A Dãniyɛlle 6
6
1La Meed-rãmbã ned a Daryuus sẽn wa n na n deeg naamã t'a tara yʋʋm pis-yoob la a yiibu.
B baoome n na n dõd a Dãniyɛlle
2Rĩm a Daryuus tagsame tɩ yaa neer t'a yãk nanambs koabg la pisi, n kɩt tɩ b zĩnd soolmã zĩig fãa yẽnda yʋʋr yĩnga. 3La rĩm a Daryuus yãka taoor dãmb a tãab tɩ b soog nanambsã fãa, la a Dãniyɛll dag n yaa taoor dãmb a tãabã ned a yembre. Sẽn na n yɩlẽ tɩ bũmb sã n beẽ, bɩ nanambsã tɩ yãnd taoor dãmbã n togse, tɩ ned ra wa maan rĩmã yell ye. 4La a Dãniyɛll dag n tara yam n yɩɩd nanambsã ne taoor dãmbã, hal tɩ rĩmã rag n tagsd n dat n kɩt t'a lebg soolmã fãa taoor soaba.
5Woto kɩtame, tɩ nanambsã ne yam-dãmbã dag n baood bũmb n na n dõd a Dãniyɛll soolmã yɛl wɛɛngẽ. La bãmb ka tol n yãnd bũmbu, wall bãnd n tõog n dõd a Dãniyɛll ye. Bala, a Dãniyɛll dag n yaa nin-tɩrga, tɩ b ka tõe n yãnd zʋg-wẽng a zugu, wall kongr ye. 6Dẽ, nin-bãmb yeelame: «Tõnd ka na n tõog n yãnd bũmb n dõd a Dãniyɛlle, sã n ka tɩ tõnd na n bẽd-a-la a Wẽnnaamã tõog wɛɛngẽ.» 7Woto, taoor dãmb a yiibã, ne nanambsã zemsa taab noor a yembre, n kẽng rĩm a Daryuus nengẽ n tɩ yeel-a yaa: «N-na! Wẽnd na kaoos-yã! 8Yãmb soolmã taoor dãmbã, ne tẽngã laog yel-gɛtbã, la nanambsã, ne sagendbã, la kombɛɛmbã fãa tagsame tɩ yaa neere, tɩ yãmb yiis tõog sẽn ka viigda, n wilg tɩ ka ne rasem pis-tã pʋgẽ, ned sã n bas yãmb n pʋʋs Wẽnnaam a to, wall a pʋʋs ned a to, bɩ b lob a soab gɩgmã wã bokẽ. 9N-na! Bɩ y sak n vigl tõ-kãngã, la y tik y nugu, tɩ ned ka tõe n tek-a, wa Meed-rãmbã ne Pɛrs-rãmbã tõog sẽn ka tõe n tekã.» 10Dẽ, rĩm a Daryuus vigla tõogã, n ning a nug-tikr bãnde.
B loba a Dãniyɛll gɩgmã bokẽ
11A Dãniyɛll sẽn wʋm tɩ b vigla tõ-kãngã wã, a rʋ a yĩngr doogã zugu, n pags a peem-lees nins sẽn teesd Zeruzalɛm sẽnẽ wã. La daar fãa, yẽnda ra yĩgimdida be naoor a tãabo, n pʋʋsd a Wẽnnaamã, la a pẽgd bãmba, wa yẽnda sẽn minim n maandẽ wã. 12La nin-bãmb tũu taab tao-tao n kẽng n tɩ mik t'a Dãniyɛll pʋʋsd a Wẽnnaamã n kot sõngre. 13Dẽ, bãmb lebg n leba rĩmã nengẽ n tɩ yeel-b yaa: «N-na! Yãmb ka vigl tõog n tik y nug n yeel tɩ rasem pis-tã wã pʋgẽ, ned ning sẽn bas-a yãmb n pʋʋs Wẽnnaam a to, wall a pʋʋs ned a to, b na n loba a soab gɩgmã wã bokẽ sɩda?» La rĩmã leokame tɩ yaa woto bala, wa sẽn zems Meed-rãmbã ne Pɛrs-rãmbã tõogã sẽn ka tekdã. 14Dẽ, bãmb leb n yeela rĩmã yaa: «N-na! A Dãniyɛll sẽn yaa Zʋʋda yembsã sʋk ned a yembrã ka tol n nand yãmba, la a ka nand y tõog ning yãmb sẽn vigl n tik y nugã ye. Yẽnda pʋʋsda a Wẽnnaamã naoor a tãab daar fãa.
