A Dãniyɛlle 4
4
Rĩm a Nebukatnedzaar zãmsd a yiibẽ soaba
1«Maam a Nebukatnedzaar dag n vɩɩ bãan m na-yirã pʋga, n be m na-zakẽ wã tɩ m vɩɩm yaa noogo. 2Mam zãmsa zãmsdo, la zãmsdã yɛɛsa maam. La tagsd nins m sẽn da tagsd m gãagẽ wã, ne vẽnegr nins mam sẽn yã wã rag n kẽesda maam dabeem. 3Dẽ, mam kɩtame tɩ b bool yam dãmb nins fãa sẽn be Babilond soolmã pʋgẽ wã, tɩ b tõe n wa bilg maam m zãmsdã võore. 4La tɩtã-rãmb ne bãngdbã, la bag-bʋgdbã ne Kalde rãmbã bãngdbã fãa waame. Dẽ, mam togsa bãmb m zãmsdã, la bãmb ned ba a ye ka tõog n bilg maam a võorã ye. 5Rẽ zugẽ, a Dãniyɛlle, b sẽn boond-a soab t'a Bɛlsatzaar wa mam wẽnnaamã yʋʋrã waa mam nengẽ, la wẽnnaam-sõmyã sɩɩgã rag n bee ne yẽnda. Mam togsa yẽnda m zãmsdã n yeele: 6«Bɛlsatzaare, fo yaa bãngdbã fãa naaba, la mam miime tɩ Wẽnnaam-sõmyã sɩɩgã bee ne foom, la yel-solemd ba a yembr ka be t'a bilgr yaa toog ne foom ye. Dẽ yĩngã, bɩ f bilg maam m zãmsdã võore. 7Ad bũmb nins mam sẽn yã m zãmsdã pʋga. Wakat ningã mam sẽn wa n gãe m gãagẽ wã: Mam yãnda tɩ-wok bedr sẽn yas dũniyã tẽn-sʋka. 8Tɩɩgã ra lebgda woko, n paamd pãnga, t'a zugã tẽkd sa-gãongã.
La baa neb nins sẽn dag n be
dũniyã kɩremsã fãa wã ra ne-a lame.
9Tɩɩgã vãadã rag n yaa neere,
la a rag n woma biis wʋsgo.
Tɩɩgã biisã tõe n dɩlga bõn-vɩɩsã fãa.
We-rũmsã rag n paamda maasem tɩɩgã tẽngre.
Liuuli nins sẽn yɩgd yĩngrã ra maanda b tʋgd tɩɩgã wilã zutu.
La bõn-vɩɩsã fãa rag n paamda b rɩɩb tɩɩgẽ wã.
10La zãmsdã pʋga, mam dag n ket n getame, la ade, mam yãnda malɛɛk a yembr sẽn yaa gũuda, t'a yi yĩngr n sigi. 11Malɛɛkã tãsa ne pãng n yeele:
Kɛ-y tɩɩgã n lubi, la y kɛ a wilã.
Yolm-y-yã a vãadã, la y yor a biisã n fẽrge.
Bɩ we-rũmsã zoe n yi a tẽngrã,
tɩ liuuli wã me yɩk n bas a wilã.
12Bas-y-yã a viukã ne a yẽgã tɩ b kell n pa tẽn-gãongã pʋga,
La y sẽb-a ne bãens la zũud n gũbgi,
n bas-a weoogã moog sʋka, tɩ meenemã rʋʋg-a.
La bɩ yamd yɩ yẽnda rɩɩbo, wa rũmsã.
13B na n teka a yamã sẽn yaa ninsaal dẽndã tɩ lebg we-rũng yam.
La yẽnda na n yɩ a woto hal tɩ ta yʋʋm a yopoe.
14Yam-yãk-kãngã yaa noor gũudbã sẽn kõ,
La no-kãng yaa malɛgsã yam-yãkre.
