A Ezekɩyɛlle 21

Pĩnd-n-bãngr goam Negɛɛv weoogã yĩnga

1Sẽn-Ka-Saab goma ne maam n yeele:

2«Ninsaala, wẽnemd f neng n tees nug-goabg sẽnẽ n togs pĩnd-n-bãngr goam n mong-a bʋʋm. Togs pĩnd-n-bãngr goam n keoog Negɛɛv weoogã. 3Yeel Negɛɛv weoogã yaa: ‹Kelg Sẽn-Ka-Saab koɛɛga.› Ade, Zu-soab a Sẽn-Ka-Saab yetame. ‹Mam na n yõgna bugum fo pʋgẽ t'a rɩ tɩ-maasã fãa ne tɩ-koeemsã fãa. Bug-kãng sẽn witã ka na n tol n ki ye. Bugmã na n dɩɩ nensã fãa, sẽn sɩng ne nug-goabg n tɩ tãag nug-rɩtgo. 4Nebã fãa na n yãame tɩ yaa maam a Sẽn-Ka-Saab n yõgen bugmã, la a ka na n tol n ki ye.› »

5Dẽ, mam yeelame yaa: «Wii! Zu-soab a Sẽn-Ka-Saabo, b gomda mam yell n yetẽ tɩ mam wẽeda yel-bũn bala.»

6Sẽn-Ka-Saab goma ne maam n yeele:

7«Ninsaala, wẽnemd f neng n tees Zeruzalɛm sẽnẽ n togs pĩnd-n-bãngr goam n mong a pʋʋsg zĩisã bʋʋm. La f togs pĩnd-n-bãngr goam n sagl Israyɛll nebã. 8Yeel Israyɛll tẽn-gãongã tɩ maam a Sẽn-Ka-Saab yetame: ‹Ade, mam zabda ne foom. Mam na n wõoga m zabr sʋʋg n menes nin-tɩrsã ne nin-wẽnsã sẽn be fo pʋgẽ wã. 9Mam sẽn na n menes nin-tɩrsã ne nin-wẽnsã yĩnga, mam sʋʋgã na n yi a wʋʋgẽ n kʋ b fãa, sẽn sɩng ne nug-goabg n tɩ tãag nug-rɩtgo. 10Woto, bãmb fãa na n bãngame tɩ yaa maam a Sẽn-Ka-Saab n wõog m sʋʋgã, la m ka na n leb n sui-a a wʋʋgẽ ye.

11La foom a ninsaala, wõose, sulg ne sũ-sãanga, wõos bãmb nifẽ. 12La b sã n sok foom tɩ yaa bõe tɩ f wõosdẽ, bɩ f yeel-b tɩ yaa kibar n wate, la a sã n wa, nebã fãa sũy na n sãamame tɩ b nusã pãng sɛ, tɩ b yamã yuusi, tɩ b rũmã rigi. Ade, a watame, a taame. Maam a Zu-soab a Sẽn-Ka-Saab n yeele.› »

Koɛɛga, zabr sʋʋg wɛɛngẽ

13Sẽn-Ka-Saab goma ne maam n yeele:

14«Ninsaala, togs pĩnd-n-bãngr goamã!

Yeel tɩ maam a Sẽn-Ka-Saab yetame:

‹Zabr sʋʋga! Zabr sʋʋga!

Sʋʋga saasame, b sõog-a lame t'a pɩnda.

15B saas-a-la kʋʋb yĩnga.

B ruug-a lame t'a tõe n yãge.

Yaa tõnd sũur na yɩ noog sɩda?

M biigã dasaar paoogda tɩɩg buudã fãa.

16B rɩk-a lame n kɩs tɩ b ruugi,

tɩ nug tõe n tall-a n zabe.

B saas-a lame, b saasa zabr sʋʋgã,

b sõog-a lame n ning-a nin-kʋʋdã nugẽ.

17Ninsaala, yãb n wiisi.

Bala, b wõoga sʋʋgã n na n sɩbg m nebã.

B wõog-a lame n na n sɩbg Israyɛll nanambsã fãa.

B naaga bãmb ne m nebã n kʋ ne sʋʋgã.

Dẽ yĩngã, bɩ f pĩis f ger ne sũ-sãanga.

18Bala, yaa makre. La dasaar ning sẽn paoogd-a wã sã n sãame, na n yɩɩ bõe moasã? Zu-soab a Sẽn-Ka-Saab n yeele.

19Foom a ninsaala, togs pĩnd-n-bãngr goamã,

pãb nug-pogse.

Bɩ sʋʋgã kɛ naoor a yi, a kɛ naoor a tã.

Sʋʋgã yaa sãoong sʋʋga,

yaa sãoon-kãseng sʋʋg n gũbg bãmba.

20Sẽn na n yɩlẽ tɩ bãmb raoodã booge,

la sẽn na n yɩlẽ tɩ pãn-komsem wʋsg kẽ-ba.

Mam na n diga bãmb ne zabr sʋʋg

b rignoyẽ wã fãa,

Kayto! B maan-a lame t'a tõe n yãgda.

B maan-a-la kʋʋb yĩnga.

21B sẽn na n bool foom zĩig ning fãa,

bɩ f kɛ n leb rɩtgo,

segl n kɛ n leb goabga!

22Mam me na n pãba nug-pogse,

la m na n basame tɩ m sũ-puugrã maan

a tʋʋmd n tãag a tɛka.

