2 Kibayã 19
19
Wẽnnaam no-rɛɛs a Zehu lenga a Zozafate
1La sã n yaa ne Zʋʋda rĩm a Zozafate, yẽnda leba a tẽngẽ wã Zeruzalɛm ne laafɩ. 2A Anani biig a Zehu sẽn yaa Wẽnnaam no-rɛɛsã kẽng n tɩ sega rĩm a Zozafat n yeel-a yaa: «B tog n sõnga nin-wẽng la? Bɩ fo nonga neb nins sẽn kis Sẽn-Ka-Saabã? Bõn-kãng yĩnga, Sẽn-Ka-Saab sũurã yika ne foom. 3La baoosgo, Sẽn-Ka-Saab yãame tɩ fo maana sẽn yaa neere. Bala, fo kɩtame tɩ b yõog wẽn-naan-poak a Aseera ra-lugdsã fãa sẽn be soolmã pʋgẽ wã.»
A Zozafat lugla bʋ-kaoodba
4A Zozafat tɩ zĩnda Zeruzalɛm. La dẽ poore, a yi n saag n gesa a nebã, la sẽn sɩng ne Beerseba n tɩ ta Efrayiim tãngã, yẽnda talla nebã tɩ b lebg n wa tũ Sẽn-Ka-Saab sẽn yaa bãmb yaab-rãmbã Wẽnnaamã. 5La yẽnda lugla bʋ-kaoodb soolmã fãa pʋga, ne Zʋʋda tẽms nins fãa sẽn tar pãngã pʋse, la tẽng fãa pʋga.
6La a yeel bʋ-kaoodb yaa: «Maan-y gũusg neer ne bũmb ning yãmb sẽn na n maan-a. Bala, ka ninsaal yĩng la yãmb sẽn kaood bʋʋdã ye. La yaa Sẽn-Ka-Saab yĩnga. La bãmb na n zĩnda ne yãmb y bʋʋdã kaoob wakate. 7Moasã, bɩ y zoe Sẽn-Ka-Saabo. Maan-y gũusgu, la y maan-y tʋʋmã neere. Bala, Sẽn-Ka-Saab sẽn yaa tõnd Wẽnnaam ka kaood bʋʋd kegre, la b ka bak ned n bʋ, la b ka reeg kũun n yaool n kao bʋʋd ye.»
8La Zeruzalɛm pʋgẽ me, a Zozafat yãka Leevi nebã, la maan-kʋʋdba, ne Israyɛll buudã nanambs kẽer n lugl tɩ b na n kaood bʋʋdã Sẽn-Ka-Saab yʋʋr yĩnga, n welsd Zeruzalɛm nebã yɛl ne taaba. 9La a kõ bãmb me noor n yeel-b yaa: «Yãmb na n maana y tʋʋmã Sẽn-Ka-Saab zoees pʋga, la ne sɩd la pʋ-peelem. 10Yãmb saam-biisã sã n yi b tẽmsã pʋsẽ n wa ne yell tɩ b bʋ, sã n yaa nin-kʋʋb yelle, bɩ tõodo, noyã, wa minind yelle, bɩ y zãms bãmb tɩ b ra wa beeg ne Sẽn-Ka-Saabo, tɩ b sũurã wa yik ne yãmb ne saam-biisã ye. Bɩ y maan-y-yã a woto, la taal kõ zĩnd yãmb zug ye. 11Ade, maan-kʋʋd kãsmã a Amarya n tar noor ne yãmb fãa, sã n yaa ne yɛl nins fãa sẽn kẽed ne Sẽn-Ka-Saab tʋʋmdã, la Zʋʋda buudã naab a Zevadyahu sẽn yaa a Ismayɛll biigã, n tar noor ne yãmb fãa, sã n yaa ne yɛl nins sẽn kẽed ne rĩmã tʋʋmã, la Leevi nebã n na n sõngd yãmb ne sɛbã gʋlsg yelle. Woto yĩngã, bɩ y paam raoodo, la y tʋme! La bɩ Sẽn-Ka-Saabã zĩnd ne ned ning sẽn na n maan-a neere.»
Currently Selected:
2 Kibayã 19: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
