Sɩngre 3
3
B riga ninsaal n yiis Edɛn zẽedã zĩigẽ
1 #
Vẽn 12.9, 20.2 Waaf rag n yaa sɩlem soab n yɩɩd we-rũmsã fãa Wẽnnaam Sẽn-Ka-Saab sẽn maanã. Waafã soka pagã yaa: «Sɩd-sɩdã, rẽ yĩnga, Wẽnnaam yeela yãmb tɩ y ra rɩ tɩɩsã fãa sẽn be zẽedã zĩigẽ wã biis sɩda?» 2Pagã yeela waafã yaa: «Wẽnnaam yeelame tɩ tõnd tõe n dɩɩ tɩɩsã sẽn be zẽedã zĩig pʋgẽ wã biisi. 3La sã n yaa ne tɩɩg ning sẽn be-a zẽedã zĩig tẽn-sʋkã, Wẽnnaam yeelame yaa: ‹Ra yãk-y-yã a biisã n dɩ, la y ra tol n sɩɩs-a me ye. Sã ka rẽ, yãmb sã n sɩɩs-a, yãmb na n kiime.› » 4Dẽ, waafã yeela pagã yaa: «Yãmb ka na n tol n ki ye! 5La yaa tɩ Wẽnnaam miime, tɩ yãmb sã n dɩ tɩɩgã bil daare, yãmb yamã na n wekame tɩ yãmb lebg wa Wẽnnaam, n mi sõama ne wẽng n bake.» 6Pagã gesame tɩ tɩɩgã biis yaa sõama tɩ rɩ, la a bee neer tɩ gese, la a yaa tɩɩg sẽn wat ne ratem tɩ rɩ n paam yam vẽnegre. Dẽ, pagã yãka tɩɩgã bil n dɩ, la a kõ a sɩdã sẽn dag n be ne yẽnda wã me t'a rɩ. 7Woto, bãmb b yiibã yam wekame, la bãmb bãngame tɩ b yaa b zaala. Dẽ, bãmb pãnema kankang vãad n sẽgne. 8Zaab-noor wakate, raoã ne a pagã wʋma Wẽnnaam sẽn dag n gõod zẽedã zĩig pʋg rãamde. Dẽ bãmb kẽe zẽedã zĩig tɩɩs sʋk n solg b meng ne Wẽnnaam Sẽn-Ka-Saabo. 9Wẽnnaam Sẽn-Ka-Saab boola raoã n sok-a yaa: «Fo bee yɛɛnẽ?» 10Raoã leokame: «Mam wʋma yãmb rãamd zẽedã zĩig pʋga, dẽ, rabeem yõka maam. Bala, mam yaa m zaala. Dẽ kɩtame tɩ mam zoe n soonde.»
11Wẽnnaam Sẽn-Ka-Saab yeela yẽnda yaa: «Ãnda n yeel foom tɩ f yaa f zaala? M mi tɩ fo ka rɩ tɩɩg ning mam sẽn yeel foom tɩ f ra rɩ wã biis la?» 12Raoã leokame: «Yaa yãmb sẽn kõ maam pag ning t'a be ne maamã n yãk tɩɩgã bil n kõ maam tɩ m dɩ.» 13#2Kor 11.3, 1Tɩm 2.14Dẽ, Wẽnnaam Sẽn-Ka-Saab soka pagã yaa: «Paga, yaa bõe tɩ fo maan woto?» La pagã leokame: «Yaa waafã n belg maam n kɩt tɩ mam dɩ tɩɩgã bila.» 14Wẽnnaam Sẽn-Ka-Saab yeela waafã yaa:
«Fo sẽn maan woto wã yĩnga,
kãab-wẽng bee fo zugu,
yir rũmsã fãa ne we-rũmsã fãa sʋka.
Fo kẽndã na n yɩɩ ne f pʋgã,
la tẽngã tom n na n yɩ fo rɩɩbo,
hal fo vɩɩmã tɛka.
15 #
Vẽn 12.17
Mam na n ninga beem foom ne pagã sʋka,
la fo yagengã ne pagã yageng sʋka.
Pagã yageng na n bedsa fo zugu,
la fo na n pogla yẽnda nao-kãsenkãare.»
16Wẽnnaam yeela pagã yaa:
«Mam na n kɩtame tɩ fo tʋdb wakat
yɩ toog wʋsg ne-fo.
Fo rogem na n yɩɩ toogo.
Fo ratmã ne f yamã na n loee ne f sɩdã.
La fo sɩdã na n sooga foom ne f ratmã fãa.»
17 #
Ebr 6.8
Wẽnnaam yeela raoã yaa: «Fo sẽn sak f pagã noorã, n dɩ tɩɩg ning mam sẽn dag n yeel foom tɩ f ra rɩ wã biisã yĩnga, mam na n ninga kãab-wẽng tẽn-gãongã zugu.
Tẽn-gãongã na n paama kãab-wẽng fo yĩnga.
Fo vɩɩmã tɛka, f na n namsa wʋsg
n yaool n paam f rɩɩbo.
18Gõos ne mo-gõos na n yii
tẽn-gãongã zugu.
Weoogã moodã na n yɩɩ fo rɩɩbo.
19La fo na n kaaga f rĩir tʋʋlg n yaool
n paam dɩɩb n dɩ.
Hal tɩ ta daar ning fo sẽn na n lebg
n leb tẽng tomẽ wã.
B sẽn yãk tẽng tom n maan foomã yĩnga.
Bala, fo yaa tẽng tom,
la fo na n leb n leba tẽng tomẽ.»
20A Ãdem pʋda a pagã yʋʋr t'a Hawa, sẽn dat n togs t'a ‹vɩɩm›, yẽnda sẽn yaa nin-vɩɩsã fãa ma wã yĩnga. 21Wẽnnaam Sẽn-Ka-Saab rɩka gãnd n maan fut n yeelg a Ãdem ne a pagã.
22 #
Vẽn 22.14
Wẽnnaam Sẽn-Ka-Saab yeelame: «Moasã, ninsaal lebga wa tõndo, n mi sõama ne wẽng n bake, rẽ wã, bɩ d gũus t'a ra wa yãk tɩɩg ning biis sẽn kõt vɩɩmã me n dɩ, n kell n vɩ n ka kiidẽ ye.» 23Wẽnnaam Sẽn-Ka-Saab riga yẽnda n yiis zẽedã zĩigẽ, n kɩt tɩ b ko tẽn-gãongã sẽn yaa zĩig ning b sẽn yãk tomã n maan bãmbã. 24Wẽnnaam sẽn dig ninsaal n yiis zẽedã zĩig pʋgẽ wã loogr zugẽ, b ninga Serubẽ-rãmb Edɛn zẽedã zĩig yaanga, ne sʋʋg sẽn wit bugum t'a wẽnemded zĩigã fãa, n gũud zẽedã zĩigã sor ning sẽn dabd tɩɩg ning biis sẽn kõt vɩɩmã sẽnẽ wã.
Currently Selected:
Sɩngre 3: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.