15La rĩmã sẽn wʋm gom-kãensã, a sũurã sãama hal wʋsgo. La a maoo ne a sũur fãa n dat n fãag a Dãniyɛlle. La hal tɩ ta wĩndgã kõom, rĩmã baoo yẽnda sẽn na n maan bũmb ning n tõog n fãag a Dãniyɛlle. 16La nin-bãmbã lebg n tũu taab tao-tao n wa rĩmã nengẽ n yeel-a yaa: «N-na! Bãng-y tɩ Meed-rãmbã ne Pɛrs-rãmbã tõog yetame tɩ rĩm sã n vigl tõogo, wall b rɩk noore, n tik b nugu, tõ-kãng ka tõe n tek ye.» 17Dẽ, rĩmã yeelame tɩ b tɩ tall a Dãniyɛll n wa n lob gɩgma wã bokẽ. La rĩmã yeela a Dãniyɛll yaa: «Bɩ fo Wẽnnaamã fo sẽn tũud ne f sũur fãa wã fãag foom.» 18B rɩka kugr n lud bokã noore. La rĩmã ninga a meng nugbĩngã bãnd kugrã zugu, t'a kug-zĩidbã me ning b rẽnda, tɩ b sẽn yãk yam ning a Dãniyɛll wɛɛngẽ wã ra viig ye. 19Rẽ poore, rĩmã lebg n kuila a yiri. La badaar yʋngo, rĩmã ka rɩ, a ka sak t'a pag ba a yembr pẽneg-a, la a ka tol n gũs me ye.
Wẽnnaam fãaga a Dãniyɛlle
20La rĩmã sãda beoogo, zĩigã sẽn dat n yẽeg sasa, n wudg tao-tao n kẽng gɩgma wã bokẽ. 21Rĩmã sẽn kolg bokã, a zẽka a koɛɛg n bool a Dãniyɛll ne sũ-sãang n yeel yaa: «Wẽnnaam sẽn vɩ tʋmtʋmd a Dãniyɛlle, fo Wẽnnaamã fo sẽn tũud ne f sũur fãa wã tõog n fãaga foom ne gɩgmã wã bɩ?» 22La a Dãniyɛll leoka rĩmã yaa: «N-na! Wẽnd na kaoos-yã! 23Mam Wẽnnaamã tʋma b malɛɛk t'a wa mum gɩgmã wã noy tɩ b ka tõog n maan maam bũmb ye. Bala, Wẽnnaam gesame tɩ mam tara bʋʋm bãmb nifẽ. N-na! Mam ka maan bũmb sẽn yaa wẽng n beeg yãmb me ye.» 24Dẽ, rĩmã sũur yɩɩ noog wʋsgo, la a kɩtame tɩ b yiis a Dãniyɛll gɩgmã wã bokẽ. La b sẽn yiis a Dãniyɛllã, b ka tol n yãnd poglg baa bilf a yĩngẽ wã ye. Bala, yẽnda teega a Wẽnnaamã. 25La rĩmã kõo noor tɩ b tɩ yõg neb nins sẽn dõd-b a Dãniyɛllã n wa lob gɩgmã wã bokẽ, bãmb ne b kambã la b pagbã fãa. La sẽn deng bãmb sẽn na n lʋɩ bokã pʋgã, gɩgmã wã koka bãmb n wõr b kõabã zãnga.
26Dẽ poore, rĩm a Daryuus gʋlsa sɛb n tʋm dũniyã buud fãa sẽn be tẽmsã fãa pʋs n gomd gom-zẽnã nengẽ n yeele: «Bɩ y zĩnd ne bãane! 27Mam kõta noor tɩ mam soolmã gill fãa pʋga, bɩ nebã fãa zoe a Dãniyɛll Wẽnnaamã la b waoog-ba.
Bala, bãmb yaa Wẽnnaam sẽn vɩ,
la bãmb paada wakat sẽn kõn sa.
Bãmb soolem kõn tol n sãam ye,
la bãmb naamã ka tar sɛɛb ye.
28Yaa bãmb n fãagda, la b yolsdẽ,
Bãmb n maand bãna la bõn-yɛɛsdse,
saasẽ la dũniyã zug me.
Yaa bãmb n fãag a Dãniyɛll tɩ gɩgmã wã ka kʋ-a ye.
29La bõn-kãens zugẽ, a Dãniyɛll lebga nin-kãseng rĩm a Daryuus zamaanẽ, la ne Pɛrs-rãmbã rĩm a Siruus zamaanẽ.»
Currently Selected:
A Dãniyɛlle 6: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
