Tõodo 27

BARK NE KÃAB WẼNG SORE

Eball tãngã zug tẽn-kugri

1A Moyiis ne Israyɛll kãsem-dãmbã yeela nebã yaa: «Sak-y tõod nins tõnd sẽn kõt yãmb rũndã wã. 2#Zoz 8.30-32Daar ning yãmb sẽn na n tɩ rʋʋg Zʋrdẽ kʋɩlgã n kẽ tẽng ning Sẽn-Ka-Saab sẽn yaa yãmb Wẽnnaamã sẽn kõ yãmbã, bɩ y lugl kug-bɛd n bolg-b goore. 3La y gʋls tõ-kãensã goamã fãa bãmb zut n yaool n yik n kẽ tẽng ning Sẽn-Ka-Saab sẽn kõ yãmbã pʋgẽ. Yaa tẽng sẽn pid ne bĩisim la sɩɩd wʋsgo, wa Sẽn-Ka-Saab sẽn yaa yãmb Wẽnnaamã sẽn yeel yãmbã. 4Yãmb sã n wa rʋʋg zʋrdẽ kʋɩlgã, yãmb na n lugla kug nins mam sẽn yeel yãmb dũndã tɩ y lugl Eball tãngã zug n bolg-b ne goorã. 5#Yik 20.25La beenẽ, yãmb na n mee tẽn-kugr ne kug sẽn ka pees ne kutu, Sẽn-Ka-Saab sẽn yaa yãmb Wẽnnaamã yĩnga. 6Yãmb na n mee Sẽn-Ka-Saab sẽn yaa yãmb Wẽnnaamã tẽn-kugr ne kug sẽn ka peese. La yaa beenẽ, la yãmb na n maan y maand sẽn yõogd bugmã Sẽn-Ka-Saab sẽn yaa yãmb Wẽnnaamã yĩnga. 7La yãmb na n maana zems-n-taar maand me beenẽ, la y zĩnd beenẽ n dɩ la y maan sũ-noog Sẽn-Ka-Saab sẽn yaa yãmb Wẽnaamã taoore. 8Gʋls-y tõ-kãensã goamã fãa kugã zut tɩ yɩ vẽenega.»

Kãab-wẽns Eball tãngã zugu

9A Moyiis ne maan-kʋʋdbã sẽn yaa Leevi buudã yeela Israyɛll nebã fãa yaa: «Israyɛll nebã, sĩnd-y sɩddd... n kelge! Rũndã, yãmb lebga Sẽn-Ka-Saab sẽn yaa yãmb Wẽnnaamã nebã. 10Woto yĩnga, bɩ y kelg Sẽn-Ka-Saab sẽn yaa yãmb Wẽnnaamã koɛɛga, la y sak bãmb tõodã ne b minindã wa mam sẽn wilgd yãmb dũndã wã.» 11Badaar bala, a Moyiis yeela nebã yaa: 12#Tõ 11.29, Zoz 8.33-35«Yãmb sã n wa rʋʋg Zʋrdẽ kʋɩlgã, bɩ a Simeyõ ne a Leevi, la a Zʋʋda ne a Izakaar, la a Zozɛf ne a Benzame buudã yaas Garizim tãngã zug n ning nebã barka. 13La bɩ a Rubɛn ne a Gaad la a Azɛɛr ne a Zabulõ, la a Dan ne a Neftali buudã yaas Eball tãngã zugu n kãab nebã wẽnga.»

14La Leevi buudã na n zẽka b koɛɛgã Israyɛll nebã fãa taoor n yeel yaa:

15 # Yik 20.4, 34.17, Mk 19.4, 26.1, Tõ 4.15-18, 5.8 «Kãab-wẽng bee ne ned ning sẽn peesd-a, wall sẽn dõogd-a bõn-naandg zugu. Sẽn-Ka-Saab ka nong tʋʋm-mit sẽn maand bõn-naandg n soos n solg-a ye. La bɩ nebã fãa yeel tɩ ãmina. 16#Yik 20.12, Tõ 5.16Kãab-wẽng bee ne ned ning sẽn paoogd a ba ne a ma. La bɩ nebã fãa yeel tɩ ãmina. 17#Tõ 19.14Kãab-wẽng bee ne ned ning sẽn sersd toadg ning sẽn be yẽnda ne a yak pʋʋg sʋkã bãnã. La bɩ nebã fãa yeel tɩ ãmina. 18#Mk 19.14Kãab-wẽng bee ne ned ning sẽn kɩtd tɩ zõang tudg sore. La bɩ nebã fãa yeel tɩ ãmina. 19#Yik 22.20, 23.9, Mk 19.33,34, Tõ 24.17,18Kãab-wẽng bee ne ned ning sẽn kaood sãan ne kɩɩb la pʋg-kõor bʋʋd kegrã. La bɩ nebã fãa yeel tɩ ãmina. 20#Mk 18.8, 20.11, Tõ 23.1Kãab-wẽng bee ne ned ning sẽn gãand ne a ba paga, n lak a fuugu. La bɩ nebã fãa yeel tɩ ãmina. 21#Yik 22.18, Mk 18.23, 20.15Kãab-wẽng bee ne ned ning sẽn gãand rũnga, baa sẽn yaa rũng ninga. La bɩ nebã fãa yeel tɩ ãmina. 22#Mk 18.9, 20.17Kãab-wẽng bee ne ned ning sẽn gãand ne a tãoã, sã n yaa a ba-biig bɩ a ma-biiga. La bɩ nebã fãa yeel tɩ ãmina. 23#Mk 18.17, 20.14Kãab-wẽng bee ne ned ning sẽn gãand ne a pag ma. La bɩ nebã fãa yeel tɩ ãmina. 24Kãab-wẽng bee ne ned ning sẽn soos n kʋ a to. La bɩ nebã fãa yeel tɩ ãmina. 25Kãab-wẽng bee ne ned ning sẽn deegd kũun n kʋʋd bʋʋm soaba. La bɩ nebã fãa yeel tɩ ãmina. 26#Gal 3.10Kãab-wẽng bee ne ned ning sẽn ka tũud tõ-kãensã fãa la a ka sakd bãmbã. La bɩ nebã fãa yeel tɩ ãmina.»

Currently Selected:

Tõodo 27: MPBU

Highlight

Copy

Compare