Tẽn‑tʋmdbã tʋʋmã 16
16
A Tɩmote tũu a Poll ne a Sɩlaas
1A Poll taa Dɛrb ne Listri. Karen-biig a ye n dag n be beenẽ t'a yʋʋr la a Tɩmote. A ma yaa Zʋɩf poak sẽn yaa tẽeda, la a ba wã yaa Gɛrk buudu. 2Ba-biisã sẽn be Listr ne Ikoniyomã ra kɩta yẽnda kaset sõngo. 3A Poll dag n datame n peeg a Tɩmote, la tall-a lame n tɩ kẽes bãongo, Zʋɩf-rãmbã sẽn dag n be tẽn-kãensã yĩnga. Bala, b fãa ra miime t'a Tɩmote ba wã yaa Gɛrka. 4A Poll dãmb sã n ta tẽngẽ fãa, b togsda Kiris tẽedbã yam-yãkr nins tẽn-tʋmdbã ne kãsem-dãmbã sẽn be Zeruzalɛmã sẽn yãkã, sẽn na yɩlg tɩ b sak yam-yãk‑kãense. 5A Zeezi tẽedbã tẽeb pãng da paasdame, la b sõorã ra paasda daar woo daare.
A Poll yãnda Masedoan ned vẽnegr pʋgẽ
6La Sɩɩg-sõng sẽn gɩdg a Poll dãmb tɩ b ra moon Wẽnnaam koɛɛgã Aazi soolem yĩnga, b pɩʋʋga Firzi ne Galasi soolem. 7Bãmb sẽn kolg Miizi soolem, b makame n na n kẽng Bitini soolem, la a Zeezi Sɩɩgã ka sak tɩ b kẽng ye. 8Dẽ, bãmb pɩʋʋga Miizi soolmã, n kẽng n ta Torwaase. 9Yʋngo, a Poll paama vẽnegre. A yãnda Masedoan ned sẽn yas n bõosd yẽnda n yetẽ yaa: Wa-y Masedoan, n wa n sõng-do. 10Vẽneg‑kãngã a Poll sẽn paamã zugẽ, tao-tao bala, tõnd baoome tɩ kẽng Masedoan. Bala, tõnd yeelame tɩ yaa Wẽnnaam n boond tõnd tɩ d tɩ moon koe-noogã soolem‑kãng pʋga.
B kẽesa a Poll ne a Sɩlaas bi-bees roog Filip
11Tõnd kẽe koom-koglg Torwaas n kẽng Samotars tɩrga. La vẽkembeoogo, tõnd kẽnga Neyapoliisi. 12La tõnd yii beenẽ n kẽng Filip tẽnga. Filip yaa Masedoan soolmã na-tẽnga, la rag n yaa Rom nebã n so-a. Tõnd paa tẽn-kãng rasem bilfu.
13Zʋɩf-rãmbã vʋʋsgã daare, tõnd yii tẽngã n kẽng kʋɩlg noore, tõnd sẽn dag n tagsd tɩ d na n yãnda pʋʋsg zĩig beenẽ wã yĩnga. Tõnd zĩnda tẽnga, n gom ne pagb nins sẽn da tigim taab be wã. 14Pag a yembr n dag n be beenẽ n zoet Wẽnnaam, t'a yʋʋr ya a Lidi. A yita Tɩyatɩɩre, la a koosda peen-miid sẽn be neer wʋsgo. Pʋg-kãng ra kelgdame, la Zu-soabã sɩɩsa a sũurã t'a sak n deeg bũmb nins a Poll sẽn da togsdã. 15La yẽnda ne a yirã rãmb sẽn paam lisgu, a kosa tõnd a woto: Yãmb sã n tẽed tɩ mam tũuda Zu-soabã sɩd-sɩda, bɩ y wa n sig mam yirã n zĩnd be. La a pẽdga tõnd wʋsg n tõoge.
16Tõnd wa n dag n dabda pʋʋsg zĩigẽ, la tʋmtʋmd-poak a yembr sẽn yaa kĩnkir-bag n wa n seg tõndo. A zu-soben-dãmbã rag n paamda ligd wʋsg a bagrã bʋgb yĩnga. 17Yẽnda sɩngame n pʋgd a Poll ne tõnd poor n yetẽ yaa: Nin-bãmbã yaa Wẽnnaam Sẽn-Ka-To tʋmtʋmdba, la b wilgd-y‑la fãagr sore. 18A maana a woto n kaoos rasem wʋsgo. La a Poll yam yii ne yẽnda t'a wẽnemd n yeel zĩnã yaa: Mam yeta foom ne a Zeezi Kiris yʋʋr tɩ f yi n bas bi-puglã. La wakat-kãng bala, zĩnã yiime n bas-a. 19Tʋmtʋmd-poakã zu-soben-dãmbã sẽn yã tɩ b ka na n leb n paam ligd bi-puglã yĩnga, b yõka a Poll ne a Sɩlaas n tɛ-b n kẽng raagẽ wã, taoor dãmbã nengẽ. 20B talla a Poll dãmb n kẽng bʋ-kaoodbã nengẽ n tɩ yeel yaa: Nin-bãmbã sẽn yaa Zʋɩf-rãmbã rãmbda tõnd tẽngã, 21n zãmsd nebã minindu, tõnd sẽn yaa Rom nebã sẽn ka tar noor tɩ reeg-b wall d tũ-b ye.
