Tõodo 16

Pak tigri

1 # Yik 12.1-20, Mk 23.5-8, Sõd 28.16-25 Maan-y Pak#16.1 Paka: Yaa tigr ning Zʋɩf-rãmbã sẽn dag n maand wa sẽn zems noor ning Sẽn-Ka-Saab sẽn dag n kõ-bã, b sẽn wa n na n yi Ezɩpt tẽng yembdã pʋgã. B boonda Pakã ne Ebre-rãmbã goam tɩ «Zʋʋg-n-base.» tigrã bõn-bɩʋʋng kiuugã pʋgẽ Sẽn-Ka-Saab sẽn yaa yãmb Wẽnnaamã yĩnga. Bala, Sẽn-Ka-Saab sẽn yaa yãmb Wẽnnaamã yiisa yãmb Ezɩpt tẽngã pʋgẽ ne yʋngo, bõn-bɩʋʋng kiuugã pʋgẽ. 2Bɩ y yãk rũm-bãooneg ne rũm-bɛd n maan Pak tigrã Sẽn-Ka-Saab sẽn yaa yãmb Wẽnnaamã yĩnga, zĩig ning Sẽn-Ka-Saab sẽn yaa yãmb Wẽnnaamã sẽn na n yãk n ning b yʋʋrã. 3Tigrã rasem a yopoe wã fãa pʋga, yãmb ka tog n dɩ bũmb sẽn ning rãbɩll ye. Yãmb tog n dɩta bur sẽn ka ning rãbɩll rasem a yopoe wã fãa. Yaa namsg buri, bala, yãmb yii Ezɩpt ne yãgbo. Yaa sẽn na n tẽegd yãmb daar ning yãmb sẽn yi Ezɩpt tẽngã y yõor tɛka. 4Rasem a yopoe wã pʋgẽ, bɩ y ra bas tɩ rãbɩll zĩnd y soolmã pʋgẽ ye. La ra bas-y maoong ning sẽn kʋʋd pipi daarã zaabrã nemd baa bilf tɩ kell n vẽeg beoog ye. 5Yãmb ka tõe n kʋ Pak tigrã maoong tẽms nins fãa Sẽn-Ka-Saab sẽn yaa yãmb Wẽnnaamã sẽn kõ yãmb tɩ y zĩndã pʋgẽ ye. 6Yaa zĩig ning Sẽn-Ka-Saab sẽn yaa yãmb Wẽnnaamã sẽn na n yãk n ning b yʋʋrã la yãmb tog n kʋ Pak tigrã maoong zaabre, wĩndgã kõom wakate, sẽn zems wakat ning yãmb sẽn yi Ezɩpt tẽngã. 7Rʋg-y-yã-a n dɩ zĩig ning Sẽn-Ka-Saab sẽn yaa yãmb Wẽnnaamã sẽn na n yãkã. La beoog sã n vẽege, bɩ y lebg n leb y fu-rotẽ wã. 8Rɩ-y bur sẽn ka rãbɩll rasem a yoobe. La rasem a yopoe wã daar na n yɩɩ tiging raar Sẽn-Ka-Saab sẽn yaa yãmb Wẽnnaamã waoogr yĩnga. Ra tʋm-y badaar ye.

Rasem a yopoepoe naoor a yopoe tigri

9 # Mk 23.15-21, Sõd 28.26-31 Fo na n sõda rasem a yopoepoe naoor a yopoe, sẽn sɩng ne wakat ning b sẽn na n dɩk goeoogã n na wʋr bɩle wã. 10Maan-y rasem a yopoepoe naoor a yopoe wã tigrã Sẽn-Ka-Saab sẽn yaa yãmb Wẽnnaamã yĩnga, bɩ y kõ yamleoog kũunã wa sẽn zems bark ning Sẽn-Ka-Saab sẽn yaa yãmb Wẽnnaamã sẽn kõ yãmbã. 11Maan-y sũ-noog Sẽn-Ka-Saab sẽn yaa yãmb Wẽnnaamã yĩnga, bɩ yãmb ne y kom-dibli wã la y kom-pugli wã ne y yem-daadã, la y yem-pogsã ne a Leevi buudã neb nins sẽn be yãmb tẽmsã pʋsẽ wã, la sãambã ne kɩɩbsã la pʋg-kõap nins sẽn be yãmb sʋkã, maan sũ-noog Sẽn-Ka-Saab sẽn yaa yãmb Wẽnnaamã taoore, zĩig ning bãmb sẽn na n yãk n ning b yʋʋrã. 12Tẽeg-y tɩ yãmb me yɩɩ yembs Ezɩpt tẽnga, dẽ, sak-y no-tũud-kãensã fãa, la y ning-b b nao-kẽndr zugu.