Mam yaa Sẽn-Ka-Saabo, yaa maam n yeele.› »

B gũbga Zeruzalɛm n deeg-a

23Sẽn-Ka-Saab goma ne maam n yeele:

24«Foom a ninsaala, tuk soay a yiib Babilond dĩmã zabr sʋʋg sẽn na n tũ n wa. Soay a yiibã fãa na n yii tẽng a yembr pʋgẽ. Gʋls bãnd n ning sor fãa sẽn dabd tẽng fãa pʋgẽ sɩngrẽ. 25Tuk sor zabr sʋʋgã sẽn na n tũ n wa Raba sẽn yaa Amo nebã tẽngẽ wã ne Zʋʋda la Zeruzalɛm sẽn yaa tẽng sẽn gũbg ne lalsã. 26Bala, Babilond dĩmã tɩ yalsa so-palempaasẽ, a yalsa so-pɩʋʋgẽ n na n bʋg bagre. Yẽnda zugsda a loko, la a sokd a bõn-naandse, #21.26 Yẽnda zugsa a lok n sok a wẽn-naandse: B rag n ningda pɛɛm lok pʋg n zugs tɩ b yi n dʋʋge, la peemd ning sẽn yi lokã pipi n lʋɩ t'a noorã tees sor ningã, yaa so-kãng la b rɩkda. la a get rũng sãoorẽ. #21.26 Sãoore: Bokda noaag bɩ liuul bɩ rũng sãoore, n ges neere, wa koɛɛg n gʋls be, n karem n wilg koɛɛgã. Yaa wa tõnd zamaanã rãmb sẽn karemd yõens nao sẽn gʋls bĩisr zugã. 27La bagrã bãnd ning sẽn dag n be a rɩtg nugẽ wã yãka Zeruzalɛm, tɩ b na n yãk zab-teed nins b sẽn tar n tãad rot n lubdẽ wã n tɩ zab ne-a, n kɩt tɩ sãoong zĩndi, tɩ b kaas zabr kaasg a yĩnga. B na n tilga zab-teed nins b sẽn tar n tãad rot n lubdẽ wã n tees a rignoyã, b na n zama tom dʋya, la b tu bok n gũbg-a. 28Zeruzalɛm dãmbã wẽenegã yĩnga, bãmb tagsdame tɩ bagrã Babilond dĩmã sẽn bʋgã yaa zaalem.» La Babilond dĩmã tẽeg-b-la b kongrã, la rẽnda yĩng n kɩt tɩ b na n tall-b n kẽng yembdã. 29Bõn-kãng yĩnga, Zu-soab a Sẽn-Ka-Saab yetame: «Yaa yãmb sẽn puk y beegrã, la y yel-manesmã fãa sẽn wilg y yel-wẽnã yĩng n kɩt tɩ b tẽeg y kongrã yelle, bala, tẽeg-kãng na n waa ne sɩbgr yãmb zugu. Yãmb na n lʋɩ Babilond dĩmã nugẽ.

30Foom a Israyɛll na-wẽng sẽn yaa nin-kʋʋda, fo sɩbgrã daar watame, yaa daar ning kongrã sẽn na n ta a tɛka!» 31Zu-soab a Sẽn-Ka-Saab yetame: «Yãk a zug peen-vindgã, fõk a naam maanfã. Bũmbã fãa na n tekame! Sẽn zẽkã na n paama sikri, la sẽn sikã na n paama zẽkre. 32Raboogo, raboogo! Yaa raboog bala! Mam na n kɩtame tɩ Zeruzalɛm lebg raboogo. Bũmbã fãa zoe n tekame! La yõwã ka na n zĩndi, hal tɩ soab ning sẽn na n kao-a bʋʋdã wa, tɩ m kõ-a tẽngã.»

Amo nebã sɩbgre

33 # Zer 49.1-6, Eze 25.1-7, Amo 1.3-15, Sof 2.8-11 Foom a ninsaala, togs pĩnd-n-bãngr goamã! Yeel tɩ ad Zu-soab a Sẽn-Ka-Saab sẽn gomde, Amo nebã ne b paoogrã wɛɛngẽ. Yeel yaa: ‹Sʋʋgã! B wõoga sʋʋgã, b sõog-a-la kʋʋb yĩnga, b sõog-a-la sãoong yĩnga, b sõog-a lame t'a tõe n yãge!› 34Yãmb belgr vẽnegrã ne y zĩrẽ bagrã pʋgẽ, b na n kooda yãmb nin-wẽnsã sʋka. B kooda yãmb neb nins daarã sẽn wate, wakat ning kongrã sẽn na n ta a tɛkã. 35Lebs-y y sʋʋgã a wʋʋgẽ. Bala, mam na n kaoo fo bʋʋd zĩig ning b sẽn naan foomã, tẽng ning fo sẽn yitẽ wã. 36Mam na n sika m sũ-yikrã yãmb zugu. Mam sũ-puugrã na n dɩɩ yãmb wa bugum. Mam na n basa yãmb nin-toos nusẽ, mam na n basa yãmb neb sẽn mi sãoong nusẽ. 37Bugum na n dɩɩ yãmba. Y zɩɩm na n daaga y tẽngã pʋgẽ. B ka na n leb n tẽeg yãmb yell yɛs ye. Yaa maam a Zu-soab a Sẽn-Ka-Saab n yeele.

Currently Selected:

A Ezekɩyɛlle 21: MPBU

Highlight

Copy

Compare