22Neb kʋʋngã yika zabr ne a Poll dãmba. La bʋ-kaoodbã kɩtame tɩ b pãrs a Poll ne a Sɩlaas futã la b yeel‑b tɩ b pãb-b ne kalwaase. 23B sẽn pãb a Poll dãmb sõama n sɛ, b kẽes-b-la bi-bees roogo, la b yeel bi-bees roog gũudã t'a gũ-b neere. 24B sẽn yeel gũudã a woto n sɛ, a kẽesa bãmb roog sẽn be roog a to pʋgẽ n balg-b ra-bãongo.#16.24Ra-bãongo Yaa tɩɩg sɛɛg bɩ a will b sẽn kɛɛg n poog võor n tui ned karg n sog t'a ka tõe n yik ye. 25La sẽn kolg yʋn-sʋka, a Poll ne a Sɩlaas ra pʋʋsdame, la b yɩɩnd n waoogd Wẽnnaam. La bi-beesã ra kelgd-b lame. 26Tao-tao bala, tẽn-digimd‑kãseng n zĩndi, hal tɩ bi-bees roogã yẽbgr rigimdi. Wakat-kãng bala, kʋɩlemsã fãa pagsame, la bi-beesã fãa bãens sogsame. 27Bi-bees roog gũuda nekame. La a sẽn yã tɩ bi-bees roogã kʋɩlems pagsame, a wõoga a sʋʋg n na n kʋ a menga, a sẽn tagsd tɩ bi-beesã zoeeme wã yĩnga. 28La a Poll zẽka a koɛɛg n yeel yaa: Da maan-y y meng bũmb ye! Tõnd fãa bee ka. 29Dẽ, bi-bees roog gũudã kosame tɩ b wa ne bugum, la a wudga tao-tao n kẽ bi-beesã roogẽ, n lʋɩ a Poll ne a Sɩlaas taoor ne rigbu. 30La yẽnda yiisa a Poll ne a Sɩlaas yɩnga, n sok-b yaa: M neb sõamyã, bõe la mam tog n maan n paam fãagre? 31La b leokame n yeele: Tẽ-y Zu-soab a Zeezi, la yãmb ne y yirã rãmb na n paama fãagre. 32La a Poll dãmb moona yẽnda ne neb nins fãa sẽn dag n be yẽnda zakẽ wã Zu-soabã koɛɛga. 33Gũudã talla bãmb wakat-kãng bal ne yʋngã, n tɩ pegs b noadã. La tao-tao bala, yẽnda ne a zakã rãmb fãa paama koom lisgu. 34A talla a Poll dãmb n kẽ a zakẽ, n kõ-b rɩɩbo, la yẽnda ne a yirã rãmb fãa paama sũ-noogo, b sẽn tẽ Wẽnnaamã yĩnga.
35La beoogã sẽn vẽege, bʋ-kaoodbã tʋma gũudb tɩ b tɩ yeel bi-bees roogã gũud yaa: Yiis nin-bãmbã n base. 36Bi-bees roogã gũud tɩ togsa a Poll gom‑kãens n yeele: Bʋ-kaoodbã tʋma koɛɛg n yeel tɩ m yiis-y n base. Rẽ wã, yi-y n loog-y ne laafɩ. 37La a Poll yeela gũudbã yaa: Bãmb kɩtame tɩ b pãb tõnd nebã fãa taoore, tɩ tõnd bʋʋd nan ka kao ye, la b kẽes tõnd bi-bees roogo. Tõnd yaool n yaa Rom nebã. Tɩ moasã, bãmb dat n soos n yiis tõndo? Bada! B wa b toor n wa yiis tõndo. 38Gũudbã tɩ togsa bʋ-kaoodbã gom-kãense. La b sẽn wʋm t'a Poll ne a Sɩlaas yaa Rom nebã, rabeem yõk-b lame. 39Dẽ, b waa n kosa a Poll dãmb sugri, n yiis-ba, la b bõos-b tɩ b yi tẽngã. 40Bãmb sẽn yi bi-bees roogã, b kẽnga a Lidi yiri. La b sẽn yã ba-biisã, b sagl-b lame la b looge.
Currently Selected:
Tẽn‑tʋmdbã tʋʋmã 16: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
