2 Korẽnt‑rãmbã sebre 9
9
1Ka tɩlɛ tɩ mam gʋls yãmb sõngr ning sẽn tog n kõ Kiris tẽedbã wɛɛngẽ ye. 2Sɩd me, mam mii yãmb ratem sõngã, la mam pẽga m meng yãmb wɛɛngẽ Masedoan nebã taoor n yeel tɩ Akayi nebã rag n seglame n sɛ hal rɩɩgẽ, la yãmb sẽn modgdã kɩtame tɩ neb wʋsg me rat n maane. 3Mam tʋmda ba-biisã yãmb nengẽ, tɩ tõnd sẽn pẽg yãmbã kõn yɩ zaalem bõn-kãng wɛɛngẽ ye, la tɩ yãmb na segl n sɛ wa mam sẽn yeelã. 4Mam ka rat tɩ Masedoan nebã yãag maam n wa n mik tɩ yãmb ka segl n sɛ ye, tɩ tõnd sẽn kɩs sɩd ne yãmbã da wa n lebg yãnd ne tõnd ye. La yaa m sẽn ka rat n yeel tɩ yãmb yãnda yĩnga. 5Dẽ, mam tagsdame tɩ yaa neer tɩ m kos ba-biisã tɩ b reng maam taoor n wa yãmb nengẽ, n ges nonglem kũunã yãmb sẽn zoe n kãabã yelle, tɩ y tõe n segl n sɛ, tɩ yɩ yamleoog kũuni, la ra yɩ wa zoe-bõn kũun ye.
6Bãng-y tɩ ned ning sẽn bʋt bilf na n tigsa bilfu, la ned ning sẽn bʋt wʋsg na n tigsa wʋsgo. 7Bɩ ned kam fãa kõ wa sẽn zems a sẽn yãk yam a sũur pʋgẽ, la ra yɩ ne nen-gãneng wall modgr ye. Bala, Wẽnnaam nonga ned ning sẽn kõt ne sũ-noogo. 8La Wẽnnaam tara pãn-tõog tɩ kõ yãmb bark buud fãa tɩ seke. Tɩ yãmb tõe n paam bũmb fãa, daar fãa, sẽn na sõng yãmb y ratmã fãa pʋgẽ n sek n kell tɩ y maan tʋʋm-soamã fãa, 9#Yɩɩn 112.9tɩ yɩ wa gʋls-sõamyã sẽn yeelã:
A kɩtame t'a tʋʋm-sõama wã saag zĩig fãa.
A kõo naong rãmba.
Yẽnda tɩrlem paada wakat sẽn kõn sa.
10 #
Eza 55.10
Soab ning sẽn kõt-a ka-koaad bõn-buudu, la b kõt-a bur t'a rɩtẽ wã na n kõo yãmb bõn-buudu, la b kɩt t'a wom wʋsgo, la b kɩt tɩ yãmb tɩrlmã biis yɩ wʋsgo. 11Woto, yãmb na paam arzegs bũmb fãa pʋgẽ, n yãk tɩ yɩ nonglem kũuni tɩ neb wʋsg na pʋʋs Wẽnnaam barka, kũunã tõnd sẽn kõ-bã yĩnga. 12Bala, ka Wẽnnaam nebã bal la nonglem kũun‑kãngã na n sõng ye. A na n kɩtame tɩ neb wʋsg pʋʋs Wẽnnaam barka. 13Bãmb sã n paam sõng-kãngã, b na n pẽga Wẽnnaam, yãmb sẽn sak n kɩs Kiris koe-noogã kaseto, la yãmb sẽn kõ kũun wʋsg bãmb yĩnga, la nebã fãa yĩngã. 14B pʋʋsda yãmb yĩng ne nonglem, Wẽnnaam sẽn sik bark kãseng yãmb zutã yĩnga. 15Bark Wẽnnaam, bãmb kũunã noor sẽn ka tõe n togsã yĩnga.
Currently Selected:
2 Korẽnt‑rãmbã sebre 9: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
