2 Rĩm-dãmba 19
19
Sẽn-Ka-Saab fãaga rĩm a Ezekɩyaas
(2Kib 32.20-23, Eza 37.1-38)
1Rĩm a Ezekɩyaas sẽn wʋm gom-kãensã wã, a pãrsa a fut n yeelg boto, n kẽng Sẽn-Ka-Saab roogẽ wã. 2Rĩm a Ezekɩyaas tʋma a Eliyakim sẽn yaa na-yirã zak naabã ne a Sebna sẽn yaa seb-gʋndã, la maan-kʋʋdbã kãsem-dãmbã, a Amots biig a Ezayi sẽn yaa Wẽnnaam no-rɛɛsã nengẽ. La b fãa yeelga bot n kẽnge. 3Bãmb yeela a Ezayi yaa: «A Ezekɩyaas yeelame: Rũndã daarã yaa sũ-sãang daare, sɩbgre la yãnd daare. Bala, rogem daar taame, la pãng ka be n na n dog ye. 4Daar ninga, Sẽn-Ka-Saab sẽn yaa yãmb Wẽnnaamã na n wʋma goam nins fãa Asiiri rĩmã sõgen-kãsengã b sẽn tʋm t'a wa tʋʋs Wẽnnaam sẽn vɩ wã to-to wã. Tõeeme tɩ Sẽn-Ka-Saab sẽn yaa yãmb Wẽnnaamã na n sɩbg-b-la goam nins yẽnda sẽn gom tɩ bãmb wʋmã yĩnga. Woto wã, bɩ y pʋʋs Wẽnnaam neb nins sẽn ketã yĩnga.»
5Dẽ, rĩm a Ezekɩyaas sẽn tʋm b rãmbã kẽnga Wẽnnaam no-rɛɛs a Ezayi nengẽ. 6La a Ezayi yeela bãmb yaa: «Ad yãmb sẽn na n kẽng n tɩ yeel y soaalã bũmb ninga: ‹Sẽn-Ka-Saab yetame: Da zoe rabeem ne goam nins Asiiri rĩmã tʋmtʋmdbã sẽn gom n paoog maam tɩ fo wʋmã ye. 7Gese, mam na n tʋma sɩɩg yẽnda nengẽ. Yẽnda na n wʋma yell kibare n lebg n leb a tẽngẽ wã, la mam na n kɩtame tɩ b kʋ yẽnda ne zabr sʋʋg a tẽngẽ wã.› »
8Asiiri rĩmã sõgen-kãsengã wʋmame t'a soaalã yii Lakɩɩse, n na n tɩ zab ne Libna tẽngã. La yẽnda kẽng n tɩ paam-a-la beenẽ. 9La Asiiri rĩmã wʋmame tɩ Kuus tẽng rĩm a Tiraka watame n na n wa zab ne yẽnda. Woto, yẽnda leb n tʋma neb rĩm a Ezekɩyaas nengẽ n yeele: 10«Kẽng-y n tɩ yeel-y Zʋʋda rĩm a Ezekɩyaas yaa: Ra bas tɩ Wẽnnaam ning fo sẽn teegã belg foom, n yeel tɩ Asiiri rĩmã ka na n tõog n deeg Zeruzalɛm ye. 11Fo mengã wʋma Asiiri rĩm-dãmb sẽn dag n maan tẽms a taabã fãa bũmb ningã. B sãam-b-la zãnga. Tɩ fo tagsdẽ tɩ foom n na n põse! 12Dẽ yĩnga, Goozã ne Haarã la Retsɛf ne Edɛn nebã sẽn be Telasaarã, sẽn yaa buud toay-toay nins mam ba-rãmbã sẽn sãamã wẽnnaam-dãmb tõog n fãag-b lame sɩda? 13Hamat rĩmã ne Arpaad rĩmã la Sefarvayim tẽng rĩmã ne Hena rĩmã la Iva rĩmã bee yɛɛnẽ?
14Rĩm a Ezekɩyaas reega sebrã koe-toagsdbã nugẽ n karme, la a yik n kẽng Sẽn-Ka-Saab roogẽ wã n tɩ lak sebrã Sẽn-Ka-Saab taoore. 15#Yik 25.22Rĩm a Ezekɩyaas kẽnga Sẽn-Ka-Saab taoor n pʋʋs n yeel yaa: «Sẽn-Ka-Saab sẽn yaa Israyɛll Wẽnnaam, n zao serubẽ-rãmb zugu, yaa yãmb y yembr bal n yaa dũniyã soolem-dãmbã fãa Wẽnnaam, yaa yãmb n naan yĩngr la tẽnga. 16Sẽn-Ka-Saabo, kɩll-y y tʋbr n kelge! Sẽn-Ka-Saabo, puk-y y nin n gese. Kelg-y goam nins a Senakeriib sẽn tʋm sõgen-kãsengã t'a wa tʋʋsd yãmb a Wẽnnaam sẽn vɩ wã! 17Sẽn-Ka-Saabo, yaa sɩd tɩ Asiiri rĩm-dãmbã sãama buud toay-toayã, la b wã b tẽmsã. 18Bãmb wʋka b wẽnnaam-dãmbã n yõog bugum, n menes-b zãnga. La sɩd-sɩdã, wẽnnaam-bãmb rag n ka wẽnnaam-dãmb sɩd-sɩd ye. Bala, rag n yaa raad ne kug wẽn-naands ninsaalb nus sẽn maane. 19Moasã, Sẽn-Ka-Saab sẽn yaa tõnd Wẽnnaam, d kotame tɩ y fãag tõnd a Senakeriib nugẽ, tɩ dũniyã soolem-dãmbã fãa bãng tɩ yaa yãmb a Sẽn-Ka-Saab y yembr bal n yaa Wẽnnaam.»
