2 Rĩm-dãmba 14

A Amatsɩya lebga Zʋʋda rĩmã

1A Zoakaaz biig a Zoaas sẽn lebg Israyɛll dĩm tɩ yʋʋm yiiblẽ, la a Zoaas biig a Amatsɩya me lebg Zʋʋda rĩmã. 2A Amatsɩya sẽn wa n na n deeg naamã t'a tara yʋʋm pisi la a nu. La a rɩɩ naamã Zeruzalɛm yʋʋm pisi la a wɛ. A Amatsɩya ma yʋʋr dag n boondame t'a Yewohadan, la a yaa Zeruzalɛm bi-pugla. 3A Amatsɩya maana sẽn yaa tɩrg Sẽn-Ka-Saab nifẽ, la baoosg zãnga, yẽnda ka tõog n maan wa a yaab a Davɩɩd ye. Yẽnda kell n maana wa a ba a Zoaas sẽn dag n maanã. 4Baoosg zãnga, b ka menes maoong kʋʋb zĩisã ye. Nebã rag n ket n maanda maando, la b yõogd wisd tẽn-kugã sẽn be maoong kʋʋb zĩisẽ wã.

5A Amatsɩya rĩungã sẽn wa n paam pãnga, a kʋʋ yẽnda tʋmtʋmdb nins sẽn dag n kʋ yẽnda ba wã. 6#Tõ 24.16La wa b sẽn guls a Moyiis tõogã sebr pʋgẽ wã, Amatsɩya ka kʋ nin-kʋʋdbã kamb ye. Sẽn-Ka-Saab rag n kõ a Moyiis noor tõog sebrã pʋg n yeele:

«Bɩ y ra kʋ ba, a biig yel-wẽnd yĩng ye.

La y ra kʋ biiga, a ba yel-wẽn yĩng ye.

Bɩ y kɩt tɩ ned kam fãa ki, a meng beegr yĩnga.»#14.6 Gom-kãngã bee Tõod sebrã 24.16.

7Yaa a Amatsɩya n kʋ Edom neb tus piig yamsem longã pʋgẽ. La zabrã wakate, yẽnda tõog n deega Sela tẽngã, la a pʋda tẽngã yʋʋr tɩ Yokteyɛlle, la tẽngã yʋʋr ket n yaa woto hal tɩ ta rũndã.

8La a Amatsɩya tʋma neb tɩ b tɩ yeel a Zehu biig a Zoakaaz biig a Zoaas sẽn yaa Israyɛll dĩmã t'a wa tɩ b seg taab n zabe. 9Israyɛll dĩm a Zoaas tʋmame tɩ b tɩ yeel Zʋʋda rĩm a Amatsɩya yaa: «Daar a yembre, Libã gõaagã #14.9 Libã gõaagã: Mamsda Zʋʋda rĩm a Amatsɩya, tɩ Libã sɛɛdr tɩɩgã mamsd tãb-biisã pãnga, tɩ we-rũngã mamsd Israyɛll dĩm a Zoaase. tʋmame tɩ b tɩ yeel Libã sɛɛdr tɩɩgã yaa: ‹Rɩk f bi-puglã n kõ mam bi-riblã t'a maan a paga! La Libã tẽng we-rũng n kẽn n tab gõaagã. 10Fo zabame n tõog Edom nebã tɩ f pẽgd f menga. Kell n pa pẽg-m-men-kãng pʋga, la f kell n pa f tẽngẽ. Bõe yĩng tɩ f na n yik n bao yell n kõ f menga? Fo na n sãamame, la Zʋʋda nebã me na n naaga foom n sãame!› » 11La Zʋʋda rĩm a Amatsɩya ka kelg a Zoaas goamã ye. Woto, Israyɛll dĩm a Zoaas yikame n kẽnge, tɩ yẽnda ne Zʋʋda rĩm a Amatsɩya na n yek taab Bɛt-Semees sẽn be Zʋʋda soolmã n zab taaba. 12Israyɛll nebã tõoga Zʋʋda nebã, tɩ b ned kam fãa lebg n zoe n kuil a yiri. 13Israyɛll dĩm a Zoaas yõka a Akaazɩya biig a Zoaas biig a Amatsɩya sẽn yaa Zʋʋda rĩmã n kẽes yembd Bɛt-Semeese. Yẽnda yii beenẽ n kẽng Zeruzalɛm, la yẽnda luba Zeruzalɛm lalgã kɩreng ning sẽn sɩng ne noor ning sẽn teesd Efrayiimã, hal tɩ tãag tẽngã noor sẽn be lalsã gõdr zĩigẽ wã. B sẽn lub lalgã woglem tata kãntɩɩg kobs-naase. 14A Zoaas wʋka sãnemã ne wanzuri wã, ne teed nins fãa sẽn dag n be Sẽn-Ka-Saab roogẽ wã ne rĩmã zak laog bĩngr zĩigẽ wã. Yẽnda yõga yembs me n lebg n leb Samaari tẽnga.

