A Ezekɩyɛlle 27
27
Wiisg Tɩɩr tẽngã yĩnga
1Sẽn-Ka-Saab goma ne maam n yeele:
2«Ninsaala, wiis Tɩɩr tẽngã yĩnga! 3Gom ne Tɩɩr tẽngã sẽn be ko-kãsengã noor n maand leebg ne nebã buud fãa wã, la sẽn wẽnemd n tees tẽms wʋsg sẽn be koom sʋkã, n yeel-a tɩ maam a Zu-soab a Sẽn-Ka-Saab yetame yaa:
‹Tɩɩr tẽnga, fo rag n yetame tɩ fo yaa
tẽng sẽn tar da-sãnde!
4Fo todsã bee ko-kãsengã sʋka.
Sẽn me-b foomã mee foom tɩ f
yaa neer zãnga.
5Bãmb maana fo kɩremsã ne sɩprɛs
tɩɩs raad sẽn yit Seniir tẽnga.
Bãmb maana fo ra-lugdsã ne sɛɛdr tɩɩs
raad sẽn yit Libã.
6Bãmb maana fo kogl-rugsdsã ne sɛn
tɩɩs raad sẽn yit Basã,
la b maan fo zĩndg zĩisã ne sɩprɛs tɩɩs
raad sẽn yit Sɩpre,
n nags-b ne wob-yẽna.
7B maana fo pɛɛlã b sẽn kãdã ne
gĩs-bãaneg sẽn yit Ezɩpt tẽnga.
B maana fo tãb-kaoorã pɛɛl ne peen-bãmba,
la b maan fo fu-rotã ne peen-moaamã,
la peen-miid sẽn yit Eliisa tẽms nins
koom sẽn gũbgã.
8Sɩdõ ne Arvaad nebã n dag n yaa fo
kogl-rugsdba,
la foom a Tɩɩr tẽng yam-dãmbã n dag
n yaa fo tʋmtʋmdb koom koglgã pʋga.
9Geball tẽng kãsem-dãmbã ne a tʋʋm-mitbã
n dag n be ne foom n manegd bũmb
nins fãa sẽn sãam koglgã pʋgã.
Koom kogend nins fãa sẽn dag n kẽnd
ko-kãsengã zugã, ne b tʋmtʋmdbã rag
n wata fo nengẽ n daad fo teedã.
10Pɛrs-rãmbã, ne Luud-rãmbã la Put
tẽng rãmbã rag n bee fo tãb-biisã sʋka,
bãmb n dag n yaa fo zab-zabdba.
B rag n yagenda b gãndã ne b kut
pugli wã fo nengẽ.
Bãmb dag n kɩtame tɩ fo paamd zu-zẽkre.›
11Arvaad nebã ne fo tãb-biisã n dag n karg n gilg fo lalsã. La Gamaad nebã n dag n be fo gãsdẽ wã. Bãmb dag n yagenda b logdã n gilg fo lalsã, n kɩt tɩ fo yaa neer zãnga.› »
Tɩɩr yaa leebg na-tẽnga
12Tarsɩɩs tẽngã rag n leebda ne foom, fo sẽn dag n tar teed buud toor-toor sẽn yaa wʋsgã yĩnga. Bãmb wata ne wanzuri, kutu, waasdo, la namdo, n koosd ne foom. 13Gɛrs tẽngã, ne Tuball la Mesɛk tẽmsã dag n leebda ne foom, b rag n wata ne yembse, la teed sẽn yõg ne zũudu, n tekd ne teed nins fo sẽn tarã. 14Togarma nebã rag n wata ne wiidi, la ne rũms sẽn tõe n tɛ teedo, la bõn-weese, n koosd ne foom. 15Dedan tẽng nebã me rag n leebda ne foom. Tẽms wʋsg sẽn be koom sʋkã rag n tũnugda foom n leebdẽ. La b rag n yaooda foom ne wob-yẽna, la ra-sabl sẽn yaa sĩdma. 16Siiri nebã rag n leebda ne foom, fo sẽn dag n tar teed wʋsgã yĩnga. La b wat ne kug-sõama sẽn pɩnda, peen-miidu, pɛɛl b sẽn kãde, la peen-gʋlem, ne zẽems buud toor-toor wams sẽn yaa miid la kẽese, la kug-sõama buud sẽn yaa miidu, n koosd ne foom. 17Zʋʋda ne Israyɛll tẽmsã rag n leebda ne foom. Bãmb rag n wata ne bɩle sẽn yit Minit soolmẽ, ne bur-maas buud toor-toore, la sɩɩdo, ne kaam, la bãas tɩ-sõodem, n koosd ne foom. 18Damaas tẽngã rag n leebda ne foom, fo sẽn dag n tar teed buud toor-toor sẽn yaa wʋsgã yĩnga. Bãmb dag n wata ne reezẽ rãam sẽn yit Elbõ ne pe-kõbd sẽn yaa pɛɛlga, n koosd ne foom. 19Vedan ne Yaavan sẽn be Uzall soolmẽ wã rag n wata ne kut b sẽn kudi, ne parfẽ sẽn tar yũ-noogo, n tekd ne fo teedã. 