka-Saab tara yell ne buudã fãa,
bãmb yika bʋʋd ne bãmb fãa.
Bãmb kɩtame tɩ b kʋʋd nin-wẽnsã ne zabr sʋʋga.
Maam a Sẽn-Ka-Saab n yeele.»
32Saasẽ-Pãng-Soabã yetame:
«Toog paamda buud a ye,
n long a to.
Sob-kẽeng n yi dũniyã zĩ-zãrsẽ n watẽ.
33Badaare, Sẽn-Ka-Saab sẽn kʋ
neb ninsã kũum na n dʋra tẽng dũniyã
kɩreng a yembr n tɩ tãag kɩreng a to.
B ka na n yãb b yĩng ye.
La b ka na n tigim-b zĩ-yɛnga,
la b ka na n dɩk-b n mum ye.
Bãmb na n lebga põosg tẽn-gãongã yĩnga.
34Nanambse, zẽk-y y koees n yãbe!
Gãand-y tom pʋgẽ n bilme!
Bala, wakat taame tɩ b na n kood
yãmb n yʋlme.
Yãmb na n lʋɩɩ wa laok sẽn tar yõodo.
35Soondg zĩig ka leb n be nanambsã yĩng ye!
Nebã taoor dãmb ka leb n tar b sẽn kẽedẽ ye.
36Kelg-y nanambsã kelemse!
Kelg-y nebã taoor dãmb kaasgo!
Bala, Sẽn-Ka-Saab sãama zĩig ning b
sẽn dag n dɩlgd b nebã.
37Sẽn-Ka-Saab sũ-yikrã yĩng kɩtame,
tɩ bãmb tẽngã zĩ-sõamy wã lebga sɩddd...
38Sẽn-Ka-Saab basa bãmb tẽngã,
wa gɩgem-poll sẽn bas a gãag zĩiga.
Bala, Sẽn-Ka-Saab sũ-yikrã sẽn wat ne
sãoongã yĩnga,
bãmb sũ-puug-kãsengã kɩtame
tɩ b tẽngã lebg zĩ-vɩʋʋgo.»
Currently Selected:
A Zeremi 25: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
