2 Tɩmote 2
2
A Zeezi Kiris tãb‑bi-sõngo
1Dẽ, m biiga, keng f meng bark ning sẽn be a Zeezi Kiris pʋgẽ wã pʋgẽ. 2Bũmb nins fo sẽn wʋm mam noorẽ kaset dãmb wʋsg taoorã, togs-b neb nins sẽn maand sɩda la sẽn tõe n zãms neb a taabã. 3Naag maam n nams wa a Zeezi Kiris tãb‑bi-sõngo. 4Sodaag ka kẽesd a toog nin-zaals vɩɩm yɛl pʋgẽ, a sã n dat tɩ ned ning sẽn dɩk-a yẽnda sodaarã sũur yɩ noog ne-a ye. 5La reem-dɛɛmd ka paamd tõogr maanfo, a sã n ka tũ reemã soay fãa n deem ye. 6Ka-koaad ning sẽn namsd a yĩng n tʋmdẽ wã n tog n yɩ pipi n yãgs a koodã biisi. 7Wʋm m sẽn yetã võore. Bala, Zu-soabã na n weka fo yamã ne bũmb fãa. 8Tẽeg a Zeezi Kiris yelle: bãmb vʋʋgame n bas kũum. Bãmb yaa a Davɩɩd yagenga, wa koe-noogã sẽn yeelã. 9Yaa koe-no-kãng yĩng la mam namsda, hal tɩ b sẽb maam wa tʋʋm-wẽns maanda. La b ka sẽb Wẽnnaam goamã ye. 10Rẽ n kɩt tɩ mam sakd bũmba fãa nin-tũusdsã yĩnga, tɩ bãmb me tõe n paam fãagr ning sẽn be a Zeezi Kiris pʋgẽ, la m paam ziir sẽn kõn sa.
11Gom-kãngã yaa sɩda:
Tõnd sã n ki ne bãmba,
tõnd na n vɩɩmda ne bãmb me.
12 #
Mat 10.33, Luk 12.9 Tõnd sã n nang pãnga,
tõnd na n dɩɩ naam ne bãmba.
Tõnd sã n yeel tɩ d ka mi bãmba,
bãmb me na yeel tɩ b ka mi tõnd ye.
13Tõnd sã n ka maand sɩda,
bãmb yẽ paada sɩdã pʋgẽ.
Bala, bãmb ka tõe n yeele,
n leb n kɩɩs tɩ b ka yeel ye.
Tʋmtʋmd sẽn tat a Zu-soab yam
14Ad bũmb nins fo sẽn tog n tẽeg nebã, n togs-b Wẽnnaam taoor tɩ b gũus n lak ne no-koɛɛm gom-biis poorẽ t'a ka yõod baa bilf ye. B sẽn wat ne bũmb ninsi, yaa neb nins sẽn kelgdã sãoongo. 15Nang pãng n yals Wẽnnaam taoor wa ned sẽn bɩ, tʋmtʋmd sẽn kõn sulg a zug ne yãnd ye. Yɩ ned sẽn togsd sɩd koɛɛgã ne tɩrlem. 16Lak ne gom-vɩɩd sẽn ka kẽed ne wẽn-tũudmã yɛlã, bala, neb nins sẽn gomd gom-kãensã na n kell n kẽeda wẽngã pʋgẽ n paasdẽ. 17Bãmb goamã na n dɩɩ wa solenkẽega. A Imene ne a Filɛt bee bãmb dãmb sʋka. 18Bãmb bʋdg n basa sɩdã, n yetẽ tɩ kũum vʋʋgrã zoe n loogame, la b leebda neb kẽer tẽebo. 19#Sõd 16.5Baoosgo, yẽbg-kãenkãe ning Wẽnnaam sẽn yẽbgã yasame, la gomd ning sẽn pʋgdã ning-a-la bãnde:
Zu-soabã mii neb nins sẽn yaa bãmb dẽndã,
la ned ning fãa sẽn pʋt Zu-soabã yʋʋr
tog n basa ka-tɩrlem.
20Yi-kãseng pʋgẽ, ka sãnem bɩ wanzuri lagd bal n be ye. Kẽer me bee be n yaa ne raado wall ne tãndo. Teed kẽer tʋʋm bee waoogre, la kẽer me tʋʋmd yaa rẽgdo. 21Woto, ned sã n yɩlgd a meng n yiisd rẽg-kãensã, a na n yɩɩ laoko a tʋʋm sẽn be waoogre, laok sẽn welg toore, n be yõod a soaalã yĩnga, la sẽn tõe n tall n maan tʋʋm-sõng buud fãa. 22Zãag ne yãadem datem wẽnsã, la f bao tɩrlem, la tẽebo, la nonglem, la laafɩ ne neb nins sẽn pʋʋsd Zu-soabã ne sũy sẽn yaa yɩlma. 23Zãgs no-koɛɛm sẽn yaa yalemdo la sẽn ka yõodã, fo sẽn mi tɩ b wata ne zabã yĩnga. 24Wẽnnaam tʋmtʋmd yaool n ka tog ne zab ye, a tog n tara nonglem nebã fãa yĩnga, la a tar zãmsg ne zɩɩb tʋkr kũuni. 25A tog n demsa no-koeem‑wẽedbã ne sũ-bʋgsem, n maand tẽeb tɩ Wẽnnaam na n kɩtame tɩ b paam sũ-lebgre, n tõog n bãng sɩdã, 26tɩ b leb n paam yam-sõngo, la b tõog n yi sʋtãanã#2.26 Rõatã: Yaa a Sʋtãan la sẽn boond tɩ sʋtãanã, bala, a baood n dõda Wẽnnaam kambã wakat fãa. kũusa sẽn yõg bãmb tɩ b sak-a wã pʋgẽ.
Currently Selected:
2 Tɩmote 2: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