15A Zoaas tʋʋm a taabã ne a sẽn maan bũmb ninsã, la a gãndaalmã tʋʋmã, ne a sẽn zab ne Zʋʋda rĩm a Amatsɩya wã gʋlsa Israyɛll dĩm-dãmbã kibay sebr pʋga. 16A Zoaas saka a saam-dãmba, la b mum-a-la Samaari n naag Israyɛll dĩm-dãmb a taabã. Yẽnda biig a Zeroboaam n led yẽnda zĩigẽ n dɩ naamã.

17Israyɛll dĩm a Zoakaaz biig a Zoaas kũumã zugẽ, Zʋʋda naab a Zoaas biig a Amatsɩya kell n vɩɩmd n kaoosa yʋʋm piig la a nu. 18Amatsɩya tʋʋm a taabã fãa gʋlsa Zʋʋda rĩm-dãmbã kibay sebr pʋga. 19Neb n sɩɩg taab noor Zeruzalɛm n dat n kʋ-a, la a Amatsɩya zoeeme n kẽng Lakɩɩse. La b tʋma neb tɩ b pʋgla n kẽng Lakɩɩs tẽng n tɩ kʋ. 20La b rɩka a Amatsɩya ne saar wiid sẽn tɛte, n kẽng Zeruzalɛm n tɩ mum n naag a saam-dãmbã, a Davɩɩd tẽngã pʋga. 21Woto, Zʋʋda nebã naaga taab n yãk a Azariya sẽn dag n tar yʋʋm piig la a yoobã, n kɩt t'a led a ba a Amatsɩya zĩigẽ n soog rĩungã. 22Rĩmã kũum zugẽ, yɩ a Azariya n deeg Elat tẽngã n lebs n me, n dɩk-a n kõ Zʋʋda nebã.

Zeroboaam a yiibẽ soabã rĩungu

23A Zoaas biig a Amatsɩya sẽn yaa Zʋʋda rĩmã sẽn deeg a naamã tɩ yʋʋm piig la a nuunẽ, la a Zoaas biig a Zeroboaam me lebg Israyɛll dĩm Samaari tẽngã pʋga. Yẽnda rɩɩ a naamã yʋʋm pis-naas la a yembre. 24Yẽnda maana sẽn yaa wẽng Sẽn-Ka-Saab nifẽ, n ka tol n bas yel-wẽn nins a Nebat biig a Zeroboaam sẽn dag n maane, n kɩt tɩ Israyɛll nebã lʋɩ kongr pʋgẽ wã ba a yembr ye. 25#Zon 1.1Yẽnda lebs n deega Israyɛll tẽmsã sẽn sɩng ne Lebo-Hamat sẽn be nug-rɩtgã, n tɩ tãag yamsem ko-kãsengã sẽn be Araba tẽn-nabdrã sẽn be nug goabgã. Dẽ, kell n yɩɩ wa sẽn zems Sẽn-Ka-Saab sẽn yaa Israyɛll Wẽnnaamã sẽn dag n kɩt tɩ Gat-Hefɛɛr dao a Amitayi biig a Zonaas sẽn yaa bãmb no-rɛɛsã togsã. 26Bala, Sẽn-Ka-Saab rag n nee Israyɛll nebã sẽn be namsg-kãseng pʋgẽ wã. La ned ba a yembr dag n ka be, sã n yaa yamba, wall burkĩna, n na n fãag Israyɛll nebã ye. 27La Wẽnnaam Sẽn-Ka-Saab yaool n dag n ka yeel tɩ b na n menesa Israyɛll yʋʋr dũniyã zug ye. Woto, Sẽn-Ka-Saab tũnuga a Zoaas biig a Zeroboaam, n fãag bãmba.

28A Zeroboaam tʋʋm a taabã ne a sẽn maan bũmb ninsã fãa, la a sẽn yɩ gãndaoog zabã pʋgẽ wã, ne a sẽn maan to-to n deeg Damaas ne Hamat tẽmsã sẽn dag n yaa Zʋʋda n so n lebs Israyɛllã, bõn-kãens fãa gʋlsa Israyɛll dĩm-dãmbã kibay sebr pʋga. 29A Zeroboaam saka a saam-dãmba, la b mum-a lame n naag Israyɛll dĩm-dãmbã. Yẽnda biig a Zakari n led yẽnda zĩigẽ n dɩ naamã.

Currently Selected:

2 Rĩm-dãmba 14: MPBU

Highlight

Copy

Compare