2 Rĩm-dãmba 17

A Ooze lebga Israyɛll dĩma

1Zʋʋda rĩm a Akaaz sẽn deeg naam tɩ yʋʋm piig la a yiiblẽ, la a Ela biig a Ooze lebg Israyɛll dĩm Samaari. Yẽnda rɩɩ naam yʋʋm a wɛ. 2A Ooze maana sẽn yaa wẽng Sẽn-Ka-Saab nifẽ, la baoosg zãnga, yẽnda wẽngã maaneg ka ta Israyɛll dĩm-dãmb a taabã sẽn deng yẽnda wã ye. 3Asiiri rĩm a Salmanasaar waame n na n zab ne rĩm a Ooze. La yẽnda tõoga a Ooze n kɩt t'a yaood yaood yʋʋmd fãa. 4La Asiiri rĩmã wa n bãngame t'a Ooze zãmbda yẽnda. Sɩd me, a Ooze dag n soos n tʋma neb Ezɩpt rĩm a So #17.4 a So: Wakat-kãnga, a So rag n yaa Ezɩpt tẽng ning b sẽn boond tɩ Sayiisã rĩm yʋʋre. La d ka mi Ezɩpt rĩm ba a yembr sẽn dag n tar yʋ-kãngã ye. nengẽ, n ka yao Asiiri rĩmã yaood ning a sẽn dag n yaood yʋʋmd fãa wã ye. Asiiri rĩmã kɩtame tɩ b yõk a Ooze n kẽes bi-bees roog n balg-a ne bãense. 5Dẽ zugẽ, Asiiri rĩmã zaba ne Israyɛll soolmã tẽms fãa, la yẽnda wa n gũbga Samaari #17.5 Samaari: Yaa Israyɛll tẽngã la Asiiri rĩmã yõk n deeg n toeem a yʋʋrã tɩ lebg Samaari. tẽngã yʋʋm a tãabo. 6La yaa a Ooze sẽn deeg naam tɩ yʋʋm wɛɛlẽ, la Asiiri rĩmã tõog n deeg Samaari tẽngã. Asiiri rĩmã yõga Israyɛll nebã n tall n kẽng a tẽngẽ wã. Yẽnda kɩtame tɩ Israyɛll nebã tɩ zĩnd Hala, ne Goozã kʋɩlg ning b sẽn boond tɩ Haboorã noore, la Meed rãmbã tẽmsẽ.

Israyɛll soolmã lʋɩɩse

7Bõn-kãens sẽn yɩ woto wã, yaa tɩ Israyɛll nebã maana yel-wẽn n beeg Sẽn-Ka-Saab sẽn yaa bãmb Wẽnnaamã. Bãmb basa Wẽnnaam ning sẽn fãag-a bãmb Ezɩpt rĩm a Faarõ yembdã pʋgẽ, n yiis bãmb Ezɩpt tẽngã, n waoog wẽnnaam-dãmb a taaba. 8Israyɛll nebã maana wa buud nins Sẽn-Ka-Saab sẽn dag n kɩt tɩ bãmb digã sẽn dag n maandã. Yaa woto la Israyɛll dĩm-dãmbã rag n maanda.

