A Ezekɩyɛlle 42

Wẽnd doogã ro-bãoonego

1Raoã peega maam n yi n kẽng yɩng zakã sẽn be nug-rɩtg sẽnẽ wã, la yẽnda talla maam n tɩ kẽ ro-bãooneg nins sẽn dag n be zĩ-vɩʋʋgã ne roogã neng taoore, n be nug-rɩtg sẽnẽ wã. 2B maka roogã neng ning rɩtg rignoorã sẽn be wã, n mik t'a woglmã yaa kãntɩɩg koabga, t'a yalmã yaa kãntɩɩg pis-nu. 3Nen-kãng rag n tota pʋgẽ zakã woglem sẽn yaa kãntɩɩg pisi wã, n tot yɩng zakã zĩig ning b sẽn gãneg ne kugã. Zĩis nins b sẽn tũud n dʋʋdã rag n tota taaba, n tom taab b tãab-tãabo. 4Ro-bãoonegã taoore, zĩig b sẽn tũud n loogdẽ n dag n be beenẽ, t'a pʋgẽ wã sẽnẽ yalem yaa kãntɩɩg piiga, tɩ sor be beenẽ t'a yalmã yaa kãntɩɩg a yembre. B kõomã zĩis teesa nug-rɩtg sẽnẽ. 5Yĩngr dotã rag n yaa bãooneg n yɩɩd tẽngr dotã ne tẽn-sʋk rotã. Bala, b sẽn tũud zĩig ning n dʋʋdã rag n dɩɩ rotã. 6Rotã rag n toma taab b tãabo, la bãmb dag n ka tar da-lugds wa rotã sẽn tarã ye. Rẽ n kɩte, tɩ rot nins sẽn be-b yĩngrã yalem ka ta sẽn be-be tẽngrã ne sẽn be-b sʋkã ye. Rag n yaa woto hal n tãag yĩngri. 7Yɩng lal-gũbrã sẽn kell n zemsd ne ro-bãooneg nins sẽn be yɩng zakã sẽnẽ, n be rotã taoorã woglem dag n yaa kãntɩɩg pis-nu. 8Sɩdã, rot nins sẽn dag n teesd yɩng zakã sẽnẽ wã woglem dag n yaa kãntɩɩg pis-nu, la Wẽnd doogã neng woglem dag n yaa kãntɩɩg koabga. 9Ro-bãoon-bãmb tẽngre, kõom zĩig n dag n be beenẽ n teesd yaang sẽnẽ, tɩ sẽn yit-b yɩng zakã tũud beenẽ n kẽedẽ.

10Rot a taab me n dag n be zakã lal-gũbrã kɩreng ning sẽn be yaangã, n teesd zĩ-vɩʋʋgã ne roogã. 11Ro-bãoon-bãmb taoore, zĩig n dag n be beenẽ tɩ b tũud n loogdẽ. Bãmb yalẽ wã rag n yaa wa rot nins sẽn be nug-rɩtg sẽnẽ wã. B woglmã ne b yalmã fãa yaa a yembre. B zĩis nins b sẽn tũud n yitã, ne b yasrã la b kõomã zĩisã fãa rag n wẽnda taaba. 12Ro-bãooneg nins sẽn be-b nug-goabg sẽnẽ wã kõomã zĩis me rag n yaa a woto. Kõom zĩig n dag n be zĩig ning b sẽn tũud n loogdẽ wã neng taoore, n yaa zĩig sẽn kell n be lal-gũbrã sẽn be yaangã sẽnẽ wã, la yaa beenẽ la b tũud n kẽedẽ. 13Raoã yeela maam yaa: «Ro-bãooneg nins sẽn be nug-goabgã ne nug-rɩtgã, sẽn be zĩ-vɩʋʋgã taoorã yaa rot sẽn welg toore. Yaa ro-bãmb pʋs la maan-kʋʋdbã na n wat n yalsd Sẽn-Ka-Saab taoore, n dɩt bũmb nins sẽn welg toor n yɩɩdã. Yaa beenẽ la bãmb na n wat n bĩngd bũmb nins sẽn welg toor n yɩɩdã: bõn-koaadl kũunã, yel-wẽnã sugr kũun maandã, ne zems-n-taar maandã. Zĩ-kãng yaa zĩig sẽn welg toore. 14Maan-kʋʋdbã sã n kẽ zĩ-kãnga, b ka tog n yi zĩig sẽn welg toorã pʋg n kẽng yɩng zakã sẽnẽ ye. B tog n yeesa fut nins b sẽn yeelg n maan b tʋʋmdã, n bas zĩig sẽn welg toorã pʋga. Bala, fu-bãmb welga toore. Bãmb tog n baoo fut a taab n yeelg n yaool n yi n yals nebã taoore.»

Yɩng lalgã tiiri

15Raoã sẽn mag Wẽnd doogã pʋgã n sɛ, a talla maam n tũ rignoor ning sẽn tees yaangã n yi, n sɩng vɩʋʋg ning sẽn gilg roogã magbo. 16Yẽnda maka yaang sẽnẽ kɩrengã ne rasaar ning woglem sẽn yaa kãntɩɩg a yoobã, n mik t'a fãa yaa rasaarã naoor kobs-nu. 17Yẽnda maka kɩreng ning sẽn teesd nug-rɩtg sẽnẽ wã ne rasaar ning woglem sẽn yaa kãntɩɩg a yoobã, n mik t'a yaa rasaarã naoor kobs-nu. 18Yẽnda maka kɩreng ning sẽn teesd nug-goabg sẽnẽ wã ne rasaar ning b sẽn dag n tar n magdã, n mik t'a yaa rasaarã naoor kobs-nu. 19Yẽnda wẽnemdame n tees nin-taoor sẽnẽ, n dɩk rasaar ning b sẽn tar n magdã, n mak-a n mik t'a yaa rasaarã naoor kobs-nu. 20Yẽnda maka lalgã n gilg a kɩrems a naasã fãa, n mik t'a woglmã yaa rasaarã naoor kobs-nu, t'a yalmã me yaa rasaarã naoor kobs-nu. B rag n ninga lal-kãng n welg bũmb nins sẽn welg toorã ne bõn-zaalsã.

Currently Selected:

A Ezekɩyɛlle 42: MPBU

Highlight

Copy

Compare