Ebre‑rãmba 1

Wẽnnaam tũnuga b biigã n gom ne tõndo

1Wẽnnaam sẽn da tall bãmb no-rɛɛsdbã n pĩnd n gom naoor wʋsg ne tõnd yaab-rãmbã ne manesem buud wʋsgã, 2wakat-kãngã sẽn yaa yaoolem dayã, bãmb tũnuga b Bi-riblã n gom ne tõndo. Wẽnnaam kɩtame tɩ b soog bũmb fãa, la yaa b Bi-riblã la Wẽnnaam tall n naan dũni fãa. 3Bi-ribl‑kãng sẽn yaa b ba wã ziir yãgbã, la b ba wã yalẽ pukrã n zãad bũmbã fãa ne b gomd sẽn tar pãngã. Bãmb sẽn yɩlg nebã n yiis b yel-wẽnã n sa, b zĩnda naab a Wẽnd dɩtg hal saasẽ. 4Bãmb yɩɩda malegsã hal zĩig sẽn zãra, la rẽ kɩtame tɩ b paam yʋʋr sẽn yaa toor fasɩ ne malegsã rẽnda.

A Zeezi yɩɩda malegsã

5 # Yɩɩn 2.7, 2Sãm 7.14, 1Kib 17.13 Sɩd me, malɛɛk bʋg la Wẽnnaam yeel baa vugr tɩ:

Fo yaa mam bi-ribla, yaa maam n dog foom dũndã?

Wall b yeel me tɩ:

Mam na n yɩɩ yẽnda ba, la yẽnda na n yɩɩ mam biiga?

6 # Tõ 32.43 La bãmb sẽn na n wa ne b Bi-ribl kãsengã tẽng zugã, b yeelame yaa:

Bɩ Wẽnnaam malegsã fãa waoog-a.

7 # Yɩɩn 104.4 La b goma malegsã yell n yeel yaa:

B kɩtame tɩ b malegsã yɩ sobdo,

tɩ b tʋmtʋmdbã yɩ bug-vɩlemse.

8 # Yɩɩn 45.7,8 La bãmb yeela b Bi-riblã yaa:

Wẽnnaam, fo naam geer paada wakat sẽn kõn sa,

la fo naam dasaarã yaa tɩrlem dasaare.

9Fo nonga tɩrlem, la f kisga wẽnga.

Wẽnnaam, yaa rẽndã n kɩt

tɩ f Wẽnnaamã kõ foom sũ-noogo,

la b bas f tũud-n-taasã.

10 # Yɩɩn 102.26-28 Wẽnnaam leb n yeelame yaa:

Zu-soaba, yãmba, yãmb yẽbga tẽngã

hal sɩngr wẽndẽ, la yaa yãmb nusã n maan saasã.

11B fãa na n sãamame, la yãmba,

yãmb paada y zĩigẽ.

B fãa na n kʋdga wa futu.

12Yãmb na n põd-la wa kobre,

la b na n tegs-b-la wa futu.

La yãmba, yãmb na n ket n yaa

y sẽn yaa bũmb ningã,

la yãmb yʋʋm ka na n tall tɛk ye.

13 # Yɩɩn 110.1 La malɛɛk-bʋg la Wẽnnaam yeel baa vugr tɩ:

Zĩnd mam dɩtgo, hal tɩ m wa kɩt

tɩ f bɛɛbã lebg f nao roagendega?

14Dẽ yĩnga, malegsã fãa ka sɩɩs sẽn tʋmd Wẽnnaam yĩnga, tɩ Wẽnnaam mi n tʋm-b tɩ b tɩ maan tʋʋmd n sõng neb nins sẽn tog n deeg fãagrã tɩ yɩ b pʋɩɩrã la?

Currently Selected:

Ebre‑rãmba 1: MPBU

Highlight

Copy

Compare