Tõodo 23

1 # Mk 18.8, 20.11, Tõ 27.20 Bɩ ned ba a yembr da peeg a ba paga, la a ra kẽ ne-a me ye.

Neb nins sẽn ka tog n kẽ tiging pʋga

2Ned lam-biis sẽn bedse, wall ned raoolem sẽn fiuug ka tõe n kẽ Sẽn-Ka-Saab nebã tiging pʋgẽ ye. 3Tãmpĩir ka tõe n kẽ Sẽn-Ka-Saab tiging pʋgẽ ye. Baa yẽnda yagens ne a yagen-tʋb-ra-kẽes n tɩ tãag zamaan piig ka tõe n kẽ beenẽ ye. 4#Neem 13.1,2Amo nebã ne Moaab nebã ka tõe n kẽ Sẽn-Ka-Saab nebã tiging zĩigẽ ye. Baa bãmb yagens ne a yagen-tʋb-ra-kẽes n tɩ tãag zamaan piig ka tõe n kẽ beenẽ ye. Bõn-kãng na n yɩɩ woto wakat fãa. 5#Sõd 22.1-6Bala, bãmb ka tall rɩɩb ne koom n seg yãmb sorã zug y sẽn wa n yi Ezɩpt wakatẽ wã ye. La sẽn paas me, bãmb kõo a Bewoor biig a Balaam sẽn yit Petoor sẽn be Mezopotami soolmẽ wã ligd t'a kãab yãmb wẽnga. 6#Sõd 23.7—24.9La Sẽn-Ka-Saab sẽn yaa yãmb Wẽnnaamã ka sak n kelg a Balaam ye. Sẽn-Ka-Saab sẽn yaa yãmb Wẽnnaamã teka kãab-wẽngã tɩ lebg bark yãmb yĩnga. La yaa Sẽn-Ka-Saab sẽn yaa yãmb Wẽnnaamã sẽn nong yãmbã yĩnga. 7Ra bao-y tɩ vɩ-bãan zĩnd bãmb sʋka, la ra bao-y b sũ-noogo, hal yãmb vɩɩmã tɛka. 8Ra ges-y Edom nebã wa yel-beed ye. Bãmb yaa yãmb saam-biisi. Ra ges-y Ezɩpt nebã wa yel-beed ye. Yãmb dag n yaa sãamb bãmb tẽngẽ. 9Bãmb yagen-tʋb-ra-kẽesã, sẽn sɩng ne zamaan a tãabã tõe n kẽe Sẽn-Ka-Saab nebã tiging pʋgẽ.

Bũmb sẽn yaa rẽgd tãb-sik zĩigẽ

10Yãmb sã n yi n kẽng n na n tɩ zab ne y bɛɛbã, bɩ y gũus y mens ne wẽng buudã fãa. 11Yãmb ned a yembr sã n gãand yʋng n dẽgem a menga, bɩ a yi kɛɛnga, n da kẽ tãb-sikã zĩigẽ ye. 12Wĩndgã sã n kɩlle, bɩ a so koom tɩ wĩndgã sã n kẽ, bɩ a yaool n kẽ tãb-sikã zĩigẽ. 13Yãk-y zĩig sẽn vẽsg bilf ne yãmb tãb-sikã, y we-kɛɛng yĩnga, tɩ we-kɛɛng sã n wa tar yãmba, 14bɩ y zã wãka, tɩ y sã n maan we-kɛɛngã n sa, bɩ y tuk bok n bus bĩndã. 15Bala, Sẽn-Ka-Saab sẽn yaa yãmb Wẽnnaamã bee yãmb tãb-sikã zĩigẽ, n na n fãag yãmba, la b sõng-y tɩ y tõog y bɛɛbã. Yaa woto n kɩt tɩ yãmb tãb-sikã tog n yɩ zĩig sẽn welg toore, tɩ Sẽn-Ka-Saab ra wa yãnd bũmb sẽn ka sõama yãmb sʋk n wẽnemd n bas yãmb ye.

Tõod toay-toayã

16Yamb sã n bas a zu-soab n zoe n wa fo nengẽ, bɩ f ra tall-a n tɩ kɩs a zu-soabã ye. 17A na n paa ne foom, Israyɛll tẽng ning pʋg a sẽn yãk n na n zĩndã pʋga. Da kɩt t'a tʋm n kõ foom zaalem ye.

18 # Mk 19.29 Bɩ Israyɛll bi-pugl baa a yembr ra lebg wẽn-naandg pʋg-koos-m-meng ye. La bɩ Israyɛll rao baa a yembr da yɩ yoaad wẽn-naandg yĩng ye. 19Da tall-y pʋg-koos-m-meng yaood wall baag ligd n wa Sẽn-Ka-Saab sẽn yaa yãmb Wẽnnaamã roogẽ, n wa rol pʋleng ning yãmb sẽn dag n pʋlem Sẽn-Ka-Saabã ye. Baa sẽn yaa yaood ninga. Bala, bãmb b yiibã fãa yaa yel-beed Sẽn-Ka-Saab sẽn yaa yãmb Wẽnnaamã nifẽ.

20 # Yik 22.24, Mk 25.36,37, Tõ 15.7-11 Ra peng-y y saam-biig bũmb n bao roagleng ye. Sã n yaa ligdi, wall rɩɩbo, wall sẽn yaa bũmb ning fãa, bɩ y ra peng n bao roagleng ye. 21Yãmb tõe n penga sãan n bao roaglenga, la ra sak-y n peng-y y saam-biig n bao roaglenga, tɩ Sẽn-Ka-Saab sẽn yaa yãmb Wẽnnaamã ning yãmb bark ne tʋʋm nins fãa yãmb sẽn maand tẽng ning yãmb sẽn kẽ n na n soogã pʋgẽ.

22 # Sõd 30.2-17, Mat 5.33 Fo sã n pʋlem Sẽn-Ka-Saab sẽn yaa yãmb Wẽnnaamã, bɩ f ra kaoos n dol f pʋlemdã ye. Bala, Sẽn-Ka-Saab sẽn yaa yãmb Wẽnnaamã na n ninga foom taal tɩ lebg fo yel-wẽnde. 23Fo sã n ka pʋlme, kongr ka be f zug ye. 24Gũus ne bũmb nins fãa fo sẽn gomdã, la f rol pʋlemd ning fãa fo sẽn pʋlem Sẽn-Ka-Saab sẽn yaa yãmb Wẽnnaamã ne yamleoogã, tɩ yaa f meng noor n gome.

25Fo tõe n kẽe f to reezẽ pʋʋgẽ n yãk reezẽ wã n dɩ tɩ sek-fo. La f ka tõe n yãk n ning f peoogẽ ye. 26Fo sã n kẽ f to pʋʋgẽ, fo tõe n yãka kood n tẽg n wãbe, la f ka tõe n kẽ ne goeoog n na n wʋr ye.

Currently Selected:

Tõodo 23: MPBU

Highlight

Copy

Compare