20Dedan nebã rag n leebda ne foom, n wat ne wed-moos zombg teedo. 21Araabi ne Kedaar tẽng nanambsã fãa rag n tũnugda foom n leebdẽ. Bãmb dag n koosda pe-ribli, ne pe-raado, la boees ne foom. 22Seba ne Rama lɛɛbdbã rag n wat n leebda fo nengẽ. Bãmb dag n wata ne parfẽ-rãmb sẽn tar yũ-noogo, la ne kug-sõama buud toor-toore, la sãnem n koosd ne foom. 23Aarã ne Kane, la Edɛn, ne Seba, la Asiiri ne Kilmaad lɛɛbdbã rag n leebda ne foom. 24Bãmb dag n wata ne te-neeb n leebd ne foom: Yaa fut sẽn yaa miidu, fut b sẽn kãde, fu-gʋlem buud toor-toore, ne wĩy b sẽn kale, n tar pãnga, n leebd ne foom. 25#Vẽn 18.11-19Tarsɩɩs koom kogl-bɛdã n dag n zɩt fo teedã.
Wiisg Tɩɩr yĩnga
Fo rag n tara arzegs la ziir wʋsgo,
n be ko-kãsemsã sʋka.
26Kogl-rugsdbã talla foom n kẽn ko-kãsems zutu.
Yaang sobg wa n sãama foom
ko-kãsemsã sʋka.
27Fo lʋɩɩsã daare, fo arzegsã, fo leebgã, fo teedã, la fo pʋgẽ tʋmtʋmdbã, ne f te-manegdbã, ne neb nins sẽn manegd fo teed sẽn sãamã, la fo raadensã, ne tãb-biis nins sẽn be fo nengẽ wã, la zãma wã fãa sẽn be fo pʋgẽ wã, b fãa gill na n paa ko-kãsemsã sʋka.
28Sẽn manegd-b teedã fo pʋgẽ wã
yel-pakrã kelemsã kɩtame tɩ zĩis nins
sẽn be koomã noorã rigimdi.
29Neb nins sẽn mi-b koglg rugsgã fãa
na n sig n basa b koom kogendã,
la koom kogendã pʋsẽ tʋmtʋmdbã,
ne sẽn manegd-b kogendã teedã fãa
na n yii ko-kãsengã pʋga.
Bãmb na n yalsa tẽn-koɛɛngã zugu.
30Bãmb na n zẽka b koees n yãb fo yĩnga,
bãmb na n kelma ne sũ-sãanga.
Bãmb na n yuga b zut tom,
bãmb na n bilma tompeglmẽ.
31Bãmb na n põnga b zut fo yĩnga,
bãmb na n sẽgna boto,
bãmb na n kelma ne sũ-sãang f yĩnga.
Bãmb na n wiisa ne sũ-sãang fo yĩnga.
32Bãmb toogã pʋga,
b na n wiisa ne sũ-sãanga,
la b yãb fo yĩng n yeele:
«Ãnda n dag n yaa wa Tɩɩr tẽnga?
Ãnda n dag n yaa wa tẽng ning
sẽn lebg sɩddd... ko-kãsengã sʋkã?
33Wakat ning b sẽn dag n yiisd fo leebgã teedã ko-kãsemsã pʋsẽ wã, fo rag n tɩgsda neb kʋʋng buud toor-toore. Fo paoongã ne f teedã sẽn dag n yaa wʋsgã yĩnga, fo kɩtame tɩ dũniyã rĩm-dãmb lebg arzegs rãmba.
34La ko-kãsemsã sẽn wa n sãam foomã,
fo teedã ne f zãma wã fãa sẽn be fo
pʋgẽ wã lisa ko-zulumsẽ wã.
35Tẽms nins fãa sẽn be koom sʋkã
yɛɛsa fo yĩnga.
Rabeem kẽe bãmb dĩm-dãmbã,
bãmb nens yeegame.
36Tẽn-zẽmsã neb nins sẽn yaa lɛɛbdbã
fɩɩnda fo wɛɛngẽ.
Fo lebga bũmb sẽn wat ne pelen-yɩka.
Fo ka leb n beẽ, la f kõn tol n leb n zĩnd abada.»
Currently Selected:
A Ezekɩyɛlle 27: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
