Yikri 28

A Aarõ ne a kambã lebga maan-kʋʋdba

1«Bool f kẽem a Aarõ ne a kom-dibli wã tɩ b yi Israyɛll nebã sʋk n wa fo nengẽ, n wa maan maan-kʋʋr tʋʋmd mam waoogr yĩnga. Yaa a Aarõ ne a kom-dibli wã, a Nadaabe, ne a Abihu la a Eleyazaar ne a Itamaare.»

Maan-kʋʋr kãsmã fuugu

2«Maan fut sẽn welg toor n kõ f kẽem a Aarõ, sẽn na n wilg yẽnda a zĩiga, la a naam. 3Gom ne tʋʋm-mitb nins fãa mam sẽn kõ yamã tɩ b maan a Aarõ futã tɩ b welg toore, yẽnda sẽn kʋʋd maand mam taoorã yĩnga. 4Ad fut nins bãmb sẽn na n maanã: yaa yãoog lutga, ne maan-kʋʋr kãsem fuugu, la fu-yor-bil ne fuug sẽn kãde, la zu-vindga, ne sẽbdga. Bɩ bãmb maan fut sẽn welg toor n kõ f kẽemã ne a kom-dibli wã tɩ b maand maan-kʋʋr tʋʋmd mam taoore. 5Bɩ bãmb dɩk sãnem gĩsi, ne gĩs sẽn yaa miuug masɩ, la sẽn yaa kẽeg haoo, ne gĩs-moaama la gĩs-miidu, ne lamd gĩs-bãaneg n maan-ba.»

Maan-kʋʋrã fuugu

(28.6-14, Yik 39.2-7)

6«Bɩ b maan maan-kʋʋr kãsem fuug sẽn wʋg ne sãnem gĩsi, la gĩs sẽn yaa miuug masɩ, la sẽn yaa kẽeg haoo, ne gĩs-moaama la gĩs-miidu, ne lamd gĩs-bãanegã, tʋʋm-mitbã sẽn maandã. 7B tog n ninga bãg-tabd a yiib a zĩis a yiibã, n tong fuugã taoor ne a poorẽ. 8Bɩ b kell n sẽ maan-kʋʋr kãsem fuugã sẽbdga t'a tabend ne fuugã menga, ne sãnem gĩsi la gĩs sẽn yaa miuug masɩ, la sẽn yaa kẽeg haoo, ne gĩs-moaama la gĩs-miidu, ne lamd gĩs-bãanegã. 9Gʋls Israyɛll buudã yʋy onigs kug a yiib zut ne kɩtga. 10Gʋls yʋy a yoob kugr a ye zugu, la f gʋls yʋy a yoobã me kugr a to zug wa sẽn zems kãsem pʋgdg-pʋgdga. 11Gʋls Israyɛll kambã yʋy kug a yiib zut wa tʋʋm-mitb sẽn dɩkd kɩtg n gʋlsd kug n maand bãndã. Ning kugã sãnem gãtsã pʋsẽ. 12Ning kug a yiibã fãa maan-kʋʋr kãsem fuugã bãgdẽ. Bãmb na n yɩɩ kug Israyɛll nebã tẽegr yĩnga. Yaa woto la a Aarõ na n zã bãmb yʋyã a bãgd a yiibã zutu, n tẽegd bãmb yell Sẽn-Ka-Saab taoore. 13Maan sãnem loetse, 14ne sãnem halaal sogl-bãooneg a yiibu, n kal bãmb wa wĩiri. Tong soglã sẽn kalã ne gãtsã.»

Yãoog lutgã

(28.15-28, Yik 39.8-21)