9Israyɛll nebã soos n maana sẽn kisi, n beeg Sẽn-Ka-Saab sẽn yaa bãmb Wẽnnaamã. Bãmb mee maoong kʋʋb zĩis b tẽmsã fãa pʋse, sẽn sɩng ne gũudbã gãsdã hal n tɩ tãag tẽms nins sẽn me n gũbg ne lalsã. 10#1Rĩm 14.23Israyɛll nebã baoo kug-viginds ne Aseera ra-lugdsi, n lugl maoong kʋʋb zĩisẽ wã, ne tɩɩs nins fãa sẽn tar maasmã tẽngre. 11Woto, Israyɛll nebã yõoga wisd maoong kʋʋb zĩisẽ wã fãa, wa buud nins Sẽn-Ka-Saab sẽn dag n kɩt tɩ b rigã sẽn dag n maandã. Bãmb maana tʋʋm-wẽns wʋsg hal n kɩt tɩ Sẽn-Ka-Saab sũur puugi. 12Bãmb waooga wẽn-naandse, tɩ Sẽn-Ka-Saab yaool n dag n yeel bãmb tɩ b ra sak n maan bũmb a woto ye. 13Sẽn-Ka-Saab rag n kɩtame tɩ bãmb no-rɛɛsdbã ne b bãngdbã fãa keoog Israyɛll ne Zʋʋda nebã n yeel-b yaa: «Wẽnemd-y n bas-y y tʋʋm-wẽnsã, n sak mam tõodã ne m noyã, la y sak tõod nins fãa mam sẽn kɩt tɩ m tʋmtʋmdbã ne m no-rɛɛsdbã togs yãmb ba-rãmbã.» 14La bãmb ka kelg ye. Bãmb kenga b sũyã, wa bãmb ba-rãmbã me sẽn dag n ka tẽ Sẽn-Ka-Saab sẽn yaa bãmb Wẽnnaamã. 15Bãmb kɩɩsa Sẽn-Ka-Saab noyã ne b kaoolã b sẽn dag n maan ne bãmb ba-rãmbã, la zãmsg ning Sẽn-Ka-Saab sẽn dag n kõ bãmbã. Bãmb nebã lagma b mens ne sẽn ka yõodo, tɩ bãmb mensã lebg sẽn ka yõodo. Bãmb tɩ naaga b mens ne bu-zẽms nins sẽn dag n gũbg bãmbã, la Sẽn-Ka-Saab yaool n dag n yeela bãmb tɩ b ra maan wa bu-bãmb ye. 16#1Rĩm 12.28Bãmb basa Sẽn-Ka-Saab sẽn yaa bãmb Wẽnnaamã tõodã fãa, n yõg nag-bi a yiibu, la b vigl Aseera ra-lugdg n wõgemded a taoor n waoogd-a. Bãmb dag n wõgemded n waoogda yĩngr ãdse, la b waoogd wẽn-naandg a Baalle. 17#Tõ 18.10Bãmb dɩka b kom-dibli ne b kom-pugli n maan maoong n yõog bugum. Bãmb dag n maanda tɩto, la b bʋgd bagre. Bãmb maana sẽn yaa wẽng Sẽn-Ka-Saab nifẽ, n kɩt tɩ b sũurã puugi. 18Dẽ, Sẽn-Ka-Saab sũurã puuga ne Israyɛll nebã hal wʋsgo, tɩ b kɩt tɩ b zãag ne bãmba. La yaa Zʋʋda buudã bal n dag n kete.

19La Zʋʋda nebã me ka tall Sẽn-Ka-Saab sẽn yaa bãmb Wẽnnaamã tõodã ye. Bãmb tũu Israyɛll nebã minindu. 20Woto, Sẽn-Ka-Saab basa Israyɛll buudã zãng n ning-b yãnde, n bas tɩ fãadb wa fã-ba. La Sẽn-Ka-Saab baas n dig-b lame tɩ b zãag ne bãmba.

21Wakat ning Sẽn-Ka-Saab sẽn wa n welg Israyɛll buudã n bas a Davɩɩd roogã, rẽ tɩ yaa Israyɛll nebã sẽn yãk a Nebat biig a Zeroboaam t'a yaa rĩmã. La a Zeroboaam tudga Israyɛll nebã n kɩt tɩ b wẽnemd n bas Sẽn-Ka-Saab n lʋɩ kong-kãseng pʋgẽ. 22Israyɛll nebã maana yel-wẽn nins fãa a Zeroboaam sẽn dag n maanã n ka bas ye. 23B maana woto hal tɩ Sẽn-Ka-Saab wa n wẽnemd b neng n bas-b wa b sẽn dag n kɩt bãmb no-rɛɛsdbã sẽn yaa b tʋmtʋmdbã togsã. La b yiisa Israyɛll nebã b tẽngẽ wã, n tall-b n kẽng Asiiri tẽngã, la b kell n paa be hal tɩ ta rũndã.

Bu-zẽms kẽe Samaari

24La Asiiri rĩmã kɩtame tɩ Babilond ne Kuta la Ava ne Hamat ne Sefarvayim neb wa kẽ Samaari tẽmsã pʋs n zĩnd be, n led Israyɛll nebã zĩigẽ. Bãmb sooga Samaari tẽngã n zĩnd a tẽmsã pʋse. 25Bãmb sẽn wa n kẽ Samaari tẽngã, bãmb ka waoog Sẽn-Ka-Saab ye. Rẽ kɩtame tɩ Sẽn-Ka-Saab tʋm gɩgma tɩ b yõg bãmb neb wʋsg n kʋ. 26La b kẽng n tɩ yeela Asiiri rĩmã yaa: «Buud nins yãmb sẽn yõg n tall n wa kẽes Samaari tẽmsã pʋsã ka mi tẽngã wẽnnaamã sẽn waoogd to-to ye. Rẽ kɩtame tɩ wẽnnaamã tʋm gɩgmã tɩ b wa wãb bãmb n kʋ, b sẽn ka sakd Wẽnnaam tõodã yĩnga.»