Zãn tigri

13 # Mk 23.33-36,39-43, Sõd 29.12-38 Yãmb sã n wʋk y bõn-koaadlã zeesẽ wã n sɛ, la y wẽk y reezẽ biis koom n sɛ, bɩ y maan zãn tigr rasem a yopoe. 14Bɩ yãmb ne y kom-dibli wã, la y kom-pugli wã, ne y yem-daadã, la y yem-pogsã, ne a Leevi buudã nebã, la sãambã ne kɩɩbsã, ne pʋg-kõapã sẽn be yãmb tẽmsã pʋsẽ wã maan sũ-noog tig-kãng wakate. 15Maan-y tigrã rasem a yopoe Sẽn-Ka-Saab sẽn yaa yãmb Wẽnnaamã waoogr yĩnga, zĩig ning Sẽn-Ka-Saab sẽn yaa yãmb Wẽnnaamã sẽn na n yãkã pʋga. Bala, Sẽn-Ka-Saab sẽn yaa yãmb Wẽnnaamã na n ninga yãmb bark tɩ y paam koodo, la b ning yãmb nus tʋʋmã fãa barka, tɩ y maan sũ-noog wʋsg ne y sũur fãa.

16Yʋʋmd fãa, yãmb daopã fãa tog n wa yalsa Sẽn-Ka-Saab sẽn yaa yãmb Wẽnnaamã taoor naoor a tãabo, zĩig ning bãmb sẽn na n yãkã pʋga: Yaa bur sẽn ka rãbɩll tigrã wakate, la rasem a yopoepoe naoor a yopoe wã tigr wakate, la zãnã tigr wakate. Ned ka tog n wa Sẽn-Ka-Saab taoor nug-zaal ye. 17Ned kam fãa na n kõo wa a sẽn tõe, wa sẽn zems bark ning Sẽn-Ka-Saab sẽn yaa yãmb Wẽnnaamã sẽn kõ yẽnda wã.

Bʋ-kaoodb yãkre

18Yãmb na n yãka bʋ-kaoodb la seb-gʋndba, n ning-b tẽms nins Sẽn-Ka-Saab sẽn yaa yãmb Wẽnnaamã sẽn kõ yãmbã pʋsẽ wã dignoyẽ, wa sẽn zems y buudã fãa sõore, tɩ b bʋ nebã bʋʋd ne tɩrlem. 19#Yik 23.6-8, Mk 19.15Bɩ y ra bʋ bʋʋdã kɛg ye, la y ra tũus neb ye. Bɩ y ra reeg kũun ye. Bala, kũun luta yam dãmb nini, la a golemd nin-tɩrs goamã. 20Kell-y n maan-y tɩrlem, n tõog n vɩɩmd n soog tẽng ning Sẽn-Ka-Saab sẽn yaa yãmb Wẽnnaamã sẽn kõ yãmbã.

Wẽnnaam-dãmb a taab pʋʋsgo

21 # Yik 34.13 Ra vigl-y tɩɩg ba a yembr daoog Aseera yʋʋr yĩng n yegl Sẽn-Ka-Saab sẽn yaa yãmb Wẽnnaamã tẽn-kugrã, yãmb sẽn na n maan y meng yĩngã ye. 22#Mk 26.1Ra vigl-y kug-viginds n pʋʋs ye. Bala, Sẽn-Ka-Saab sẽn yaa yãmb Wẽnnaamã kisa bõn-kãense.

Currently Selected:

Tõodo 16: MPBU

Highlight

Copy

Compare