15«Maan yãoog lutg sẽn wilgd bʋʋdo. Tog n yɩɩ tʋʋm-mitb n na n tʋm-a, wa b sẽn tʋm maan-kʋʋr kãsem fuugã to-to wã. Yaa ne sãnem gĩsi, la gĩs sẽn yaa miuug masɩ, la sẽn yaa kẽeg haoo, ne gĩs-moaama, la gĩs-miidu, ne lamd gĩs-bãanegã. 16Maan-a ne pɛɛl a yiib sẽn pʋgl taaba, t'a yɩ maoko. A woglmã tog n zemsa nug-yakemd a yembre t'a yalmã me zems nug-yakemd a yembre. 17Rɩk kug nins fo sẽn na n ning gãtsã pʋsẽ wã, n munums yãoog lutgã zug ruls a naasã pʋga. Maan dẽenem dulgã ne sardoan la topaaz ne emerood kuga. 18B tog n maana rulg a yiibẽ soabã ne ɛskarbukli, la ne safɩɩre, ne diyama kuga. 19Rulg a tãabẽ soabã tog n yɩɩ ne opalle, la ne agate, ne ametist kuga. 20La rulg a naasẽ soabã tog n yɩɩ ne kirzoliti, ne onigsi, la ne zaspe kuga. B na n ninga bãmb sãnem gãtsã pʋsẽ. 21Kugã yʋy ne b sõorã na n zemsa a Israyɛll kom-dibli wã piig la a yiibã yʋyã. Bɩ b gʋls bãmb zut ne kɩtg tɩ b lebg wa bãnde, kugr fãa ne a yʋʋre, sẽn yaa yʋʋr a yembr Israyɛll buud piig la a yiibã sʋka. 22Maan sãnem halaal sogle, n kal-a wa wĩir n ning yãoog lutgã zugu. 23Maan sãnem tuiids a yiib sẽn yaa gils yãoog lutgã yĩnga, n ning-b a kɩrems a yiibã gõdgr zĩisẽ. 24Tong sãnem wĩy a yiibã ne tuiids a yiibã sẽn be yãoog lutgã kɩrems a yiibã gõdgr zĩisẽ wã. 25Tong wĩy a yiibã noy ne gãtsã sẽn be maan-kʋʋr kãsem fuugã bãgdẽ wã taoorã. 26La f maan sãnem tuiids a yiib n ning bãmb yãoog lutgã kɩrems a yiibã gõdgr zĩisẽ, n ning bãmb pʋgẽ, n tablg ne maan-kʋʋr kãsem fuugã. 27Maan sãnem tuiids a yiib n ning maan-kʋʋd kãsem fuugã taoor bãgdã tẽngre, zĩig ning sẽbdgã sẽn tong ne fuugã. 28Tui gĩs sẽn yaa kẽeg haoo yãoog lutgã tuiidsẽ, ne tuiids nins sẽn be maan-kʋʋr kãsem fuugẽ wã, n loe tɩ yãoog lutgã kell n pa sẽbdgã zug n ka tõe n lak n bas fuugã ye. 29La a Aarõ sã n kẽed sɛk roogã pʋgẽ, a na n zãa Israyɛll buudã yʋy a sũurẽ, wa sẽn gʋls yãoog lutgã sẽn wilgd bʋ-kaoorã zugã, tɩ yɩ tẽegr Sẽn-Ka-Saab taoor daar fãa. 30#Sõd 27.21, Tõ 33.8, Ɛsd 2.63, Neem 7.65Ning urim ne tumim yãoog lutgã sẽn wilgd bʋ-kaoorã pʋgẽ, t'a Aarõ sã n wa Sẽn-Ka-Saab taoore, bɩ be a yãoogẽ wã. Woto, a Aarõ na n zãa Israyɛll nebã bʋ-kaoor a yãoogẽ daar fãa Sẽn-Ka-Saab taoore.»

Maan-kʋʋr fut a taaba

(28.31-43, Yik 39.22-31)

31«Maan fu-yor-bil maan-kʋʋr kãsem fuugã yĩnga, ne gĩs sẽn yaa kẽeg haoo bala. 32Kɩbg fuugã loor peendã tẽn-sʋka, n kõog a noorã ne peend t'a yɩ wa gãong fuug loore, t'a ra wa kẽeg ye. 33La f maan gernaad-dãmb sẽn yaa kẽeg haoo ne gĩs-moaama, la gĩs-miidu, n ning fuugã noor tẽngr n gilgi. La f maan sãnem bugl n ning fuugã tẽngr n gilgi. 34La f ning sãnem buglã ne gernaad-rãmb n lɩʋʋs taab n gilg fuugã noor zãnga. 35Bɩ a Aarõ yeelg fu-kãng wakat ning fãa yẽnda sẽn maand maan-kʋʋr kãsem tʋʋmdã, tɩ b wʋm buglã rãamd yẽnda sẽn wat n kẽed Sẽn-Ka-Saab taoor sɛk roogã pʋgẽ, la yẽnda sẽn wat n yit wakate. Woto, yẽnda ka na n ki ye.

36Maan rĩ-tɛɛg ne sãnem halaale, la f gʋls a zugã ne kɩtga tɩ yɩ wa bãnde. A gʋlsmã na n yɩɩ woto: Welga toor Sẽn-Ka-Saab yĩnga. 37La f ning yẽnda loɛtg sẽn yaa kẽeg haoo t'a zĩnd zu-vindgã taoore. 38A na n zĩnda a Aarõ dĩirẽ wã t'a Aarõ zɩ yel-wẽnã sẽn tũud ne kũuni la maand fãa Israyɛll nebã sẽn welg n kõtẽ wã. A na n zĩnda yẽnda dĩirẽ wã daar fãa, tɩ bãmb tõe n ta Sẽn-Ka-Saab yam.

39Wʋg fuug ne lamd gĩs-bãanega, la f maan zu-vindg ne lamd gĩs-bãanega. La f wʋg sẽbdg sẽn kãde, t'a yaa neere.»

Maan-kʋʋdb a taabã futu

40«Maan fu-yerd n kõ a Aarõ kom-dibli wã. La f maan sẽbds ne pugli me n kõ bãmba, sẽn na n wilg tɩ b tara b zĩiga la b ziiri. 41Yeelg f kẽem a Aarõ ne a kom-dibli wã ne fu-kãense. La f pʋdg kaam bãmb zut n ning tʋʋmdã bãmb zutu, n welg bãmb toor tɩ b maan maan-kʋʋr tʋʋmd mam taoore. 42Maan lamd gĩs-bãaneg kur-koees n kõ bãmb tɩ b sẽgen n lud b yãndã, sẽn sɩng ne b seesã tɩ tãag b gɛy wã. 43A Aarõ ne a kom-dibli wã sã n wa na n kẽ sɛk roogã pʋgẽ, wall b sã n wa na n kolg tẽn-kugrã n maan sɛk zĩigã tʋʋmde, b tog n sẽgna kur-bãmba, tɩ yel-wẽnã ra zĩnd bãmb zut tɩ b wa ki ye. Bõn-kãng na n yɩɩ no-tũudg sẽn ka sɛta, a Aarõ ne a yagensã sẽn na n pʋgl yẽnda wã yĩnga.»

Currently Selected:

Yikri 28: MPBU

Highlight

Copy

Compare