A Ezayi wilga Wẽnnaam leokrã
20Dẽ, a Amots biig a Ezayi tʋmame tɩ b tɩ yeel a Ezekɩyaas yaa: «Sẽn-Ka-Saab sẽn yaa Israyɛll Wẽnnaamã yetame:
‹Mam wʋma fo sẽn pʋʋs
n kos maam Asiiri rĩm
a Senakeriib wɛɛngẽ wã.›»
21Ad sɩbgr gomd
Sẽn-Ka-Saab sẽn gom
yẽnda wɛɛngẽ n yetẽ:
Sɩyõ tẽn-neere, a yaanda foom,
la a paoogd foom,
Zeruzalɛm tẽn-neere,
a bee fo poorẽ
n gõmsda a zugu.
22Yaa ãnda la fo sẽn
tʋʋs la f paoogã?
Yaa ne ãnda la fo sẽn zẽk f koɛɛgã?
Fo zẽka f neng yĩngr
ne wuk-m-meng n zabd
ne Israyɛll Pʋ-Peelem-Soaba!
23Fo tũnuga f sẽn
tʋm-b rãmbã n paoog
Sẽn-Ka-Saab n yeele:
«Mam kẽnga ne m
saar-dãmb wʋsgo,
mam tõog n dʋʋ tãms sẽn lug zutu,
n tõog n ta hal Libã yaangã.
Mam kɛɛ yẽnda sɛɛdr tɩ-wogdã,
ne a sɩprɛs tɩɩs nins sẽn
yaa neeb n yɩɩdã,
mam tãaga a yaoolem
zĩ-soalgdgã,
a tʋg-bɛdã zĩisẽ.
24Mam tuu buls n
yũ sãand weoog koom,
mam nao na n kʋɩɩsa Nill kʋɩlgã
ko-soayã fãa koom.
25Fo ka bãng tɩ yaa hal
daar zãr la mam
segl bõn-kãense,
tɩ mam maana bãmb hal
kʋdem-wẽndẽ?
Moasã, mam kɩtdame tɩ b paamd pidsgu,
fo tʋʋmd yaa f kɩt tɩ tẽms nins sẽn tar
pãngã lebg raboodo.
26Tẽn-bãmb nebã ka tar pãng ye,
rabeem la yãnd n tar-ba.
Bãmb wẽnda wa moog sẽn be weoogẽ,
la wa mo-maasa,
la wa gãosg zug moogo.
Bãmb lebga wa kood sẽn
kʋɩ n ka paam n ning biis ye.
27Gese, mam mii fo
zĩndg wakate,
la f yiib ne f kõom wakate.
Mam leb n mii wakat ning fo sẽn gʋngde,
n dat n zab ne maamã.
28Bala, fo yika f sũur ne maam,
la fo wuk-m-men-goamã
zẽk n taa mam tʋbẽ,
mam na n dɩka m bãngã
n sog fo yõorã,
la m ning fo noorã salbre,
n kɩt tɩ f lebg n tũ sor ning
fo sẽn tũ n wa wã n lebe.»
29Ad bãnd ning mam
sẽn kõt foom a Ezekɩyaas:
Rõandã, nebã na n dɩɩ ka-yiisdim,
la vẽere, b na n dɩɩ ka-yogdo,
la yʋʋm-yɩta, b na
n bʋdame la b tigsi,
b na n sela reezẽ tɩɩs n dɩ b biisi.
30Neb nins sẽn põs
Zʋʋda buudã sʋk n ketẽ wã,
na n kɩɩ yẽg tẽn-gãongã pʋga,
la b na n woma biis b wilã zutu.
31Bala, Sẽn-Ka-Saab
nonglem-kãsengã
na n kɩtame tɩ bu-kell yi Zeruzalɛm,
la tɩ neb sẽn põs yi Sɩyõ tãngã zugu.
Rĩm a Senakeriib baoosgo
32Bõn-kãng yĩng kɩtame tɩ Sẽn-Ka-Saab
gom Asiiri rĩmã wɛɛngẽ n yetẽ:
‹Yẽnda ka na n kẽ
tẽn-kãngã pʋg ye,
la a kõn tol n tão peemd ye.
Yẽnda kõn tol n zẽk a gãong ye,
la a kõn tol n zam
tom-dʋr n zab ne-a ye.
33Yẽnda sẽn tũ sor ning n wa wã,
a na n lebg n tũu so-kãng n lebe,
la yẽnda kõn tol n kẽ tẽn-kãngã pʋg ye.
Yaa Sẽn-Ka-Saab n yeele.
34Mam na n kogla
tẽn-kãngã n fãag-a,
mam mengã yʋʋrã yĩnga,
la m tʋmtʋmd a Davɩɩd yĩnga.›»
35Badaar yʋngo, Sẽn-Ka-Saab malɛɛkã yiime n kẽng Asiiri nebã tãb-sikẽ n tɩ kʋ raop tus koabg la pis nii la a nu. B sẽn yik yibeoogo, b mikame tɩ bãmb fãa yaa kũum n dʋrẽ! 36Dẽ, Asiiri rĩm a Senakeriib lebg n kẽng n tɩ zĩnda Niniivi. 37La yẽnda sẽn wa n be a wẽn-naandg a Nisrok pʋʋsg roogẽ wã, yẽnda kambã, a Adarmelɛk ne a Sarɛtsɛɛr kẽng n tɩ kʋ-a-la ne zabr sʋʋg la b bas n zoe n kẽng Araara tẽnga. La a biig Asaradon n led yẽnda zĩigẽ n lebg rĩmã.
Currently Selected:
2 Rĩm-dãmba 19: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
