Tõodo 10

A Moyiis leb n peesa kug-wals a yiibu

1Wakat-kãnga, Sẽn-Ka-Saab yeela maam yaa: «Pees kug-wals a yiib sẽn wẽnd pĩnd-dãmbã n tall n wa mam nengẽ tãngã zugu, la f maan raad koglgo. 2Mam na n gʋlsa goam nins sẽn dag n be pipi kug-wals nins fo sẽn wã wã zutã, kug-wal-kãens zutu. La f bĩng bãmb koglgã pʋgẽ. 3Dẽ, mam dɩka akasiya raad n maan koglgo. La mam peesa kug-wals a yiib wa pipi rãmbã n zã n dʋ tãngã zugu. 4Sẽn-Ka-Saab gʋlsa kug-walsã zut wa bũmb ning sẽn dag n gʋls pipi rãmbã zutã. Yaa tõod piig nins bãmb sẽn kõ yãmb tãngã zug bugum pʋgã, wakat ning Israyɛll nebã sẽn tigim taabã. La Sẽn-Ka-Saab rɩka kug-walsã n kõ maam. 5Dẽ, mam lebg n yii tãngã zug n sig n bĩng kug-walsã koglg ning mam sẽn dag n maanã pʋga, tɩ b pa be wa Sẽn-Ka-Saab sẽn dag n yeel maamã. 6#Sõd 20.28, 33.38Israyɛll nebã yikame n yi Beerot-Bene-Yaakan bulsã zĩigẽ n kẽng Mosera. Yaa beenẽ la a Aarõ ki yã, la b mum-a-la be, t'a biig a Eleyazaar led a zĩigẽ n lebg maan-kʋʋr kãsma. 7Bãmb yii beenẽ n kẽng Gudgoda, n yi Gudgoda n kẽng Yotbata, tẽng sẽn tar kʋɩlse. 8#Sõd 3.5-8Wakat-kãng la Sẽn-Ka-Saab welg Leevi buudã toor tɩ b tõe n zã Sẽn-Ka-Saab kaoolã koglgã, la b yals bãmb taoor n maan b tʋʋmde, n ning nebã bark ne bãmb yʋʋr hal tɩ ta rũndã. 9Yaa rẽ n kɩt tɩ Leevi buudã ka lagem b saam-biisã n paam pʋɩɩr ye. Sẽn-Ka-Saab n yaa bãmb pʋɩɩr wa Sẽn-Ka-Saab sẽn yaa yãmb Wẽnnaamã sẽn dag n yeel yãmb wɛɛngẽ wã. 10#Yik 34.28Mam paa tãngã zug rasem pis-naas la yʋnd pis-naase, wa mam sẽn dag n maan pĩndã. Sẽn-Ka-Saab kelga maam wakat-kãng me, bãmb ka tʋlg yãmb sãoong ye. 11Sẽn-Ka-Saab yeela maam yaa: «Yik n lʋɩ nebã taoor n tall-b n tɩ kẽes tẽng ning mam sẽn dag n wẽen n yeel b yaab-rãmbã tɩ m na n kõ-b lame tɩ b soogã pʋgẽ.»

Sẽn-Ka-Saab zoeese

12La moasã, Israyɛll nebã, bõe la Sẽn-Ka-Saab rat ne yãmba, sã n ka tɩ y zoe Sẽn-Ka-Saab sẽn yaa yãmb Wẽnnaamã n tũ bãmb soayã, la y nong bãmba, n sak Sẽn-Ka-Saab sẽn yaa yãmb Wẽnnaamã ne y sũyã fãa la ne y yamã fãa, 13la y sak bãmb noyã ne b tõod nins mam sẽn kõ yãmb dũndã wã n paam sũ-noogo. 14Gese, yaa Sẽn-Ka-Saab sẽn yaa yãmb Wẽnnaamã n so saasã ne saasã saase, la dũniyã ne bũmb nins fãa sẽn be a pʋgẽ wã. 15La baoosgo, yaool n yaa yãmb yaab-rãmbã la Sẽn-Ka-Saab nonga, la bãmb loogr zugẽ, yaa bãmb yagensã, yaa yãmb la b yãk buudã fãa sʋka, wa yãmb sẽn ne rũndã wã. 16Bao-y yam sõama n kõ y mense, la y ra yɩ tõatb ye. 17#1Tɩm 6.15, Vẽn 17.14, 19.16, Tʋʋm 10.34, Rom 2.11, Gal 2.6, Efɛ 6.9Bala, Sẽn-Ka-Saab sẽn yaa yãmb Wẽnnaamã yaa wẽnnaam-dãmbã Wẽnnaam, la zu-sob-n-dãmbã Zu-soaba. Bãmb yaa kãsenga, n tar pãnga. Bãmb zemsa zoeese. Bãmb ka tũusd ned ye, la b ka reegd kũun n maan wẽng ye. 18Bãmb zabd n sõngda kɩɩbs ne pʋg-kõapa. Bãmb nonga sãamb n kõt-b rɩɩb ne futu. 19Bɩ yãmb me nong sãamba, tɩ bala, yãmb me rag n yaa sãamb Ezɩpt soolmẽ. 20Zoe-y Sẽn-Ka-Saab sẽn yaa yãmb Wẽnnaamã la y sak bãmb n gãd bãmba, la y wẽen ne bãmb yʋʋre. 21Bãmb yaa yãmb ziiri, bãmb yaa yãmb Wẽnnaam. Yaa bãmb n maan bõn-kãsems sẽn sek zoeese, tɩ yãmb ninã yãnde. 22#Sɩng 46.27, Sɩng 15.5, 22.17Yãmb yaab-rãmbã sẽn wa n na n kẽng Ezɩptã tɩ b sõorã rag n yaa pis-yopoe. La moasã, Sẽn-Ka-Saab sẽn yaa yãmb Wẽnnaamã kɩtame tɩ y lebg wʋsg wa yĩngr ãdse.

Currently Selected:

Tõodo 10: MPBU

Highlight

Copy

Compare