27Asiiri rĩmã kõo noor n yeele: «Sã n yaa woto, bɩ y kɩt tɩ maan-kʋʋdb nins yãmb sẽn yõg n wa Asiiri ka wã ned a yembr kẽng n tɩ zĩnd beenẽ ne bãmba, n zãms-b tẽngã wẽnnaamã sẽn waoogd to-to.» 28Woto, maan-kʋʋdb nins b sẽn yõg n tall n yi Samaari tẽngã ned a yembr yii Asiiri n kẽng n tɩ zĩnd Betɛlle, la maan-kʋʋdã zãmsa nebã b sẽn na n waoog Sẽn-Ka-Saab to-to.

29La buud fãa maana a wẽnnaam-dãmba, n dɩk-b n tɩ ning maoong kʋʋb zĩisã rot pʋsẽ, Samaari tẽmsã nebã sẽn dag n me wã. La buud fãa maana woto tẽms nins bãmb sẽn be wã pʋse. 30Babilond nebã maana wẽn-naandg a Sukot-Benote, tɩ Kut nebã maan wẽn-naandg a Nergalle, la Hamat nebã maana wẽn-naandg a Asima. 31Ava nebã maana wẽn-naandg a Nibaaz ne wẽn-naandg a Tartake. La Sefarvayim nebã rag n dɩkda b kamb n maand maoong n yõogd bugum n kõt a Adramelɛk ne a Anamelɛk sẽn yaa Sefarvayim nebã wẽnnaam-dãmbã. 32Bãmb dag n waoogda Sẽn-Ka-Saab me. Woto, bãmb yãka neb bãmb sʋkã, tɩ b yɩ pʋʋsg rotã sẽn be maoong kʋʋb zĩisẽ wã maan-kʋʋdba, n maand maoong b yʋʋr yĩnga. 33Woto, bãmb dag n waoogda Sẽn-Ka-Saabo, la b baas n ket n pʋʋsda b mens wẽn-naandsã wa bãmb sẽn yi buud nins sʋk n wa wã sẽn minim n maandẽ wã.

34 # Sɩng 32.29, 35.10 La hal tɩ ta rũndã, bãmb ket n maanda b sẽn minim n maandẽ wã. Bãmb ka waoogd Sẽn-Ka-Saab ye. Bãmb ka tũud no-tũuds nins ne minind nins b sẽn zãms bãmbã ye. La b ka sakd tõodã ne noy nins Sẽn-Ka-Saab sẽn dag n kõ a Zakoob yagensã ye. Yaa a Zakoob la Sẽn-Ka-Saab sẽn dag n pʋd a yʋʋr t'a Israyɛllã. 35#Yik 20.5, Tõ 5.9Sẽn-Ka-Saab yaool n dag n maana kaool ne a Zakoob yagensã n yeele: «Ra waoog-y wẽnnaam-dãmb a taabã ye. Ra wõgemd-y bãmb taoor n pʋʋs-ba, la y ra maan maoong n kõ-b ye. 36#Tõ 6.13Bɩ y waoog Sẽn-Ka-Saab sẽn tẽeg b kangã n yiis yãmb Ezɩpt tẽngã ne pãn-kãsengã. Yaa bãmb taoor bal la yãmb tog n wõgemde, la yaa bãmb b yembr bal la yãmb tog n maan maoong n kõ. 37Bɩ y sak no-tũudsã ne minindã la noyã, ne tõod nins Sẽn-Ka-Saab sẽn kõ yãmbã daar fãa, la y ra waoog wẽnnaam-dãmb a taab ye. 38Da yĩm-y kaool ning mam sẽn maan ne yãmbã yelle, la y ra waoog wẽnnaam-dãmb a taab ye. 39Yãmb tog n waooga Sẽn-Ka-Saab sẽn yaa yãmb Wẽnnaamã b yembr bala, yaa bãmb n na n fãag yãmb y bɛɛbã fãa nugẽ.»

40La nebã ka kelg ye. Bãmb kell n maana wa b sẽn minim n maandẽ wã bala. 41Bu-kãens rag n waoogda Sẽn-Ka-Saabo, la b pʋʋsd b wẽn-naandsã me. Bãmb kambã ne b yagensã me ket n maanda woto hal tɩ ta rũndã, wa bãmb ba-rãmbã sẽn dag n maandã.

Currently Selected:

2 Rĩm-dãmba 17: MPBU

Highlight

Copy

Compare