Sẽn na yɩlẽ tɩ bõn-vɩɩsã bãnge,
tɩ yaa Wẽnnaam Sẽn-Ka-To wã n so ninsaalbã
rĩungã fãa, bãmb kõt-a-la b sũur sẽn noom
ne a soaba. La yaa bãmb n tõe n kɩt tɩ nin-talg
wa lebg naaba.
15Ad maam a Nebukatnedzaar sẽn yaa rĩmã
sẽn yã bũmb ning m zãmsdã pʋgã.
Moasã, bɩ foom a Bɛlsatzaar bilg maam m zãmsdã võore.
Bala, mam soolmã yam-dãmbã fãa ka tõe n
bilg maam a võorã ye. La fo tõe n bilg-a lame.
Bala, wẽnnaam-sõmyã sɩɩgã bee ne foom.»
A Dãniyɛll bilga rĩmã a zãmsdã võore
16Woto, a Dãniyɛll b sẽn boond t'a Bɛlsatzaarã yɛɛsa wakat bilfu, t'a tagsgã namsd-a. La rĩmã yeelame: «Bɛlsatzaare, ra sak tɩ mam zãmsdã ne a bilgrã yɛɛs foom ye.» La a Bɛlsatzaar leoka rĩmã yaa: «M soaala, m da nongẽ lame tɩ y zãmsdã yɩ yãmb bɛɛbã yĩnga, t'a võorã yɩ sẽn kis-b yãmbã yĩnga! 17Tɩɩgã yãmb sẽn yã tɩ lebgd bedrã, hal t'a pãngã paasdẽ, t'a zugã tẽkd sa-gãongã, tɩ sẽn be-b dũniyã kɩremsã fãa ne-a wã, 18t'a vãadã rag n yaa neerã, t'a biisã yaa wʋsg n sekd bõn-vɩɩsã fãa rɩlgrã, tɩ we-rũmsã wat n sõsd a tẽngrã, tɩ liuuli wã sẽn yɩgd yĩngrã wat n zaoonded a wilã zutã, 19n-na! Yaa yãmb la tɩɩgã. Yãmb lebga kãseng n tar pãnga, la yãmb kãosengã zẽkame hal n tat saasẽ, la yãmb naamã taa dũniyã kɩremsã fãa. 20N-na! Yãmb yãnda malɛɛk sẽn yaa gũudã sẽn yi yĩngr n sig n yeel yaa: ‹Kɛ-y tɩɩgã n lubi, la y sãam-a, la y bas a viukã ne a yẽgã tẽn-gãongã pʋga, la y sẽb-a ne bãens la zũudu, t'a zĩnd weoogã moog sʋka, tɩ meenemã rʋʋg-a, t'a naag rũmsã n wãb yamdo, hal tɩ ta yʋʋm a yopoe.› 21N-na! Ad zãmsdã võore: Ad bũmb ning Sẽn-Ka-To sẽn yãk yam n na n maan rĩmã sẽn yaa m soaalã: 22‹B na n diga yãmb n yiis ninsaalbã sʋka, tɩ yãmb tɩ vɩɩmd ne we-rũmsi. La b na n kɩtame tɩ yãmb wãbd yamd wa niigã. Meenem na n dʋʋga yãmba, la yãmb na n vɩɩmda a woto tɩ ta yʋʋm a yopoe, hal tɩ yãmb wa n bãng tɩ yaa Sẽn-Ka-To n so ninsaalbã naamã fãa, la bãmb kõt-a-la b sẽn dat-a soaba. 23B sẽn yeel tɩ b bas tɩɩgã viukã ne a yẽgã tẽngã pʋgẽ wã rat n yeelame tɩ wakat ning yãmb sẽn na n wa n bãng tɩ soab ning sẽn be-a saasẽ wã n so bũmb fãa wã, la b na n leb n lebs yãmb y naamã. 24N-na! Yaa rẽ yĩnga, tɩ m kot-y tɩ y sak n deeg m saglgã: Bas-y y yel-wẽnã n maan sẽn yaa tɩrga, la y bas y tʋʋm-beedã n zoe nimbãan-dãmbã nimbãanega, tɩ tõe tɩ y vɩɩmd ne bãan n kaoose.»
