A Ezekɩyɛlle 10

Sẽn-Ka-Saab leb n puka b ziirã

1 # Eze 1.26, Vẽn 4.2 Mam gesame, la ade, sa-gãong ning sẽn be Serubẽ-rãmbã zugẽ wã zugu, bũmb n dag n be beenẽ n wẽnd safɩɩre. Serubẽ-rãmbã zugẽ, bũmb n dag n be beenẽ t'a yalẽ wã wẽnd geere. 2#Vẽn 8.5La Sẽn-Ka-Saab yeela rao ning sẽn dag n yer-a lamd gĩs-bãaneg fuugã yaa: «Kẽ ruzãntã sẽn be Serubẽ-rãmbã tẽngrã pʋga, n yõng bug-saal Serubẽ-rãmbã sʋk ne f nusã n lob tẽngã zugu!» La a kẽnga beenẽ mam nifẽ.

3Raoã sẽn ta wã tɩ Serubẽ-rãmbã rag n yasa roogã nug-rɩtgo, la sawad-taok n dag n pid pʋgẽ zakã. 4Dẽ, Sẽn-Ka-Saab ziirã yii Serubẽ-rãmbã zugẽ n zẽk n tɩ be roogã rigno-koakẽ. La sawad-taokã pida roogã, la zakã pida ne Sẽn-Ka-Saab ziirã vẽenem. 5Serubẽ-rãmbã pɩgsã bʋrgã rãamd rag n sãtame hal n tat pipi samandã, la b bʋrgã rag n wẽnda Pãng-Soabã koɛɛg b sẽn wat n gomdã.

6Sẽn-Ka-Saab sẽn yeel ned ning sẽn yer lamd fuugã t'a yãk bugmã sẽn be ruzãntã pʋg Serubẽ-rãmbã sʋkã, kẽngame n tɩ yals ruzãntã sɛɛga. 7Dẽ, serubẽ-rãmbã ned a yembr tẽega a nugu, n yãk bugmã sẽn be bãmb sʋkã, n ning ned ning sẽn yer lamd gĩs-bãaneg fuugã nusẽ t'a zã n yi. 8Bũmb sẽn wẽnd ninsaal nus n dag n be serubẽ-rãmbã pɩgsã tẽngre.

9 # Eze 1.15-21 Mam gesame, la ade, ruzãnt-rãmb a naas n dag n be serubẽ-rãmbã sɛɛga, rat n yeel tɩ serubẽ fãa sɛɛgẽ, ruzãnt a yembr n be be. La ruzãnt-bãmb rag n pɩnda wa kirzoliti. 10Ruzãnt-dãmb a naasã fãa yalẽ rag n wẽnda taaba, la ruzãnt fãa rag n wẽnda wa a be a to pʋgẽ. 11Bãmb sẽn dat n kẽng kɩreng ning fãa kɩrems a naasã sʋka, b ka baood n wẽnemd ye. Bãmb sã n kẽnda, b ka wẽnemded ye. Bãmb kẽnda neng fãa sẽn teesẽ n ka wẽnemdedẽ ye. 12#Vẽn 4.8Serubẽ-rãmbã yĩngã tõre, b poayã, b nusã, b pɩgsã, ne b ruzãnt-rãmb a naasã fãa rag n pida ne nin b zĩigã fãa. 13La mam wʋma b sẽn boond ruzãnt-dãmbã tɩ bõn-gilsi. 14#Eze 1.10, Vẽn 4.7Serubẽ fãa rag n tara nens a naase. Pipi soabã neng rag n yaa serubẽ nenga, la a yiibẽ soabã neng rag n yaa ninsaal nenga, tɩ tãabẽ soabã neng yaa gɩgemd nenga, tɩ naasẽ soabã yaa pa-nand-tugr nenga. 15La Serubẽ-rãmbã zẽka yĩngri. Rag n yaa bõn-vɩɩg ning mam sẽn dag n yãnd Kebaar kʋɩlgã noorã. 16Serubẽ-rãmbã sã n dag n kẽnda, ruzãnt-rãmbã me tũuda bãmb n kẽnda. La b sã n dag n yidg b pɩgsã n na n yɩke, ruzãnt-rãmbã sẽn be b sɛɛgẽ wã me tũud n yɩkdame. 17La serubẽ-rãmbã sã n dag n yalse, ruzãnt-rãmbã me yalsdame. La b sã n dag n zẽke, ruzãnt-rãmbã me tũuda bãmb n zẽke. Bala, bõn-vɩɩgã sɩɩg rag n bee ruzãnt-dãmbã pʋsẽ.

Sẽn-Ka-Saab ziirã yii Wẽnd doogẽ wã

18Sẽn-Ka-Saab ziirã yii Wẽnd doogã noor n kẽng n tɩ yals Serubẽ-rãmbã zugẽ. 19Serubẽ-rãmbã yidga b pɩgsã n yɩk n loog ne b ruzãnt-rãmbã mam nifẽ. La bãmb tɩ yalsa Sẽn-Ka-Saab roogã noor ning sẽn be yaangã, la Israyɛll Wẽnnaamã ziir dag n bee yĩngri, bãmb zugẽ wã. 20Rag n yaa bõn-vɩɩg ning mam sẽn dag n yãnd Israyɛll Wẽnnaamã tẽngrã, Kebaar kʋɩlgã noorã, la mam bãngame tɩ yaa serubẽ-rãmba. 21Serubẽ fãa rag n tara nens a naas ne pɩgs a naase, la bãmb pɩgsã tẽngre, bũmb sẽn wẽnd ninsaal nus n dag n be beenẽ. 22Bãmb nensã wẽnda nens nins mam sẽn dag n yãnd Kebaar kʋɩlgã noorã. B yalẽ wã rag n yaa a yembre, rag n yaa bãmb bala. Bãmb ned kam fãa rag n kẽnda a taoor tɩrg bala.

Currently Selected:

A Ezekɩyɛlle 10: MPBU

Highlight

Copy

Compare