Rĩm a Nebukatnedzaar gãeemdo
25Bũmb nins fãa a Dãniyɛll sẽn togs rĩm a Nebukatnedzaar wɛɛngẽ wã paama pidsgu. 26Kiis piig la a yiib loogr zugẽ, daar a yembre, Babilond tẽngã pʋga, rĩmã rag n bee a na-yirã yĩngr doogã zugu, n kẽnd n gilimdẽ. 27Rĩmã yeelame: «Ges Babilond tẽn-kãsengã, yaa ne m pãngã, la mam tõog n me-a t'a lebg na-tẽnga, mam mengã waoogr ne m ziir yĩnga.» 28La rĩm a Nebukatnedzaar sẽn nan ket n gomda, koɛɛg n yi yĩngr n yeele: «Rĩm a Nebukatnedzaare, kelg-y tɩ yaa yãmb la b sẽn gomd ne wã. B reega y rĩungã n bas-yã. 29B na n diga yãmb n yiis ninsaalbã sʋka, tɩ yãmb tɩ vɩɩmd ne we-rũmsi. B na n kɩtame tɩ yãmb wãbd yamd wa niigã. La a na yɩɩ a woto hal tɩ ta yʋʋm a yopoe, tɩ yãmb tõe n bãng tɩ Sẽn-Ka-To n so ninsaalbã naamã, la bãmb kõt-a-la b sẽn dat-a soaba.» 30La zĩig pʋgẽ bala, gomdã paama pidsg rĩm a Nebukatnedzaar zugu. B rig a Nebukatnedzaar n yiis ninsaalbã sʋka, t'a tɩ wãbd yamd wa niigã. La meenem dʋʋga a Nebukatnedzaare. La a zoobdã yiime hal n lebg wa sɩlg kõbdo, t'a nug-yẽesã ne a nao-yẽesã lebg wa liuul nao-yẽese.
Rĩm a Nebukatnedzaar gãeemd sɛɛbo
31La yʋʋm a yopoe wã sẽn wa n pidi, rĩm a Nebukatnedzaar gomame n yeel yaa: «Maam a Nebukatnedzaar naka m neng n ges yĩngri, la mam yamã leb n wa a zĩigẽ. Dẽ, mam pẽga Sẽn-Ka-To, n waoog-ba, la m balem soab ning sẽn vɩ-a wakat sẽn ka sɛtã.
Bãmb soo bũmbã fãa wakat sẽn kõn sa yĩnga.
La bãmb dɩta naam zamaan woo zamaane.
32Dũniyã nebã fãa yaa wa zaalem bãmb taoore.
Bãmb maanda b sẽn dat ne malɛgsã sẽn be saasẽ wã,
la ne ninsaalbã sẽn be dũniyã zugã.
Ned ka be n tar pãng n tõe n kɩɩs bãmb b naamẽ wã ye.
La ned me ka be n tõe n sok tɩ yaa bõe la b maand ye.
33La wakat-kãng bala, mam yamã leb n waame. La mam leb n paama m naamã ne m ziirã, la m waoogrã. Mam kug-zĩidbã ne m nin-kãsemsã leb n baoo mam zĩiga. La mam leb n leba m zaoorẽ wã. La mam naamã rag n paamda pãng n paasdẽ. 34Moasã, maam a Nebukatnedzaar pẽgda saasẽ dĩm-kãsengã, la m waoogd-ba, n balemd-ba. Bãmb tʋʋmã fãa yaa sɩda, la b soayã yaa tɩrse. Yaa bãmb bal n tõe n sik wuk-m-mens rãmbã.»
Currently Selected:
A Dãniyɛlle 4: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
